کوردستان میدیا

ماڵپەڕی ناوەندیی حیزبی دێموکراتی کوردستانی ئێران

تێکئاڵانی باڵای شاخ و گیانفیدایی پێشمەرگە

20:38 - 15 سەرماوەز 2718

کەریم پەرویزی

پێشمەرگە ئەو ئیرادەیەیە کە لە رەگی مێژووی پڕشانازیی نەتەوەیەک و بڕوای پیرۆزی مرۆڤێک و هیوا بەدوارۆژی نەوەیەک سەرچاوە دەگرێ. ئیرادەیەکی لەم چەشنە نە دەتوانێ بە چۆکدا بێ و نە دەکرێ تووشی قۆزاخەی دۆگماتیزم ببێتەوە.

پێشمەرگە لە نێو نەتەوەیەکدا سەر هەڵ دەدا کە نیشتمانەکەی بە زەبری ڕم و پۆتین خراوەتە ژێردەستی دەسەڵاتێکی ستەمکار و دەنگی بەرزی ئازادیخوازی تێدا دیل کراوە، بۆیە ئەم نەتەوەیە دەیەوێ کە نیشتمانەکەی ئاوەدان بکاتەوە و بە دەنگی زوڵاڵی خەباتکاری و رزگار و یەکسانیخوازی، داهاتوویەکی گەش و پێشکەوتوو بونیات بنێ و وەدی بێنێ.

ئەم نەتەوەیە لەم پێناوەدا دەیان و سەدان ساڵە کە تێدەکۆشێ و خەبات دەکا و قوربانی دەدا، بۆیە ئیرادەیەکی لەگیران نەهاتوو و کۆڵنەدەرانەی لە نێو نەوە بەدوای نەوەدا تێدا بەهێزو بەهێزتر دەبێ. ئەم ئیرادەیە، ئیرادەیەکی دەرەکی نییە و هەڵقوڵاوی نێو ناخ و کۆنەستی ئەم نەتەوەیەیە، بۆیە بە هیچ چەک و زەبر و زەنگێک تووشی داڕمان نابێ و پتەوتر لە جاران و گەشاوەتر لە قۆناخەکانی پێشوو پەرە دەگرێ.

ئەم ئیرادەیە، لە باڵای بەرز و پێداگریی هەرمانیی شاخدا هێما و ورە دەگرێ و شاخ دەبێ بە سەمبۆل و هێما بۆ وەها ئیرادەیەک کە دەتوانین ناوی لێ بنێین ئیرادەی قەت چۆکدانەدان و خولیابەخشین. هێما و سیمایەک کە لە شاخدا خۆی دەبینێتەوە کە دەیەوێ زایەڵەی دەنگی مێژوو و حەزی هەرمانی چێژبەخشین و ژیان بەرهەمهێنانەوە بێ. شاخ دەبێ بە سیمای بەهیبەتی ئیرادەی ئازادی و خۆسەلماندن و ژیانەوە.

بەم پێیە، مرۆڤی کورد، ئەو رۆڵە وشیارانەی کە تەپوتۆزو قۆزاخەی تەنیوی دەستی نەزانی و نەزانپەرستی و کۆیلەتی فڕێ دەدەن و دڕ بە تەمومژی تاریکپەرستی دەدەن، سیما و ناوی پێشمەرگە وەکوو خەڵاتی ئیرادەی نەتەوەیی وەردەگرن و دەبن بەوانەی کە هەرگیز لەبیر ناکرێن.

لێرەدایە کە پێشمەرگە بە هیواوەرگرتن و دڵدان بە هەیبەتی ورەدەری و خولیابەخشیی شاخ، عاشقی باڵای شاخ دەبێ و ئیرادەی لێوەردەگرێ و پێشمەرگە و شاخ تێکدەئاڵێن؛ بۆیە لە مێژووی ئەم گەلە و ئەم خەباتەدا، شاخ و پێشمەرگە وەها تێک دەئاڵێن کە بۆت لێک جیا نابنەوە و هەر کە ناوی شاخ دێنێ پێشمەرگەت وەبیر دێتەوە و بەپێچەوانەش.

قۆناخی نوێی خەباتی گەلەکەمان، ڕاسان، بریتییە لە نوێبوونەوە و خۆنوێکردنەوە، بە شێوەیەک کە ئەم چیرۆکی مێژووییەی شاخ و پێشمەرگە، ببێ بە هێمایەک بۆ رابوونی شار.  بۆیە داستان و حەماسەی هەرمانی شاخ و گیانفیدایی پێشمەرگە و نوێبوونەوی شار، هەرگیز ناتوانن لە رابردوودا بژین و بەردەوام و بەردەوام خۆیان نوێ دەکەنەوە و ژیان بەرهەم دەهێننەوە.