کوردستان میدیا

ماڵپەڕی ناوەندیی حیزبی دێموکراتی کوردستانی ئێران

راسان، گوتار و پراکتیک

20:45 - 8 رەزبەر 2716

عیرفان رەهنموون

راسان، گەڕانەوە و بەرەوپێشچوون:


راسان، لە روویەکەوە، لێکچوونی لەگەڵ رۆنیسانس دا هەیە ، هەردووکیان پێیەکیان لە رابرددوو و ئەوی دی لە داهاتوو دایە . رۆنیسانس کە بەمانای دووبارە لەدایکبوونەوە و راسانیش کە بەمانای دووبارە هەستانەوەیە . واتا لە رۆنیسانس دا گەرانەوەیەک هەیە بۆ شکۆمەندیی ژیاری یوونان و رۆم و لەهەمان کات دا هەنگاوێکی بڵیندیشە بەرەو داهاتوو کە دتیمان بوە هۆی هاتنەئارای رۆشنگەری . هەربەو چەشنەش راسان گەڕانەوەیە بۆ رۆحی جەنگاوەرانەی سمکۆی شکاک و رۆحی بەرزی پێشەوای کوردان و پرنسیپەکانی قاسملوو و خەباتکاریی دوکتۆر سەعید و بڵێسەی باوەڕی شۆڕشە چەکدارییەکەی ٤٦- ٤٧ و جەنگاوەرانی خۆرەتاوی دەیەی هەشتای زایینی و لەخۆبردووی رێکخستنە چەکدارە نهێنییەکانی گوند و شارەکانی نیشتمان ئەو گەڕانەوەیە، تەنیا ئیلهامدەر و بزوێنەر و مانابەخشە، چونکا راسان زیاتر دەبێ تاڤگەیەک بێ بەرەو ئایەندە و مەشخەڵێ بێ رووناکیدەری تاریکیی ئەنگوستەچاوی ئەم سەدە پڕ لە جەورو ستەمە.

راسان، دەبێ بگەڕێتەوە بۆ شکۆی ماناداری رابردوو، بەلام هەرگیز نابێ لە رابردوودا بچەقێ. گەڕانەوی راسان بۆ رابردوو دەتوانێ دوو رەهەندی هەبێ، رەهەندی ئیلهام وەرگرتن و رەهەندی رەخنەی تیژ و بێ دوودڵی. تا ئێمە نەزانین کە بۆچ لە رابردوودا ئامانجەکانمان نەپێکاوە، گەرانەوە بۆی چ نابێ، جگە لە سەرمەست بوون پێی یان وەرز بوون لەو هەمووە داستانەی دووبارە بوونەوەی ریس و خوری کەواتە راسان کە بەمانای، رابوونی دووبارەیە، نابێ ئەو ئاکامانەی لێبکەوێتەوە کە لەسەرەتای شۆڕشی گەلانی ئێران و جووڵانەوەی چەکداری دەیەی هەشتای زایینی دا، بینیمان. ئەگەر وابێت ، ئیدی ناتوانین ناوی راسان ی لەسەردابنێین. هەر بۆیە ، پێویستە راسان بێئەملاوئەولا دەستەبەربوونی گشت مافەکانی نەتەوەی کورد لە رۆژهەڵاتی کوردستانی بەدواوە بێت.

پێشمەرجی هەر خەباتێک ئەوەیە کە خۆت بناسی و دوژمنەکەت بناسی. کە بەداخەوە لە هەردوو بواردا ، نەتەوەی کورد، پێناسە و شرۆڤەی هەڵەی بۆ ئەو دوو رەهەندە گرنگەی خەباتی رزگاریی نەتەوەیی کردوە. بەو مانایەی کە کورد نە لە تیۆری و نە لە پراکتیک دا خۆی بە نەتەوە نەزانیوە، هەر بۆیە خەباتی بۆ ئۆتۆنۆمی و فیدرالی و برایەتیا گەلان کردوە و ئەوەش راست لە گرێکوێرەی خۆبەکەمزانینەوە سەرچاوەی گرتوە.

کورد نەتەنیا خۆی نەناسیوە، بەڵکو دوژمنە کەیشی نەناسیوە، بۆیە هەمیشە دوژمنەکەی بە دیکتاتۆر لە قەڵەم داوە و لەم روانینەوە ئاشقی دیموکراسی بوە و تەنانەت خەباتی دێموکراسی بۆ گەلی سەردەستیش کردوە و پرسە سەرەکییەکەی خۆی واتە رزگاری نیشتیمانی لە بیرکردوە. لە قەڵەمدانی دوژمن بە دیکتاتۆر، بەو مانایەیە کە کێشە تاکەکەسە نەک سیستمێکی شۆڤینیستی کە بەگۆڕانی دیکتاتۆرەکان، تەنیا رووخسارەکان دەگۆڕێن، بەڵام سیستمە شۆڤینییەکە هەر لە جێگای خۆیەتی، وەک ئەوەی لە رووخانی رژیمی شا \' دا ، دیمان و بە فاشیزمی خومەینی دا دەرکەوت کە جیاوازییەکان رووکەشن و لە سنووری مەندیل و کەراوات تێناپەڕن.

ئێستا کە چەخماخەی راسان لێدراوە، دیاردەیەکی نویێ لێک‌نزیکبوونەوەی گوتاری رژیمی فاشیستیی مەزهەبیی تاران و ئۆپۆزسیۆنی بەناو سەراسەری و لەراستیدا فارسی گەلی باڵادەستدا بە روونی، دەبینرێ و ئۆپۆزسیۆن لە هەندێ بواریشدا، هەستیارترە بە بەرەوپێشچوونی بزاڤی کورد و یەکیەتیی خاکی ئێران و سەپاندنی زمانی فارسی و سەردەستیی نەتەوەی فارس بۆ ئەوان، هێڵی سوورە و هەرکات هەست بەمەترسی لەسەر ئەو خاڵە فاشیستییە ئاماژە پێکراوانە بکەن، زۆر بەسانایی لە تەنگانەدا، پارێزگاری لە رژیم دەکەن، چونکا لەو هێڵە ستراتیژییانەدا، هیچ جیاوازییەکیان لەگەڵ رژیم دا نیە.

ئەم هاوگوتارییەی فاشییزمی مەزهەبی و راست و چەپی ئۆپۆزسیۆنی نەتەوەی سەردەست ، نیشانەی ئەوەیە کە بەرووخانی فاشیزمی مەزهەبی لەتاران، ئیران نابێ بە شامی شەریف و تەنیا روخسارەکان گۆڕانیان بەسەردا دێت و نیوەرۆکی فاشیستی لە جێگای خۆی دەبێت.

خۆناسین و خۆناساندن

دەبێ لە پێشدا، خۆمان بناسین، بۆ ئەوەی بزانین کە چیمان دەوێ. ئێمە وەک کوردی رۆژهەڵات، پێویستە بە ئاشکرا و بێدوودڵی راگەیەنین کە ئێمەش لە ژێر ئەم ئاسمانە شینەدا، نەتەوەیەکین وەک هەموو نەتەوەکانی دیکە و هەموو ئەو مافانەی کە نەتەوە ئازادەکان هەیانە، بۆ ئێمەش رەوایە و نە لە هیچ نەتەوەیەک کەمترین و نە زێدەتر. دەبێ بە ئاشکرا راگەیەنین، هەر وەک چۆن کورد روسی نیە، هەر ئاواش ئێرانی نیە. کورد نەتەوەیەکی سەربەخۆیە و خاوەنی کولتوور و زمانی هاوبەش و سەرزەمینی دیاریکراوە و پێویستە تەنیا خۆی چارەنووسی خۆی دیاری بکات و ئەو چارەنووسە چ نیە، جگە لە بنیاتنانی دەسەڵاتێکی نەتەوەیی لە چوارچێوەی یەکەی جوگرافیای رۆژهەڵاتی کوردستان دا. تەنیا ئەوەندە بەس نیە کە لە دڵی خۆماندا، خۆمان بە نەتەوە بزانین و لە گفتوگۆ لەگەڵ نەتەوەی سەردەستدا، مافەکانمان تێکەڵ بە کۆکە بکەین . ئەوەی کە باسکرا گرنگییەکی گەلێ زۆری هەیە. چونکا کاتێ خودی کورد بە ئاشکرا دان بە مافەکانی دا نەنێت، چۆن دەکرێ ئەو چاوەروانییەی لە دۆست و نەیارەکانی هەبێ کە دان بە مافەکانیدا بنێن؟.

پرسەکە زۆر سادەترە لەوەی کورد لێی ترساوە، کورد دەیان ساڵ بۆ ئۆتۆنۆمی خەباتی کرد و یەکیەتیی خاکی داگیرکەری پاراست، کەچی نەتەنیا رژیمی داگیرکەر و فاشیزمی گەلی سەردەست، دانیان بە بچووکترین مافەکانی دا نەنا، بەڵکو جگە لە چەکی ئەتۆم، گشت چەکۆچۆڵە کۆن و نوێکانی لەسەر تاقی کرایەوە.

هەر بۆیە لە پراکتیکدا، داواکردنی سەربەخۆیی، هیچ لە دۆخەکە بە زیانی کورد ناگۆڕێ. بەڵام داواکردنی مافی دیاریکردنی چارەنووس، بۆ خودی بزاڤی کورد لە رووی سایکۆلۆژییەوە، زۆر گرنگە و هەڵگرتنی ئەو دروشمە، خەباتکارانی کورد ئەرکدار دەکات کە گوتار و پراکتیکی خۆیان لەگەڵ ئەو دروشمەدا هاوئاهەنگ بکەن و وەها دۆخێک، کورد لە پێگەیەکی پڕ مانا و پتەودا وێنا دەکات و لەهەرچشنە دانوسانێکدا، کورد لە پێگەیەکی سەنگینتر دا خۆی پیشان دەدا .

راسان و قۆناخەکانی

١- قۆناخی یەکەم: پێویستە تەرخان بکرێ بۆ خۆ ڕێکخستن و پەروەردە ‌و دروستکردنی بنکەی سەربازی لەشوێنەسەخت و شاخاوی دوورەکاندا و پەروەردەی چڕو هەر رۆژەی سیاسی و چەکداری بە بەشداری رێکخستنی نهێنی و گەڕانەوەیان بۆ ناوخۆی وڵات. هاوتەریب لەگەڵ ئەمەشدا، پێویستە جەنگاوەرەکان، پێوەندی بە دانیشتوانی دەورووبەری خۆیانەوە بکەن‌ و پشتیوانیان بۆ راسان مسۆگر بکەن. لەم قۆناخەدا، دەبێ جەخت لەسەر پەروەردەی سیاسی و نیزامی و تۆکمەکردنی جومگە و ستوونەکانی ڕێکخستن بێت و پێویستە خۆ لە بەرەنگاربوونەوەی چەکداری لەگەڵ دوژمندا بپارێزین و تەنیا لەکاتی هیرشی دوژمن دا، پێویستە بەرەنگاری بکرێت بە کەمترین تێچووەوە.

٢- لەقۆناخی دووهەمدا، شەڕی چەکداری دەستپێدەکات کە پێویستە بەشێوازی دانانی بۆسە و لێدە و ڕابکە” بەڕێوە بچێ و هاوتەریب لەگەڵ ئەوەشدا، پێویستە رێکخستنە چەکدارییە نهێنیەکانیش، گورز لە دوژمن بدەن، بەڵام دەبێ وشیار بن کە تەنیا لەکاتێکدا دەبێ، ئۆپەراسیۆن بکەن کە ئەگەری سەرکەوتن زۆر لەسەرەوە بێت و ئۆپەراسیۆنەکان، باشتر وایە لە شارە گەورەکان و دەوروبەری دا بێت نەک لە چیا.

لەم قۆناخەدا، پێویستە هەندێ لە گوندە دووردەستەکان، کۆنترۆڵ بکرێن و ئەرکی پاراستنیش بدرێ بە خەڵکی گوندەکان و پێشمەرگە تەنیا رۆڵی رێنوێنی کردن بگێڕێ و لەم قۆناخەدا دەبێ یاسای هەرێمی ئازاد کراو بنووسرێ و پیادە بکرێت.

٣- قۆناخی سێهەم، ئەم قۆناخە، قۆناخی خەباتی رزگاریی نیشتیمانی یە و لێرەوە، قۆناخی لێدە و هەڵێ، کۆتایی دێت و قۆناخی لێدە و رزگار بکە و بیپارێزە دەست پێدەکات و هەر دوو هێزی پێشمەرگەی شار و شاخ یەک دەگرنەوە و شەڕ دەچێتە ناو شارەکان. پاش رزگار بوونی بەشێکی بەرچاو لە خاکی نیشتمان، دەبێ دەسەڵاتی نەتەوەیی دامەزرێ و کابینەی شۆڕش، کۆمەڵگا بەڕێوە ببات.

لە کۆتاییدا جارێکی دیکە پێداگری دەکەم کە راسان بۆ ئەوەی بە مانای تەواوی وشە، راسان بێت. پێویستە گەڕانەوە بێ بۆ هێما نەتەوەییەکانی رابردوو و ئیلهام وەرگرین لێیان و خوێندنەوەی رابردوو بێت بەتێڕوانینێکی رەخنەگرانەی رادیکاڵەوە ، بەبێئەوەی پێوەندیی رۆحیمان لەگەڵ رابردوودا بپسێنین، پێویستە لە ئەستێرکی ئێستا و هاوکێشەکانی دا مەلە بکەین و بۆ ئەوەش، سەرەتا دەبێ خۆمان و دوژمن بناسین و لەو خۆد ئاگایییەوە، پردێک بۆ ئایەندە هەڵبەستین.

ناوەڕۆکی ئەم بابەتە را و تێبینیی نووسەرە و ماڵپەڕی کوردستان میدیا لێی بەرپرسیار نییە