مەلا برایم مەجیدپوور
"ڕاسان" دەستەواژەیەکە کە حیزبی دێموکراتی کوردستانی ئیران بـۆ نوێکردنەوەی خەباتی ڕزگاریخوازانە و ڕەوای گەلەکەمان لە ڕۆژهەڵاتی کوردستان بەکاری هێناوە، ئێستا بـووەتە نـاو بـۆ ئـەو قونـاغە نـوێیەی بـەرەنگاری. دیـارە ڕاسان بەیەکەوە گرێدانی خەباتی شاخ و شارە بـە شێوە گـونجاوەکان. بـە پـێچەوانەی ئەوەی کۆماری ئیسلامی بـەشە چەکدارییەکەی نـاو دەنێت شەڕ و دەیکاتە بیانوو بۆ سەرکوتی ئەو گەلە بەشخوراوە و بە هێزی نیزامیی پۆشتە و تەیار هەڵدەکوتنە سەر کوردان. هەندێکیش بە قەڵەم لەسەر شەڕی چەکداری دەنووسن و ناو و ناتۆری بـۆ دروست دەکەن و دەشبێتە بـەڵگە بـۆ هێرش و پەلاماری دڕندانەی دوژمن. بە ڕاشکاوی دەڵێم: "تا ئێستاش کورد شەڕی بە کەس نەفرۆشتووە، بە چەک بەرگری لە مان و مەوجوودییەتی کردووە". هیچ کەسێکی دەروون پاک و تێگەیشتوو، بەرگریکردن بە شەڕ دانانێت. کورد گەلێکە زێد و مافی داگیر کراوە، فەرهەنگ و کولتووری شێوێندراوە و لە مەترسیی گوڕاندایە و پشتگوێ خراوە، کەسایەتی و کەرامەتی بریندار کراوە، ماڵی بەتاڵان براوە و ئاوایی و شاری ویران و خاپوور کراوە. هەمووشمان دیتوومانە، فتوای جیهاد و ئەنفال، کۆمەڵکوژی و قەڵاچۆ لە هەموو بەشەکانی کوردستانی بۆی دەرکراوە.
جێگای خۆشحاڵییە خەباتەکەمان لە چوارچێوە بەرتەسکەکەی جاران چووەتە دەرەوە و لە نێوخۆ و دەرەوە پەلوپۆی هاویشتووە و سەری هەڵداوە. بە دنیای دەسەڵمێنێت کە پڕوپاگەندەی دوژمنان کە دەڵێن: "لە ڕۆژهەڵاتی کوردستان شۆڕشێک نەماوە"، درۆیە و بڕوانن چۆن ڕاسان دوژمنی تووشی سەرەگێژە کردووە، ڕاسانی تاراوگەش بە هەزاران کەس بـۆ داشداری لە شۆڕش و خوێنی شەهیدان چۆن خرۆشاوە، چۆن دروشمی قاسملوو لە ڕێبازیدا زیندووە شەقامەکانی بـروکسێل و یەکیەتیی ئورووپای وەلەرزە خستووە.
ڕاسانی شاخ و شار لەگەڵ تاراوگە دەستیان داوەتە دەستی یەک و ڕاست نـاوەرۆکی ئەو شێعرەی مامۆستا هەژار کە دەڵێت: "دەست لەناو دەست نێن بە ڕا و تەگبیر یەکتان بە قەڵەم یەکتان بە شمشیر و ئەو کاتە دەگەڵ کاکت دوو بە دوو بکەن هەقی لەدەستچوو"، نیشانەکەی پێکاوە. ڕاسانی شار و شاخ و تاراوگە بوونەتە ئەڵقەی زنجیرێکی پۆڵایین کە سەرئەنجام دوژمنی داگیرکەری پێ دەبەستنەوە. ئەو پێکەوە گرێدانە، ئەو تۆفانە خرۆشانە، پەیامی مەرگی داگیرکەرانە. بە دنیا دەڵێت: "بە پێچەوانەی پڕوپاگەندەی دوژمنان خەبات تـا ڕزگاریی یـەکجاری بەردەوامە". ئەوڕۆ قەڵەم و زمان و چەک یەکیان گرتووە بە دنیا دەڵێن: "با کەس نەڵێت کورد مردووە، قەت نامرێت، هەر زیندووە".
ڕاسانی تاراوگە بوێرانە دەڵێت: "بکوژانی قاسملوو، کاک عەبدوڵڵا، بـۆ گەلی کورد نـاسراون. یـارمەتیدەرانی جینایەتکارەکانیش لەوان ناسراوترن، ئەو جەماوەرەی ئـەوڕۆ لـە بـروکسێل مەوجان دەدات، بەشێکە لە تۆفانی ڕق و قینی گەلەکەمان کە سەرئەنجام ڕۆژێک دوژمنانی داگیرکەر ڕادەماڵێت و تۆڵەی خوێنی شەهیدانیان لێدەستێنێت و ئامانجی ئـەو خوێنە بـەنـاهەق ڕژاوانـە وەدی دێنێت". بـە دنیاشی دەسەلمێنێت کە خەبـات و ڕاسانەکەمان ڕەوایە، هەتا وەدیهاتنی ئازادیی گەل و ڕزگاریی وڵات بەردەوامە و دوایی نایەت. ئەو نەعرەتە شێرانەی کچان و کوڕان و ژنان و پیاوانی ڕێبوار و دۆست و ئاشنای قاسملوو دەبێ یەکیەتیی ئـورووپای تێگەیاندبێت. هاوڕێـ و هـاوخەباتانی قاسملوو فەرامۆشیان نەکردووە و ئەو خوێنە ئاڵەی ڕێبەران و سەرجەم شەهیدەکانمان نەک هەر کوردستان بەڵکوو بەشێک لە ئورووپاشی ڕەنگاندووە، هەر قەترەیەکیان بووەتە ڕووبارێک کە هەزاران جۆ و جۆباری لێکەوتووەتەوە. ئەوەی جێگای سەرنج و تێڕامانە، ئەوەیە کە وڵاتێکی ئەندامی یەکیەتیی ئورەوپای کانگای ئـازادی ـو دێموکراسی و مافی مرۆڤ، سات و سەودای بـە خوێنی ئەو شەهیدانە کردووە و بۆتە دەسکیس بۆ جینایەتکاران. بێدەنگیی ئورووپاش بە مانای ڕازی بوونە و لە ئاکلامدا بە شریکە تاوان لێکدەدرێتەوە.
٩ ی یولی ڕۆحییەی منی پێشمەرگەی ٧٩ ساڵەی جارێکی تر ئاوپـرژێن و زیندوو و بەهێزتر کردەوە. زیاتر لە ٢٤ کاتژمێر لە ڕێگا و ڕاوەستان و هاتـوچۆدابووم، هەستم بە ماندوویی نەکرد، پیری خەریک بوو دارە دارەم پێ بکات، بـەڵام بەدیتنی ئەو دیمەنە و بیستنی ئەو هەست و سۆزە ، گوڕ و تینم هاتەوە بـەر و پـێم گرتەوە.
لێرەدا دەمەوێت ئەوەش بڵێم: "ڕاسانی تاراوگە وڵامێکی بەجێ بوو بۆ ئەوانەی ئاگاهانە یان نەزانانە، بوون لە تاراوگە بە عەیب بزانن و تۆپ و تەشەریان لێبدەن وەک دەوترێت لە تەڕی دەخۆن و لە ویشکی دەنوون، زۆربەی بەشدارانی ئەو ڕاسانە جگە لە هێندێک کەسایەتی دەرەوەیی و هێندێک لاوی تازەکار هەر هەموویان ئەوانە بوون کە جێگە خەویان ئەشکەوت ـو بـن بەرد و ڕەوەزان بـوو. شەوانە هەمو زیندەوەرێک دەچێتەوە هێلانەکەی خۆی، ئەوان بەکڕێوە و با و بۆران خەریکی کاروباری سیاسی و نیزامیی خۆیان بـوون. بینیتان فەرماندەی قارەمان و ڕێبواری ڕێگای شەهیدان هاوڕێ مەلا "حەسەنی شێوەسەڵی" چۆن بە بێ چاو، بێ دەست، بوێرانە لە سەر سەکۆی قسەکردن ڕوو بە گەل و ئورووپا پەیمان و بەڵێنیی لەگەڵ شەهیدان نوێ دەکردەوە؟ چۆن کاک "ئەحمەدی شێربەگی" بە دەنگە دوژمن تۆقێنەکەی دەنگی ئێرە دەنگی کوردستانەی زیندوو دەکردەوە. بوونی زۆرێک لە کەمئەندامان و پیرە پێشمەرگانە لەو خ نواندنەدا بەڵگەی زیندووی گیانبازیی قوربانیدانی ئەوان بوو".
بەو بەڕێزانە دەڵێم: "ئەو شێوە بیر کردنەوە و لێدوانانە لە کوێوە بێن و هەر کەس بیانڵێت تەنیا بە قازانجی دوژمنانە و تەفرەقە و جیاکردنەوەی خۆمان لە خۆمانە. سروشتی شۆڕش ئاوایە هێندێک خۆی لێنادەن، هێندێک خۆی لێی لادەدەن، هێندێک ماندوو دەبن و ڕادەوەستن، هێندێک دەوەستن، هێندێک پیر دەبن و لە گوڕ دەکەون. هێندێک کەمئەندامن پـێویستیان بـە پشوودان و پـێڕاگەیشتن هەیـە. هێندێکیش جەوان و بـەگوڕ و تینن، بـوێـرانە دێن جێگای ئەوانە پڕ دەکەنەوە. ئـەوەی گرینگە و دەبێ بـە تەواوی لە بەرچاو بگیرێ ئەوەیە: خەیانەت نەکردن و خۆ نەفرۆشتن، زۆرمان هەن نە شاخیان دیوە و نە چەکیان هەڵگرتووە، بەڵام لەوانیان کەمتر خزمەت نەکردووە. ئەو دایک و خوشکانەی ڕۆڵەیان پێگەیاندوەە و بوونەتە پێشمەرگە، ئەو شیرە ژنانەی شەو و نیوەشەو لـە خزمەتی پێشمەرگەدا بوون، پێشمەرگەی نادیارن".
بەکورتی گەلەکەمان جگە لە جاش و سیخوڕ و خۆفرۆشەکان، هەرکێ بن و لە هەر کوێ بن، بە قەدەر خۆیان لە خەباتدا بـە شێوەی خۆیـان فیداکارییان کردووە. من چل پێش پێشمەرگایەتی و نزیک بە چلیش بـە پـێشمەرگایەتی دوور و نزیک لە نێو ئەو گەلەدا ژیاوم، ئیمانم پێهێناون، هۆی سەرکەوتنیشمان تەنیا پشتگیری و یارمەتیی ئەوانە. هیوادارم لاسایی ڕێژیمی ئاخوندی نەکەینەوە، لە خۆمان خودی و غەیرەخودی دروست نەکەین. وەک لە پێشەوە وتم جگە لە جاش و سێخوڕ و خۆفرۆش، ئەوانی تر هەموویان جێگای ڕێزن و شۆڕشیش هیوای پێیانە و لە خۆمانن.
ناوەڕۆکی ئەم بابەتە را و تێبینیی نووسەرە و ماڵپەڕی کوردستان میدیا لێی بەرپرسیار نییە.
