کوردستان میدیا

ماڵپەڕی ناوەندیی حیزبی دێموکراتی کوردستانی ئێران

ڕاگەیەندراوی ناوەندی هاوکاریی حیزبەکانی کوردستانی ئێران، بە نیسبەت تۆپبارانەکانی سپای تێرۆریستی پاسداران و شەهیدبوونی دوو پێشمەرگەی کوردستان

13:16 - 27 پووشپەڕ 2718

کوردستان میدیا: ناوەندی هاوكاریی حیزبەكانی كوردستانی ئێران، لە ڕاگەیاندراوێکدا وێڕای مەحکوومکردنی تۆپبارانکردنی سنوورەكانی كوردستان، لە لایەن سپای پاسدارانەوە، سەرەخۆشی لە بنەماڵەی شەهیدانی تازەی نەتەوەکەمان دەکات.

دەقی ڕاگەیەندراوەکە:

ڕۆژی سێشەممە ڕێكەوتی ٢٦ی پووشپەڕی ١٣٩٧ی هەتاوی، جارێكی تر ڕێژیمی جەنایەتكاری ئێران، تۆپخانەكانی وەگەڕ خست و ناوچە سنوورییەكانی حاجی عۆمەران و بەربەزینی هەرێمی كوردستانی تۆپباران كرد؛ بەداخەوە لەو هێرشە نامرۆڤانەیەدا وێڕای زیانگەیاندن بە سروشتی ئەو ناوچانە دوو پێشمەرگەی حیزبی دێموكراتی كوردستانی ئێران شەهید بوون.

قەیرانە نێونەتەوەیی و ناوچەیییەكان، بازنەی گوشارەكانیان لەسەر نیزامی دیكتاتۆریی ئێران تەسكتر كردووەتەوە و سیاسەتی كورتكردنەوەی دەستی تێرۆریستپەروەر و ئاژاوەگێڕانەی  كۆماری ئیسلامی لە وڵاتان  پەیڕەو دەكرێ‌ و نەك تەنیا لە یەمەن و سووریه ڕێژیم تووشی شكستی گەورە هاتووە، بەڵكوو لە وڵاتی عێراقیش سەرەڕای هەموو سەرمایەدانانەكانی، پێگەی لەرزۆک بووە و  هەر لە ئێستەدا دروشمی خۆپیشاندەرانی ناڕازی لە باشووری عێراق، رووی لە  دەسەڵاتی كۆماری ئیسلامییە و داوای چوونەدەرەوەی ئەو ڕێژیمە و نەمانی هەیمەنەی دەكەن.

لەوەها حاڵەتێكدا كە خەڵكی وڵاتی عێراق، داوای نەمانی كۆماری ئیسلامی لەو وڵاتە دەكەن و ئەو پەیامە، دەسەڵاتدارانی تارانی نیگەران كردووە و هاوكات بە بیانووی بوونی هێزی پێشمەرگەی حیزبەكانی كوردستانی ئێران لەو سنوورە،  ڕێژیمی ئاخوندی بۆ كەمكردنەوەی گوشارەكان لەسەر خۆی و هاوكات ناردنی پەیامی  هەڕەشەئامێز بۆ هەرێمی كوردستان، دەستی داوەتەوە خولێكی نوێ لە تۆپباران و بەزاندنی یاسا نێونەتەوەیییەكان و پێشێلكردنی سەروەریی  سیاسیی وڵاتی عێراق و بەتایبەتی هەرێمی كوردستان. 

ناوەندی هاوكاریی حیزبەكانی كوردستانی ئێران، وێڕای ناردنی پرسە و سەرەخۆشی بۆ خەڵكی كوردستان بە بۆنەی شەهیدبوونی دوو پێشمەرگەی قارەمانی كوردستان، تۆپبارانی كۆماری ئیسلامی بە توندی مەحكووم دەكات و داوا لە ڕێكخراوی نەتەوە یەكگرتووەكان و خەڵكی بەشەرەفی هەرێمی كوردستان دەكات، کە لە هەمبەر ئەو یاساشكێنی و سنووربەزاندنانەی ڕێژیمی جەنایەتكاری ئێران كە بووەتە هۆی نائەمنی و شێوانی ژیانی خەڵكی ئەو دەڤەرە،  بێدەنگ نەبن و پێش بە درێژەكێشانی ئەو ڕەوشە مەترسیدارە بگرن.

ناوەندی هاوكاریی حیزبەكانی كوردستانی  ئێران

١٧ی جولای ٢٠١٨ی زایینی