کوردستان میدیا

سێشەممه 26ی پووشپەڕ 2718
ماڵپەڕی ناوەندیی حیزبی دێموکراتی کوردستانی ئێران

كارناسانی مافی مرۆڤی ڕێكخراوی نه‌ته‌وه‌ یه‌كگرتووه‌كان: ڕێژیمی ئێران كۆتایی بێنێ به‌ ده‌سبه‌سه‌ر كردنی ڕۆژنامه‌وانان

15:34 - 21 خەزەڵوەر 2715

كوردستان میدیا: كارناسانی مافی مرۆڤی ڕێكخراوی نه‌ته‌وه‌ یه‌كگرتووه‌كان، خوازیاری ڕاگرتنی ده‌سبه‌سه‌ركردنی ڕۆژنامه‌وانان له‌ ئێراندا بوون.

به‌پێی هه‌واڵی گه‌یشتوو به‌ ماڵپه‌ڕی كوردستان میدیا، ژماره‌یه‌ك له‌ كارناسانی مافی مرۆڤی ڕێكخراوی نه‌ته‌وه‌ یه‌كگرتووه‌كان به‌ بڵاوكردنه‌وه‌ی ڕاگه‌یه‌نراوێك داوایان له‌ ڕێژیمی ئێرن كردووه‌ كه‌ ده‌سبه‌سه‌ر كردن، ترساندن و به‌دواداچوونی ڕۆژنامه‌وانان ڕابگرێ و ڕۆژنامه‌وانه‌ به‌ندكراوه‌كان ئازاد بكات.

كومیسێری باڵای مافی مرۆڤی ڕێكخراوی نه‌ته‌وه‌ یه‌كگرتووه‌كان داوای له‌ ڕێژیمی ئێران كردووه‌ كه‌ پێش له‌ هه‌ڵبژاردنه‌كانی مه‌جلیس كه‌شێكی ئه‌من به‌ گه‌ره‌نتیی مافی ڕاده‌ربڕین بخولقێنێ.

هه‌روه‌ها ئه‌حمه‌د شه‌هید ڕێپۆرتێری تایبه‌تیی مافی مرۆڤی ڕێكخراوی نه‌ته‌وه‌ یه‌كگرتووه‌كان بۆ كاروباری ئێران ده‌ڵێ: ترس و تۆقاندنی ڕۆژنامه‌وانان بووه‌ته‌ هۆی ئه‌وه‌یكه‌ ڕۆژنامه‌وانان له‌ ئێراندا ئازادی كار و چالاكییان نه‌بێت.

شه‌پۆلێكی نوێی ده‌سبه‌سه‌ر كردنی ڕۆژنامه‌وانان له‌ ئێراندا له‌ لایه‌ن یه‌كه‌ی حه‌فازه‌تی ئیتلاعاتی سوپای پاسدارانه‌وه‌ ده‌ستی پێ كردووه‌.

ئه‌م رۆژنامه‌وانانه‌ له‌ لایه‌ن سوپاوه‌ وه‌ك به‌كرێگیراو و سیخوڕی دوژمن ناوزه‌د كراون.

ڕێكخراوی هه‌واڵنێرانی بێ سنوور ئێران به‌ یه‌كێك له‌ خراپترین وڵاتان ده‌زانێ له‌ باری ڕاگه‌یه‌نه‌كانه‌وه‌. ئێران یه‌كێك له‌ گه‌وره‌ترین به‌ندیخانه‌كانه‌ بۆ ڕۆژنامه‌وانان له‌ جیهاندا.