کوردستان میدیا

ماڵپەڕی ناوەندیی حیزبی دێموکراتی کوردستانی ئێران

تەیموور مستەفایی: دوكتور قاسملوو مرۆڤێك بوو كە هەم داهێنەر بوو و هەم نوێگەرا بوو

23:27 - 31 پووشپەڕ 2712

کوردستان میدیا: دەقی وتەكانی بەڕێز تەیموور مستەفایی، ئەندامی دەفتەری سیاسیی حیزبی دێموكرات لە 23هەمین ساڵوەگەڕی شەهیدكردنی دوكتور قاسملوو و هاوڕێیانیدا

خۆشك و برایانی بەڕێز!

بەشداربووانی بەڕێز!


بەخێر بێن بۆ كۆڕیادیی 23هەمین ساڵیادی تێرۆركردنی رێبەری مەزن، دوكتور قاسملوو و هاوڕییانی.
كۆبوونەوەمان هەموو ساڵیك لە ساڵڕۆژی شەهیدبوونی دوكتور قاسملوو، لە راستیدا بۆ پێداهەڵگوتن بۆ دوكتور قاسملوو و ئەوەی كە پێی دەڵێن فەردپەرەستی نیە، بەڵكوو دوكتور قاسملوو لە كاتی حەیاتی خۆیدا كەسێك بوو كە موخالفی فەردپەرەستی بوو. ئەگەر وایە، كۆبوونەوەمان لێرە بە دوو مەبەستە. مەبەستی یەكەم ئەوەیە كە لەگەڵ گیانی پاكی ئەو شەهیدانە پەیمان نوێ بكەینەوە كە رێبازەكەیان درێژە پێ بدەین و تا گەیشتن بە ئامانجەكانیان لە خەبات كۆڵ نادەین. مەبەستی دووهەم لە كۆبوونەوەی ئێمە لە ئەم كۆڕانە و لەم یادمانانە ئەوەیە كە بیر و هزری دوكتور قاسملوو، وانەكانی دوكتور قاسملوو، هەر جارە لە كۆڕیادەكاندا گۆشەیەك یان دووگۆشەیەكی باس بكەین بۆ ئەوەی كە هاوڕێیانی پێشوو و ئەو هاوڕییانەی كە ساڵهای ساڵە لە خەباتدان، وەبیریان بێتەوە و لاوانی تازە پەیوەستبوو بە ریزی حیزبی دێموكراتی كوردستانی ئێرانیش بیكەنە توێشەی رێگەی خەباتیان و لەو پەند و دەرسانە كەڵك وەربگرن.

ئەگەر بمانهەوێت باس لە بیر و بۆچوونەكانی دوكتور قاسملوو بكەین، لە راستیدا بیروبۆچوونی دوكتور قاسملوو بیروبۆچوونێكی فرەڕەهەند و فرەلایەنە و بە وتارێك و لە چوارچێوەی كۆڕ و سمینارێكدا ناتوانین باس لە هەموو رەهەندەكانی بكەین.

لێرەدا لە دوو روانگەوە باس لە رێبازی دوكتور قاسملوو یان بیروبۆچوونەكانی دوكتور قاسملوو دەكەین.

یەكەم رەهەند، رەهەندی داهێنان و نوێگەرایی:


دوكتور قاسملوو، مرۆڤێك بوو كە هەم داهێنەر و هەم نوێگەرا بوو. ئەگەر بە نموونە باسی گەڕانەوەی دوكتور قاسملوو لە ساڵی 1349 و زیندووكردنەوەی حیزبی دێموكرات لەو كات و ساتەدا بكەین، دەتوانین بڕۆین بۆ ئەو گۆشەنیگایەی كە دوكتور قاسملوو چۆن هەوڵ دەدا بۆ نوێخوازی و داهێنان. ئەو كاتەی دوكتور قاسملوو دەگەڕێتەوە، حیزبی دێموكرات ئەوەی كە پێی دەڵێن ناوێكی گەورە و ماڵێكی وێران بوو. ئەم حیزبە لەو ماوەیەدا لە ماوەی چەند ساڵی پێش هاتنەوەی دوكتور قاسملوو لە راستیدا لە رێبازی خۆی دوور كەوتبوو، ئەفكار و بیروبۆچوونی جۆراوجۆر نفووزیان كردۆتە نێو حیزبی دێموكرات و حیزبی دێموكرات لە راستیدا تەنیا ناوەكەی ماوە. بەڵام هاتنەوەی دوكتور قاسملوو و كۆكردنەوەی هاوڕێیانی حیزبی و دانانی بەرنامە و ئەساسنامە، دانانی كەلاسی كادر، دەركردنەوەی جارێكی دیكەی رۆژنامەی كوردستان گیانێكی تازە دەبەخشێ بە حیزبی دێموكرات و حیزبی دێموكرات دەبووژێنێتەوە. بووژانەوەی حیزبی دێموكرات لەو كات و ساتەدا، نوقتەگۆڕانێكی زۆر گرینگە لە ژیانی حیزبی ئێمەدا. بەڵام ئەم بووژانەوەیە ناتوانێ تەواوی ئەو ویست و داخوازییە كە دوكتور قاسملوو مەبەستیەتی، بێنێتە دی. بۆیە دوكتور قاسملوو درێژە بەو رەوتە دەدا، واتە رێكخستنەوەی حیزب لە باری فیكرییەوە، چوون ئەو سەردەمە كە دوكتور قاسملوو دەگەڕێتەوە بۆ حیزبی دێموكرات، توودەییەكان نفووزێكی زۆریان تێدایە و لە لایەكی دیكەوە لە ژێر چاوەدێری بیروباوەڕی ناسیۆنالیستیدایە. دوكتور قاسملوو بە دانانی بەرنامە و ئەساسنامە، بە دانانی كەلاسی كادر و بە دەركردنی رۆژنامەی كوردستان سەعی دەكات كە گیانێكی تازە بدات بە حیزبی دێموكراتی كوردستانی ئێران. لە درێژەی ئەو رەوتە، تەماشا دەكەین كە لە ساڵەكانی دوایی و لە كۆنگرەی سێهەم سوسیالیسم دێنێتە بەرباس، ئەو سوسیالیسم ـ دێموكراتیكە كە لە ساڵی 1362 پەسەندی كرد لە واقێعدا لە پرۆسەیەكدا تێپەڕی تا گەیشتە ئەو قۆناغە كە لە ساڵی 1362 پەسند كرا. ئەگەر ئاوڕێك بە ئەو ئامانجانەی كە حیزبی دێموكرات لە ساڵیانی پێشوو بوویەتی بدەینەوە، دەبینین لە كۆنگرەی سێهەم سوسیالیزم، سوسیالیزمی عادڵانەیە. لە كۆنگرەی چوارەمدا كە نفووزی توودەییەكان زۆرە، لەو كونگرەیەدا دەبێتە سوسیالیزمی عیلمی. بەڵام هەر لەم كۆنگرەیەدا دوكتور قاسملوو سەنەدێكی دیكە بە پەسەند دەگەیەنێت كە ئەو سەنەدە بۆ خۆی رێگە و شوێنێك دیاری دەكات لە بەین باوەڕی دێموكرات و نادێموكراتدا، ئەویش سیمای دێموكراتە.
دوكتور قاسملوو درێژە بەوە دەدا كە ئەم رەوتە بباتە پێش، لە كونگرەی پێنجەم سوسیالیزم دەكات بەپێی هەولومەرج و لە كۆتاییدا لە كۆنگرەی شەشەمدا دەبینین كە سوسیالیزم ـ دێموكرات وەكوو ئامانجی دواڕۆژی حیزب بە هاوكاری هاوڕێیانی لە حیزبی دێموكراتی ئێراندا دەچەسپێنێ. هێنانی سوسیالیزمی دێموكراتیك لە راستیدا مەرزبەندییەك بوو لە بەینی بیروباوەڕی دێموكراتیك و بیروباوەڕی نادێموكراتیكدا و ئەمە داهێنانێكە كە ئێستاش دوای ساڵهای ساڵ ئێمە شانازی پێوە دەكەین.

«گلاسنۆست و پرۆستۆرویكا» زۆر پاش ئەوەی كە ئێمە سوسیالیزمی دێموكراتیكمان بە پەسەند گەیاند، باسی لێ دەكرێت. كەوابوو داهێنان و نوێگەرایی یەكێك بوو لە خەسڵەتە تایبەتەكانی دوكتور قاسملوو.

مەسەلەیەكی دیكە كە باسی لێ دەكەین ئەوەیە كە دوكتور قاسملوو مرۆڤێكی رێئالیست بوو، واتە واقێعبین بوو. لە روانگەیەكی واقێعییەوە دەڕۆیشت بۆ نێو مەسەلەكان و سیاسەتی دەكرد. دوكتور قاسملوو لە «كوردستان و كورد»دا باسی ئەوە دەكات كە نەتەوەی كورد یەك نەتەوەیە و ئەگەر دابەش بووە بە مەیلی خۆی نەبووە و ئەگەر یەك بگرێتەوە ئەوە دابەشكردنی خاكی هیچ وڵاتێك نیە، بەڵكوو یەكگرتنەوەی نەتەوە و خاكێكی دابەشكراوە، بەڵام هەر لەو كاتەدا ئەوە كە پێی دەڵێن سیاسەت، هونەری مومكین، لە سیاسەتكردندا دوكتور قاسملوو پێ وایە بۆ سیاسەت دەبێ ئەو شتە بكەی كە مومكینە، واتە واقێعبینی لە سیاسەتدا. بۆیە دەبینین درووشمی حیزبی دێموكرات لەو دەورانەی دوكتور قاسملوو لە حاڵی حەیاتدا بوو، دێموكراسی بۆ ئێران و خودموختاری بۆ كوردستان بوو. بۆ گەیشتن بەم ئامانجە لە تاكتیكی جۆربەجۆر و لە شێوەگەلی جۆربەجۆر كەڵكی وەرگرت. هەروەك دەزانین بە هاتنەسەركاری كۆماری ئیسلامی، حیزبی دێموكراتی كوردستانی ئێران و لە سەرەوەی هەموویان، رێبەری شەهید دوكتور قاسملوو هەوڵێكی زۆریان دا كە بەڵكوو لە كوردستاندا شەڕ نەبێت و مەسەلەی كورد لە رێگەی وتووێژ و موزاكرەوە چارەسەر ببێت. چەندین جار هاتوچۆی تارانیان كرد، لە كوردستانیشدا لە كاتی حەرەكەتی هێزەكانی رێژیم بۆ سەر خەڵك و بۆ هێرشكردن بۆ كوردستان، حیزبی دێموكرات چەندین جار هەوڵی دا كە بە شێوەی مەدەنی و بە شێوەی هاتنەمەیدانی خەڵك، پێش بە شەڕ و تێكهەڵچوون لە نێوان خەڵك و هێزەكانی حیزبی دێموكرات و هیزەكانی رێژیمدا بگرن.

تەحەسۆنی پاوە یەكێك لەو شتانە بوو كە دەبێتە نوقتەی دەسپێكردنێك بۆ شەڕ لە كوردستاندا، تەحەسۆن لە كات و شوێنێكدا بوو كە 35 كیلومیتر لە شاری پاوە دوور بوو. كاتێك كە لەگەڵ دوكتور قاسملوو قسەمان دەكرد كە چ بكەین دەیگوت: بڕێكی دیكە بكشێنەوە. یان دەبینین كە كاتی هێرشی دووبارە بۆ كوردستان لە كامیاران بێشكە دێننە سەر جادە و ماڵ و مناڵ دێننە سەر جادە تا پێش لە تانكەكانی رێژیم بگرن تا شەڕ نەبێت و لە كوردستان شەڕ دەست پێ نەكات.

لە چەندین بواری دیكە دەتوانین ئاماژە بە خەباتی مەدەنی بكەین لەو سەردەمەدا. خەباتی مەدەنییەك كە ئێستا خەڵك پێی وایە ئێستا دەورانیەتی، حیزبی دێموكراتی كوردستانی ئێران و لە پێشەوەی هەموویان دوكتور قاسملوو33 ساڵ لەمەوپێش فیكری لێ كردۆتەوە و خەباتی بۆ كردووە. درووشمی ئێمە هەمیشە ئەوە بووە كە لە هەموو شێوەكانی خەبات كەڵك وەردەگرین. ئەگەر شێوەی خەباتی چەكدارییان بە سەر ئێمەدا سەپاند، لە راستیدا شێوە خەباتێك نەبوو كە ویستی ئێمە بێت. ئێمە هەموو هەوڵی خۆمان دا كە مەسەلەی كورد بە شێوەی وتووێژ و دیالۆگ چارەسەر بكەین، بەڵام بە داخەوە لایەنی بەرامبەری ئێمە كە هێزی بەرتەرە ئەو عەقڵییەتەی نەبوو و شەڕی بە سەر كوردستاندا سەپاند.

دوایین هەوڵەكانی دوكتور قاسملوو بۆ حەلكردنی مەسەلەی كورد بە شێوەی ئاشتیخوازانە ئەوە بوو كە لە سەفەرێكی ڤییەن لەگەڵ دیپلۆماتیكە تێرۆریستەكانی كۆماری ئیسلامی دانیشت و هەموو هیوای ئەوە بوو كە بەڵكوو بتوانێ مەسەلەی كورد لە رێگەی ئاشتیانە و موسالمەتئامیزەوە حەل بكات. بەڵام لێرەشدا دیپلۆماتە تێرۆریستەكانی كۆماری ئیسلامی بە كەڵكوەرگرتن لە ئیمكاناتی دەوڵەتی هاتن هێرشیان كردە سەر گیانی دوكتور قاسملوو و هاوڕێیانی، بەو هیوایە كە حیزبی دێموكرات بە لەبەینچوونی دوكتور قاسملوو لە بەین ببات.

ئەمە تێرۆریزم بە واتای دەوڵەتییەكەیەتی. دوكتور قاسملوو لە وتووێژ لەگەڵ عاتفە گورگین لە1365دا، باس لەوە دەكات كە لە وڵاتانی رۆژئاوایی تەنیا بۆمبدانانەوە و مرۆڤرفاندن یان بارمتەگرتن بە تێرۆریزم دەزانن. دوكتور قاسملوو دەڵێت كە تێرۆریزم بە واتای واقیعی خۆی بریتییە لە سەركوتی خەڵك، داگیركردنی خاك، بریتییە لە پشتیوانیكردن لە باندی تێرۆریستی، لە هەموو روانگەكانەوە ئەمانە تێرۆریست پێك دێنن و ئێمە مەحكوومی دەكەین. بەداخەوە دوكتور قاسملوو گیری ئەو تێرۆریزمە دەوڵەتییە كەوت كە باسی لێ دەكەین. ئەم تێرۆریزمە دەوڵەتییە زۆر ئاسان لە پایتەختێكی وڵاتی ئورووپایی كە خۆیان بە مەهدی عەداڵەت و تەمەدۆن دەزانن، بەداخەوە لە چوارچێوەی ساتوسەودای بازرگانی و لە چوارچێوەی ئەو ئیمكاناتە دەوڵەتییانە كە لە ئیختیاریاندا بوو توانییان زۆر بە ئاسانی لەسەر مێزی بەناو وتووێژدا دوكتور قاسملوو و شەهید عەبدوڵڵا قادری ئازەر و دوكتور فازڵ رەسووڵ تێرۆر بكەن و زۆر راحەت دەرباز بن. لێرەدایە كە پرسیارێكی گەورە كەوتە سەر عەداڵەت لە وڵاتی ئوتریش و بەتایبەتی دامودەزگای قەزایی ئەو وڵاتەدا.

دوای 23 ساڵ ئەگەر ئاوڕێك بدەینەوە، كۆماری ئیسلامی بەو ئامانجە كە هەوڵی بۆ دا و دوكتور قاسملووی شەهید كرد، نەك بە ئامانجەكەی نەگەیشتووە بەڵكوو هەنگاوێك و چەندین هەنگاویش بارودۆخی خراپتر و نالەبارتر بوو. هەر لە ماوەی رابردوودا كۆشكی دیكتاتۆرەكان یەك لە دوای یەك كەوتنە بەر رووخان. لە توونێسەوە دەەستی پێكرد و درێژەی كێشا بۆ میسر تا رێژیمەكانیان رووخا و ئێستاش رێژیمی بەشار ئەسەد لە ژێر زەبروزەنگی ئەو كەسانەیە كە بە دژی بەشار ئەسەد و دیكتاتۆری خەریكن خەبات دەكەن. لەم بەینەدا هەم لە ترسی ئەوەی كە ئەم خەباتە رۆژێ لە رۆژان بگاتە ئەو و هەم لە ترسی ئەوە كە هاوپەیمانێكی لەم ناوچە لە دەست بدات لە حەرەكەتەكانی سووریە دەخاڵەتی هەیە و بە قازانجی دەسەڵاتی دیكتاتۆری دەوری هەیە و زۆر هەوڵی داوە.

خۆشبەختانە بارودۆخی رێژیم ئێستا لە حاڵەتێكی زۆر نالەباردایە، واتە لە باری نێونەتەوەییەوە لە حاڵەتی ئینزوادایە و لە باری نێوخۆییەوە كەمترین نفووزی لە نێو خەڵكەكەدا نەماوە و لە باری ئابوورییەوە بارودۆخی وڵات بە رادەیەك شپرزە و خراپە كە نرخی دۆلار لە ماوەی كەمتر لە شەش مانگدا دوو بەرابەر چۆتە سەر، واتە دۆلار ئەگەر هەزار تمەن بوو ئێستا بۆتە دووهەزار تمەن و ئەم گرانییە قەیران و بارودۆخێكی لە ئێران پێك هێناوە كە رۆژبەرۆژ گرانی لە وڵاتدا زیاتر دەبێت. پێكهاتنی ئەم گرانییە قورساییەكەی ئەكەوێتە سەر شانی خەڵكی زەحمەتكێش و هەژار و قشری وەسەتی كۆمەڵگا.

بەرپرسیاریەتی ئەم بەرەوخراپبوونی وەزعی خەڵكە دەكەوێتە سەر شانی كۆماری ئیسلامی و كۆماری ئیسلامییە كە بەو سیاسەتە ماجەراجوویانە و هەڵەیانەی و بە سیاسەتی سەركوت و زەبروزەنگ بارودۆخێكی پێكهێناوە كە رێژیمی ئێران رۆژبەرۆژ خەریكە بەرەو تەریككەوتنەوە و ئینزوا و تەحریمی زیاتر دەچێت، ئەو بە سیاسەتی درێژەدان بە پیتاندنی ئۆرانیۆم بۆ چەكی ئەتۆمی، بارودۆخێكی پێكهێناوە كە رۆژ بەدوای رۆژ تەحریمەكان زیاتر دەبێت و لە داهاتوودا دەبێ چاوەڕوان بین كە وەزعی ژیانی خەڵك و بارودۆخی ئابووریی ئێران بەرەو خراپتربوون بچێت و ئەمە كاریگەری خۆی هەیە كە لە پیشدا ئاماژەم پێكرد كە بەرپرسیاریەتیی ئەم بارە گرانە دەكەوێتە سەر شانی كۆماری ئیسلامی، بۆیە كۆماری ئیسلامی لە دەورانێكدایە كە خەباتێكی بەربەرینی خەڵك رووبەڕووی بێتەوە، خەباتێك كە دوكتور قاسملوو ساڵها خەباتی بۆ دەكرد و هەوڵی بۆ دەدا كە ئەو رێژیمە، رێژیمێكی دیكتاتۆرە و دەبێ لا بچێت و رێژیمێكی دێموكراتیك جێی بگرێتەوە.

ئێمە هیوادارین بە تێكۆشانی خەڵك و بە یەكڕیزی و یەكگرتوویی و هەوڵی هەمەلایەنە بتوانین پێكەوە لەگەڵ هەموو خەڵكی ئێران و تێكۆشەرانی رێگای ئازادی ئەو رێژیمە بەچۆكدا بێنین و لە جێگەی ئەو رێژیمێكی دێموكراتیك بێتە سەركار و ئەو رێژیمە بتوانێ هەموو مافەكانی نەتەوەكانی ئێران و مافەكانی تاكی ئێرانی دابین بكات، بە هیوای ئەو رۆژە.

لێرەدا لە ساڵرۆژی شەهیدبوونی رێبەری مەزن دوكتور قاسملوو، یادێك دەكەمەوە لە رێڕەوێكی بەئەمەك و بەوەفای رێبازی دوكتور قاسملوو، رێڕەوێكی زۆر دڵسۆز، وەفادار، خەڵكی، خاكی، بەتوانا و تێكۆشەر بوو، كاك سەلامی عەزیزی.
كاك سەلامی عەزیزی لە 24پووشپەڕی ساڵی 1378 بە هۆی نەخۆشینێكەوە كۆچی دوایی كرد و ماڵئاوایی لە ئێمە و هاوسەنگەرانی كرد. كاك سەلام لە ساڵی 1325 لەدایك بوو و خوێندنی سەرەتایی تا كەلاسی پێنجەم لە گوندەكەیان، عەزیزكەند دەخوێنێت و پاشان بۆ درێژەدان بە خوێندن روو لە شار دەكات و لە شار درێژە بە خوێندنەكەی دەدات و شانبەشانی خوێندنەكەی وانەی ئایینیش دەخوێنێت تا دیپلۆمەكەی وەردەگرێت و پاش ئەوە دەبێتە مامۆستا و كاری مامۆستایەتی دەكات. لە ساڵی 1350 لە زانكۆی حقووق قەبووڵ دەبێت، دەڕوا بۆ دانشكەدەی حقووق، لەوێ دوای تەواوكردنی زانكۆ بۆ ورمێ دەگەڕێتەوە و لەوێ وەكوو قازی دادگوستەری دادەمەزرێ. پاش ماوەیەكی دیكە لە ساڵ 1356 و 57، كاك سەلامی عەزیزی دەبێتە سەرۆكی دادگای بۆكان.

لە ساڵی 1358 پەیوەست دەبێتە ریزەكانی حیزبی دێموكراتی كوردستانی ئێرانەوە، لە پەیوەستبوونی بە ریزی تێكۆشەرانی حیزبی دێموكراتی كوردستانی ئێران تاكوو رۆژی شەهیدبوونی، بەرپرسایەتی جۆراوجۆری هەبوو، لە ئەندامەتی هەیئەتیی ئیجرایی كومیتەی شارستانەوە تاكوو ئەندامی كۆمیسیۆنی كۆمەڵایەتی و بەرپرسی كومیتەی شارستانی سەردەشت و پاشان ئەندامەتی كومیتەی ناوەندی و دواتر ئەندامەتی دەفتەری سیاسی و بەرپرسی كۆمیسیۆنەكانی كۆمەڵایەتی و خەدەمات ــ ماڵی و و سیاسی ــ نیزامی دەورێكی زۆر گرینگی لە بەڕێوەبردنی كاری حیزبیدا گێڕاوە.

كاك سەلام مودیرێكی چاك بوو و بەتایبەت ئەو كەسانە كە لەگەڵی هاوكار بوون دەزانن كە چۆن مودیرێك بوو. كاك سەلام لەگەڵ ئەوەش كە مودیر و بەرپرسی ئورگانێك بوو، لەگەڵ هاوكارانی زۆر رەفیق و دۆست بوو، بەڵام هیچكات دۆستایەتی نەدەبوو بە هۆی ئەوە كە كەمترین عودول لە كارەكانی حیزبی بكات، بۆیە لە بەڕێوەبردنی بڕیاراتی حیزبی هەموو هەوڵی خۆی دەدا. بەكورتی دەبێ بڵێم، كاك سەلام مرۆڤێكی خۆشەویست لە نێو حیزبەكەی و لە نێو كۆمەلگا و مرۆڤێكی زانا بوو و لە دەربڕینی بۆچوونەكانی زۆر وریا و ئازا بوو، هەمیشە و بەردەوام دژی باوەڕی لادەرانە و باوەڕێك كە مافیان بە حیزبی دێموكراتەوە نەبوو و نفووزیان كردبوو لە نێو حیزبی دێموكرات، خەباتی دەكرد. كاك سەلام سەرمایەیەك بوو كە مخابن زۆر زوو لەدەست چوو، لە تەمەنی53 ساڵیدا كۆچی دوایی كرد. لێرەدا سڵاو دەنێرم بۆ شەهیدی نەمر و كۆچكردوو، شەهید كاك سەلام عەزیزی و بەڵێنی درێژەپێدانی رێبازی قاسملوو، بە قاسملوو و عەبدوڵڵای قادری ئازەر و كاك سەلامی عەزیزی و هەموو شەهیدانی رێگای رزگاری دەدەین و هیوادارین كە رۆژێك بێت كە نەتەوەكەمان لە پێناو هەوڵ و تێكۆشانی ئەوان و تێكۆشەرانی دیكەی حیزبی دێموكرات و هەموو نەتەوەی كورد بتوانێ بە ئامانج و ئاواتەكانی ئەوان كە دێموكراسی، مافی نەتەوەیی و عەداڵەتی كۆمەڵایەتی بوو بگات و بە هیوای ئەو رۆژە و زۆر سپاس.