کوردستان میدیا: لێپرسراوی گشتیی حیزبی دێموکراتی کوردستانی ئێران لە دووتوێی پەیامێکدا، بە بۆنەی جێژنی پیرۆزی ڕەمەزانەوە، پیرۆزبایی لە موسوڵمانانی جیهان و نەتەوەی کورد کرد.
دەقی پەیامەکەیان بەم چەشنەیە:
جێژنی ڕەمەزانتان پیرۆز بێت.
بە بۆنەی جێژنی پیرۆزی ڕەمەزانەوە، پیرۆزبایی گەرمی خۆم پێشکەش بە هەموو موسوڵمانانی جیهان و نەتەوەی کورد، بەتایبەت گەلی کورد لە ڕۆژهەڵاتی کوردستان دەکەم.
لەم ڕۆژانەدا، یادی بنەماڵە سەربەرزەکانی شەهیدەکانمان و ئەو بنەماڵانەی کە ئازیزێکی تێکۆشەریان لە پێناو ئازادیی کوردستان و کورد لە ژێردەستی، لە زیندانەکانی ڕێژیمدایە، زیاتر لە هەموو کاتێک بەرجەستە دەبێتەوە. سڵاو و پیرۆزبایی تایبەتیم بۆ ئەو خۆشەویستانەیە.
چاوەڕوانیمان ئەوەیە، خەڵکی تێکۆشەر و نیشتمانپەروەری کوردستانیش وەک ئەمەگناسییەک بۆ ئەو بنەماڵانە و زیندانییە سیاسییەکان، زیاتر لە ڕابردوو هەستی هاودەردی و هاوپشتیوانی بە هەر شێوەیەک بۆیان دەگونجێت، دەرببڕن.
هەموو ڕۆژێکی ژیانتان پڕ بێت لە خۆشی.
حیزبی دێموکراتی کوردستانی ئێران
لێپرسراوی گشتی
مستەفا هیجری
١٣ی جۆزەردانی ١٣٩٨ی هەتاوی
٣ی ژووەنی ٢٠١٩ی زایینی
