کوردستان میدیا

دووشەممه 31ی بانەمەڕ 2718
ماڵپەڕی ناوەندیی حیزبی دێموکراتی کوردستانی ئێران

ئەمریكا و وڵاتانی عەرەبی هاوپەیمانییەكی سەربازی دژی ئێران پێك دەهێنن

15:43 - 29 رێبەندان 2716

كوردستان میدیا: دانوستانەكان بۆ پێكهێنانی هاوپەیمانییەكی سەربازی لە نێوان ئیدارەی ترامپ و هاوپەیمانانی عەرەبیی ئەمریكا دەستیان پێ كردووە.

بە گوێرەی هەواڵی دویچەوێللە، ئامانج لەو وتووێژانە بەرتەسككردنەوەی نفووزی ڕێژیمی ئێران لە ناوچەدا و بەرەنگاربوونەوەی هەڕەشەكانی سەربازییەكانی ئەو ڕێژیمەیە. بڕیار وایە عەرەبستان، ئیماراتی یەكگرتووی عەرەبی، میسر و ئۆردۆن پەیماننامەیەكی سەربازیی هاوشێوەی ناتۆ واژۆ بكەن كە لە ئەگەری هێرش بۆ سەر هەركام لەو وڵاتانەدا، وڵاتانی هاوپەیمان پێكەوە بەرپەرچی بدەنەوە. سەرەڕای ئەوە، بڕیار وایە ئەو وڵاتانە لەگەڵ ئەمریكا و ئیسراییلیش لە بواری هەواڵگریی ئەمنیەتی و سەربازیشدا هاوكارییەكی بەربڵاو دەست پێبكەن.

ڕۆژنامەی واڵستریت ژۆرناڵ ڕۆژی ١٥ی فیورییە (٢٧ی ڕێبەندان) بە بڵاوكردنەوەی ڕاپۆرتێك باسی لە وتووێژەكانی نێوان ئیدارەی ترامپ و نوێنەرانی وڵاتانی عەرەبی كردووە. لەو ڕاپۆرتەدا هاتووە كە ئامانج لەو هاوپەیمانێتییە بەرەنگاربوونەوەی دوژمنی هاوبەش، واتە ڕێژیمی ئێرانە. بڕیارە وڵاتانی ئەندام لەو هاوپەیمانییە سەربازییەدا لەگەڵ ئیسراییلیش لە بواری ئاڵوگۆڕی زانیاریی سەربازی و ئەمنیەتیدا هاوكاری بكەن.

ئەگەرچی ئەمریكاش وەك ئیسراییل بە فەرمی ئەندامی ئەو هاوپەیمانییە سەربازییە نابێت، بەڵام ئیدارەی ترامپ ڕایگەیاندووە كە هەم لە ڕووی ئەمنیەتی و هەم لە ڕووی سەربازییەوە پشتیوانی لەو هاوپەیمانییە دەكات.

بەپێی ڕاپۆرتی واڵستریت ژۆرناڵ، یەكەمین تاقیكردنەوە بۆ ئەگەری پێكهێنانی ئەو هاوپەیمانییە سەربازییە، چالاكیی هاوبەش لە شەڕی نێوخۆیی یەمەن دەبێت. یەمەن یەكێك لەو شوێنانەیە كە بۆتە گۆڕەپانی شەڕی بەوەكالەتی نێوان ئێران و وڵاتانی عەرەبی بە تایبەتی عەرەبستانی سعوودی.