کوردستان میدیا

ماڵپەڕی ناوەندیی حیزبی دێموکراتی کوردستانی ئێران

فەڕەنسا؛ ئاکسیۆنی ناڕەزایەتی دژی سەفەری ڕووحانی بۆ پاریس ڕێکدەخرێت

20:32 - 18 خەزەڵوەر 2715

کوردستان میدیا: کۆمیتەی بەڕێوەبەریی ناڕەزایەتی بە ٣٧ ساڵ تاوانی ڕێژیمی کۆماری ئیسلامی ئێران، بانگەوازێکی له‌هه‌مبه‌ر سەفەری حەسەن ڕووحانی بۆ پاریس بڵاو کردەوە.

بە پێی ڕاپۆرتی گەیشتوو بە ماڵپەڕی کوردستان میدیا، لەو بانگەوازەدا هاتووە: ئێمه‌ به‌شێك له‌ ڕێكخراوه‌ سیاسی و كۆمه‌ڵایه‌تیه‌كان و چالاكانی ئۆپۆزیسیۆن له‌ ده‌ره‌وه‌ی وڵات، بۆ ده‌ربڕینی ناڕه‌زایه‌تی به‌ سی و حه‌وت ساڵ كوشت و بڕ، سه‌ركوتی فاشیستیانه‌ و پێشلكردن و ده‌ستدرێژی كردنه‌ سه‌ر مافه‌كانی سه‌رجه‌م پێكهاته‌كانی ئێران و سه‌پاندنی زوڵم و زۆر و نادادوه‌ری به‌سه‌ر زوڵم لێكراوان، وه‌ك ژنان، كرێكاران، جیابیران، هونه‌رمه‌ندان، مامۆستایان، نووسه‌ران، ڕۆژنامه‌نووسان و خوێندكاران، به‌ بێ جیاوازی له‌ ڕه‌گه‌ز، نه‌ته‌وه‌، ئیتنیك، ئایین و بیروباوه‌ڕ، كۆبوونه‌وه‌یه‌كی ناڕەزایەتیمان وه‌ڕێخستووه‌.

دەقی ئەو بانگەوازە کە بە ماڵپەڕی کوردستان میدیا گەیشتووە، وەک خۆی لەخوارەوە هاتووە:

بانگه‌واز

كۆبوونه‌وه‌ی ناڕه‌زایه‌تی ده‌ربڕین به‌ ٣٧ ساڵ جینایەتکاریی ڕێژیمی كۆماری ئیسلامیی ئێران به‌ بۆنه‌ی سه‌ردانی ڕووحانی له‌ فه‌ڕەنس
ا

حه‌سه‌ن ڕووحانی سه‌رۆك كۆماری ڕژیمی ئیسلامیی ئێران، سه‌ره‌ڕای پێشێلكردنی ئاشكرا و به‌رده‌وامی مافی مرۆڤ، به‌شداری له‌ هه‌وڵه‌ تیرۆریستیه‌كان، هاوكاری له‌ گه‌ڵ دیكتاتۆرییه‌كانی ناوچه‌ و خوڵقاندنی قه‌یران له‌ ئاستی جیهانیدا، له‌ لایه‌ن كاربه‌ده‌ستانی وڵاتی فەڕەنسه‌وه‌ بانگهێشت كراوه‌ بۆ ئەوەی ده‌ست به‌ ئاسایی كردنه‌وه‌ی پێوه‌ندییه‌ سیاسی و ئابوورییه‌كانی له‌گه‌ڵ فەڕەنسه‌‌ و وڵاتانی دیكه‌ی ئورووپایی بكا و له‌و ڕێگه‌وه‌ له‌ هه‌وڵ دایه‌ ڕه‌وایی بۆ خۆی و ڕێژیمه‌كه‌ی وه‌ده‌ست بێنێ.

ئێمه‌ به‌شێك له‌ ڕێكخراوه‌ سیاسی و كۆمه‌ڵایه‌تییه‌كان و چالاكانی ئۆپۆزیسیۆن له‌ ده‌ره‌وه‌ی وڵات، بۆ ده‌ربڕینی ئێعتڕاز و ناڕه‌زایه‌تی به‌ سی و حه‌وت ساڵ كوشت و بڕ، سه‌ركوتی فاشیستیانه‌ و پێشلكردن و ده‌ستدرێژی كردنه‌ سه‌ر مافه‌كانی سه‌رجه‌م پێكهاته‌كانی ئێران و سه‌پاندنی زوڵم و زۆر و نادادوه‌ریی به‌ سه‌ر زوڵم لێكراوان، وه‌ك ژنان، كرێكاران، جیابیران، هونه‌رمه‌ندان، مامۆستایان، نووسه‌ران، ڕۆژنامه‌نووسان و خوێندكاران، به‌ بێ جیاوازی له‌ ڕه‌گه‌ز، نه‌ته‌وه‌، ئیتنیك، ئایین و بیروباوه‌ڕ، كۆبوونه‌وه‌یه‌كی ناڕەزایەتیمانن وه‌ڕێخستووه‌.

به‌و بۆنه‌وه‌ داوا له‌ هه‌موو ئێرانیانی خاوه‌ن بیر و ئازادیخواز‌ كه‌ بڕوایان به‌ ڕووخان و نه‌مانی ڕێژیمی كۆماری ئیسلامیی ئێران له‌ ته‌واوه‌تیی خۆیدا هه‌یه‌ و خوازیاری دامه‌زراندنی ئازادی، دێموكراسی، سه‌ربه‌خۆیی، به‌رابه‌ری، یه‌كسانی و دادپەروەریی كۆمه‌ڵایه‌تی، جیایی دین له‌ سیاسه‌ت (لائیسیته-سێکۆلاریسم)، له‌به‌رچاو گرتنی سه‌رجه‌م مافه‌كانی نه‌ته‌وه‌كانی نیشته‌جێی ئێرانی فره‌نه‌ته‌وه‌ به‌ پێی ستاندارده‌ نێونه‌ته‌وه‌ییه‌كان، هه‌ڵوه‌شانه‌وه‌ی حوكمی ئێعدام و له‌ سێداره‌دان، نه‌مان و لابردنی ئه‌شكه‌نجه، هه‌ڵوه‌شانه‌وه‌ی هه‌ر چه‌شنه‌ ڕاوەدوونان و گوشار له‌ سه‌ر چالاكانی سیاسی، نه‌ته‌وه‌یی، فه‌رهه‌نگی و هه‌روه‌ها یه‌كسانیی مافەکانی ژن و پیاو، له‌به‌رچاوگرتنی ئازادییه‌ سیاسی و مه‌ده‌نیه‌كانی هێمابۆكراو له‌ جاڕنامه‌ی جیهانیی مافی مرۆڤ و یه‌ك له‌وان مافی دیاریكردنی چاره‌نووس بۆ نه‌ته‌وه‌كان هه‌یه‌، بانگهێشت ده‌كه‌ین كه‌ به‌ به‌شداریی چالاكانه‌ی خۆیان په‌یوه‌ست به‌و كۆبوونه‌وه‌ ناڕه‌زایه‌تییه‌ ببن.

خۆپێشاندانی سه‌ره‌كی ڕۆژی یه‌كشه‌ممه‌ ، ١٥ ی نووامبری ٢٠١٥
پاریس ، مه‌یدانیRépublique، له‌ ساعه‌ت ١٣ تا ١٥

ئه‌كسیۆنه‌كانی دواتر :
دووشه‌ممه‌ ١٦ی نووامبر له‌ ساعه‌ت ٩ ی به‌یانی تا ١٧ی ئێواره‌، مه‌یدانیFontenoyپاریسی حه‌وت، نزیك یونسكۆ
سێشه‌ممه‌ ١٧ی نووامبر له‌ ساعه‌ت ١٥ تا ١٧ له‌ مه‌یدانیInvalides، پاریسی حه‌وت

كۆمیته‌ی به‌ڕێوه‌به‌ریی كۆبوونه‌وه‌ی ناڕه‌زایه‌تی به‌ ٣٧ ساڵ جینایه‌تی كۆماری ئیسلامیی ئێران

پاریس