کوردستان میدیا: هێرشی دەوڵەتی تورکیە بۆ سەر ڕۆژاوای کوردستان، هەڵوێستی جیاجیای لێکەوتووەتەوە و حیزبی دێموکراتیش لە هەمبەر داکۆکیکردن لە خاک و خەڵکی ئەم بەشەی کوردستان خۆی بە بەرپرسیار دەزانێت.
پاش هەڕەشەکانی دەوڵەتی تورکیە بۆ سەر ڕۆژاوای کوردستان، ڕۆژی چوارشەممە، ١٧ی ڕەزبەر ئەم هەڕەشانە بە کردەیی کرانەوە و تورکیە بە تۆپباران و هەروەها بۆمباران کردن لە ڕێگەی فڕۆکە شەڕکەرەکانیەوە هێرشی کردە سەر چەند شار و شوێن کە لە سنووری نێوان کوردستانی سووریە و تورکیەدا هەڵکەوتوون.
ئەم هێرشەی دەوڵەتی تورکیە بۆ سەر ڕۆژاوای کوردستان بووە هۆی گیانلەدەستدانی چەندین کەس لە خەڵکی سڤیل و هەر بۆیە کاردانەوەیەکی زۆری بەدوای خۆیدا هێنا. حیزبی دێموکراتی کوردستانی ئێرانیش هەڵوێستی خۆی بەرانبەر بەم هێرشانە دەربڕی.
"محەممەدنەزیف قادری"، جێگری دووهەمی لیپرسراوی گشتیی حیزبی دێموکرات و هەروەها بەرپرسی دەزگای پێوەندییەکانی حیزب، سەبارەت بە هەڵوێستی حیزبی دێموکرات و کاردانەوە بەرانبەر بەم هێرشانە ڕایگەیاند کە حیزبی دێموکرات بە هەستی بەرپرسایەتییەوە دەڕوانێتە پرسی داکۆکیکردن لە خاک و خەڵکی کوردستان.
ناوەندیی هاوکاریی حیزبەکانی کوردستانی ئێرانش لە ڕاگەیەنداروێکی هاوبەشدا، داوای ڕاگرتنی شەڕ و وازهێنان لە سیاسەتی هەڕەشە و هێرش و ئامانج گرتنی خاک و خەڵکی ڕۆژئاوای كوردستانی کرد و ڕایگەیاند کە بە بڕوای ئەوان پرسی كورد له هیچ كام له به‌شه‌كانی له ڕێگای توندوتیژی و هێرشی چه‌كداری و نیزامی چاره‌سه‌ر ناكرێت و بگره ڕێگه چاره‌سه‌ره سیاسییه‌كانیش كوێر ده‌كاته‌وه.
هەسەدە لەمبارەوە ڕایگەیاندووە کە لە یەكەم ڕۆژی هێرشەکانی تورکیە بۆ سەر کوردستانی ڕۆژئاوا، ٣ شەڕڤان و ٥ ھاووڵاتیی سڤیل شەھید كراون.
