کوردستان میدیا

یەکشەممە 27ی گەلاوێژ 2719
ماڵپەڕی ناوەندیی حیزبی دێموکراتی کوردستانی ئێران

ئەندامێکی حیزبی دێموکرات لە وڵاتی ئاڵمان کۆچی دوایی کرد

12:58 - 13 گەلاوێژ 2719

کوردستان میدیا: ئەندامێکی حیزبی دێموکرات کوردستانی ئێران، بەهۆی وەستانی دڵ، لە شاری "مونشێنی ئاڵمان"، ماڵاوایی لە ژیان کرد.

بەپێی هەواڵی گەیشتوو بە ماڵپەڕی کوردستان میدیا، ڕۆژی ٢٩ی پووشپەر، "شەمسەدین یاران"، ئەندامی دڵسۆزی حیزبی دێموکراتی کوردستانی ئێران، لە وڵاتی ئاڵماندا، بەهۆی وەستانی لەناکاوی دڵ و لە تەمەنی ٥٢ ساڵیدا، کۆچی دوایی کرد.

کاک "شەمسەدین"، ساڵی ١٣٤٦ی هەتاوی، لە بنەماڵەیەکی تێکۆشەری شاری سنە، چاوی بە دونیا هەڵهێناوە. ناوبراو یەکێک لە لایەنگرانی دڵسۆزی حیزبی دێموکرات لە شاری سنە بووە کە هەمیشە داکۆکی لە خەباتی ڕەوای گەلەکەی کردووە.

ناوبراو ساڵی ٢٠٠٧ی زایینی، بەهۆی گوشاری هێزە سەرکوتکەرەکانی ڕێژیم، ڕووی لە باشووری کوردستان کردووە و لە شاری هەولێر بوو بە ئەندامی ئاشکرای حیزبی دێموکرات و تا ساڵی ٢٠١٥ وەک ئەندامێکی چالاک ئەرکە حیزبییەکانی بەو پەڕی ئامادەییەوە بە ئەنجام گەیاند. دواتر لە ساڵی ٢٠١٥ی زایینیدا، وێڕای هاوژین و کوڕەکەی، ڕووی لە وڵاتی ئاڵمان کردووە و لە شاری مونشێندا گیرساوەتەوە.

حیزبی دێموکراتی کوردستانی ئێران، سەرەخۆشی لە بنەماڵە، خزم و کەسوکاری ناوبراو دەکات و خۆی بە هاوبەشی خەمیان دەزانێت.