کوردستان میدیا

ماڵپەڕی ناوەندیی حیزبی دێموکراتی کوردستانی ئێران

دەقی وتەکانی حەسەن شەرەفی لە رێوڕەسمی ٢٦ی خەرمانان لە بنکەی دەفتەری سیاسیی حیزبی دێموکرات

19:38 - 1 رەزبەر 2714

کوردستان میدیا: حەسەن شەرەفی، جێگری سکرتێری گشتیی حیزبی دێموکراتی کوردستانی ئێران لە رێوڕەسمی بەرزڕاگرتنی یادی شەهیدانی میکۆنووس چەند وتەیەکی پێشکەش کرد.

دەقی وتەکانی بەم چەشنەیە:

میوانانی ئازیز!
هاوڕێیانی بەڕێز!
خوشك و برایانی خۆشەویست!

ئەمڕۆ ٢٦ی خەرمانانی ١٣٩٣ی هەتاوی، ٢٢ ساڵ بە سەر ئەو رووداوە دڵتەزێنەدا تێدەپەڕێ‌ كە لەودا و لە ساڵی ١٣٧١ی هەتاویدا هاوڕێ‌ و مامۆستای گەورەمان كاك دوکتور سادقی شەرەفكەندی وێڕای كاك فەتاحی عەبدولی، كاك هومایۆنی ئەردەڵان و كاك نووری دێهكوردی دۆستی نزیكی حیزب لە پیلانێكی تیرۆریستی كۆماری ئیسلامیدا لە بێرلین و لە كاتێكدا كە بۆ سەفەرێكی بەشداریی لە كۆبوونەوەی ئەنترناسیۆنال سوسیالیستدا چووبوونە بێرلین و دوای ئەوەش قەراری دانیشتنیان لەگەڵ پۆلێك لە كەسایەتییەكانی ئۆپۆزیسیۆنی ئێرانی هەبوو و بۆ تاوتوێكردنی وەزعی ئێران و رێكخستنی ئۆپۆزیسیۆنی ئێران لە رستورانێكی ئەو شارەدا بە ناوی میكۆنۆس كەوتنە بەر هێرشی تیرۆریستەكانی سەر بە كۆماری ئیسلامیی ئێران و گیانیان لێ ئەستێندرا. ئەو زامە بە ئێش و بە ژانە لە هەلومەرجێكدا كەوتە سەر جەستەی بزووتنەوەی كورد لە كوردستانی ئێران و حیزبی دێموكراتی كوردستانی ئێران كە ئێستا برینی سەر جەستەی حیزبەكەمان و بزووتنەوەكەمان بە تیرۆری دوکتور قاسملوو هەر بە سوێ‌ بوو بۆیە جارێكی دیكە تەمی ئەو غەمە بە سەر هەموو رۆڵەكانی نەتەوەی كورددا تەنانەت لە هەموو پارچەكاندا باڵی كێشا، بەڵام رەوتی رووداوەكان و لێهاتوویی و بە بڕشتی سكرتێری پێشووتری حیزبەكەمان كاك دوکتور سادقی شەرەفكەندی ئەو دەرەتانەی نەدا كە كۆماری ئیسلامی بە مەبەستە ئەسڵییەكەی بگات.
دوکتور سادقی شەرەفكەندی لە ٢١ی بەفرانباری ساڵی ١٣١٦ی هەتاوی لە ئاوایی تەرەغە لە ناوچەی بۆكان لە دایك بوو، تەمەنی زۆر منداڵ بوو كە لە بوونی باب بێبەش بوو سەرپەرستییەكەی كەوتە دەست براگەورەكەی مامۆستا هەژار، شاعیری ناوداری كورد لێڕەڕا دەبێ‌ بزانین كە كەسێك شاعیرێكی نەتەوەیی سەرپەرستی بكا و پێی بگەیەنێ‌ دەبێ‌ ئەو منداڵە یا مێرمنداڵە كە گەشە دەكا و پێدەگا لە نێو كۆمەڵگادا خاوەنی چ بیروباوەڕێك دەبێ‌. خوێندنی سەرەتایی و ناوەندی لە شارەكانی بۆكان و مەهاباد و دوا ساڵی ناوەندیی لە تەورێز تەواو كرد لە هەموو ئەو ماوەیەدا كە خوێندنی لەو شارانە تەواو كرد یا لەو شارانە درێژە دا بۆ هەموو لایەك دەركەوت كە خاوەنی چ ئیستعداد و زەكاوەت و هۆشێكی تایبەتییە و لە هەموو دەورانی خوێندنیدا یەكەم بووە یا لە ریزی دەگمەنەكان بووە.

دوکتور شەرەفکەندی بۆ درێژەی خوێندن چووە تاران و لە دانشسەرای عالی درێژەی بە خوێندن دا و لە رشتەی شیمی‌دا لیسانسی وەرگرت لەوێشدا ئەو زەكاوەتەی خۆی نیشاندا بە جورێك كە یەكەمی ئەم رشتەیە لە شیمی بوو لە دانشسەرای عالی هەر بۆیەش بورسێكی پێ‌ درا كە لە دەرەوەی وڵات بتوانێ‌ درێژە بە خوێندنەكەی بدا، بەڵام ئیجازەی كەڵك وەرگرتن لەو بورسەیان لە سەرەتادا پێ‌ نەدا بۆیە گەڕاوە شارەكانی كوردستان لە مەهاباد زیاتر و لە ورمێ‌ كەمتر، لە دەبیرستانەكان دەرسی دەگوتەوە. لەو ماوەیەشدا خۆی و ژمارەیەك لە دەبیرەكانی هاوبیری، هاوفكری كەوتنە ئەوەی كە یەكگرتنێكی رانەگەێندراو پێك بێنن بۆ ئەوەی كە ئەوەندە هەوڵ لەگەڵ خوێندكارانی كورد و قوتابیانی كورد بدەن كە رێژەیان لە دانشگاكانی ئێراندا بە شێوەیەكی بەرچاو بچێتە سەرێ و هەر واش بوو ئەوەندە بەرچاو بوو كە لە چاوی ساواك ون نەبوو بۆیە هەم خۆی و هەم هاوبیرەكانی بۆ شارەكانی ناوەندی ئێران دوورخرانەوە، ئەو بورسیەی كە دەبوو ئەو كەڵكی لێوەربگرێ و نەیدرایە، یەكی دیكە بوو بە خاوەنی كە پاش تەواوكردنی دەرسەكەی گەراوە تاران و بەرپرسایەتیكی بەرزی لە وەرزارەتی ئامووزشی عالیدا پێ درا بەڵام هەمیشە ویژدانی نارەحەت بوو لەوەیكە حەقێكی زەوت كردووە و حەقێكی لە كەسێكی دیكەی شایستەتر لە خۆی پێشێل كردووە بۆیە زۆری هەوڵدا و تێكۆشا كە ئەو بورسە زیندوو بكاتەوە و كردیەوە و دوکتور سادق شەرەفكەندی بە كەڵك وەرگرتن لەو بورسە چووە فەرانسە و لەوێ دوکتورای بە پلەیەكی بەرز لە دانشگای پاریس وەرگرت لەوێ بوو كەلە ساڵی ١٣٥٢دا لە نزیكەوە لەگەڵ دوکتور قاسملوو ئاشنا بوو كە دەڵێم لە نزیكەوە لە بەر ئەوەی دووراودوور یەكتر ناسین هەر هەبوو بەڵام لەوێ لە نزیكەوە لەگەڵی ئاشنا دەبێ و هەر لەوێش لە سەر داوای دوکتور قاسملوو ئەندامەتی حیزبی دێمۆكراتی كوردستانی ئێرانی قەبووڵ كردووە و ئەو شانازیەی پێ بڕاوە. ساڵی ١٣٥٢ كە دوکتور سادق شەرەفكەندی ئەندامەتی حیزبی دێموكراتی كوردستانی ئێران قەبووڵ دەكا ئەو كات لەگەڵ ئەوەی كەسایەتێكی ئازادی و عەداڵەت خواز و بە نیشتمان پەروەرێكی كورد ناسرابوو ئەندامی هیچ حیزبێكی دیكە نەبوو، بۆیە لەوكاتەوە تا دوا هەناسەی ئەندامی ئەو حیزبە مایەوە و بە رێبازی ئەو حیزبە و بە مامۆستا و هاوڕێكەی كاك دوکتور قاسملوو وەفادارمایەوە. پاش وەرگرتنی دوکتورا گەڕاوە تاران و لەوێ‌ وەك ئۆستاد ئەو ئەركەی كەلە حیزبدا پێی ئەسپێردرابوو بە نهێنی كاری تەشكیلاتی لە نێو خوێندكارانی كورددا بكرێت و پێوەندی لەگەڵ شارەزایان و رووناكبیرانی سیاسی فاسیلە گرتوو لە رێژیمی شا بگرێ‌ ئەركی خۆی بە تەواوی بەجێ‌ گەیاند پاش شۆڕشی گەلانی ئێران و ئەو هەلومەرجەی كەلە كوردستان هاتە پێش بەڕێوەبەرایەتی حیزب داوای لێكرد كە بگەڕێتەوە كوردستان ئەو دەست بەجێ‌ ژیان و گوزەرانی خۆش و بەرپرسایەتی بەرزی وەلا نا و هاتەوە و لە ریزی كادر و پێشمەرگەكانی حیزبی دیمۆكراتی كوردستانی ئێراندا تێكۆشا. ئەو لە ریزەكانی حیزبدا زۆر زوو پلەكانی وەكوو ئەندامەتی كۆمیتەی ناوەندی، دەفتەەری سیاسی و جێگری سكرتێری گشتی بڕی، هیچ یەك لەو عنوانانە هیچ یەك لە بەرپرساریەتیانە بۆ دوکتور سادقی شەرەفكەندی عەناوین و پۆستی زوودڕەس نەبوون لەبەر ئەوەی هەمووی بە لێهاتوویی خۆی بە زانایی خۆی و هەر بەو ئیستعدادەی كەلە جەریانی خوێندندا لە خۆی نیشان دەدا لە تێكۆشانی حیزبیشدا ئەو زەكاوەتە و ئەو ئیستعدادە و ئەو لێهاتوویەی لە خۆی نیشاندا و ئەو پلانەی بڕی، ئەو لە هەموو ئەو ماوەیەدا كە پێش ئەوەی جێگری سكرتێری حیزب بێت وەكوو سیمایەكی دیاری دەفتەری سیاسی حیزبەكەمان بەرپرسیارەتی جۆراوجۆری لە بەشەكانی حیزبدا لە ئەستۆ گرت بەڵام زۆرتر لە بەشی راگەیاندنی حیزب كە ئەو كاتە بە رۆژنامە و چاپەمەنی و رادیۆ دەنگی كوردستانی ئێران بەرتەسك دەبوون بەڵام ئەو هەم خۆی و هۆشی خۆی هەر لەسەر ئەو بەشە نەبوو كە بەرپرسایەتی تیدا هەیە لە هەموو بەشەكان كەلێن و قوژبنەكانی ئەو حیزبەدا دەستی ئەو، هۆشی ئەو، بیری ئەو لە كاردا بوو. ئەو لە هەموو ئەو هەڵوێست گرتن و بڕیارانەی كە لە كۆنگرەكانی حیزبدا كە ئەو كاتە رەنگە بیری وا هەبووبێت كە لە دیموكراسی لە مافی نەتەوایەتیدا ئەگەر هاوڕاییەك بووبێت لە مەسەلەی دیاری كردنی ئامانجی دواڕۆژدا تەفاوتی بۆچوون هەبوو، ئەوەی دوکتور قاسملوو وەك سوسیالیزمی دێمۆكراتیك دواتر هێنای. دوکتور سادقی شەرەفكەندی هەر جێگری بە واقێعی و بەجێی دوکتور قاسملوو نەبوو ئەو یارێكی تەواو و قورس و قایمی دوکتور قاسملوو بوو لە چەسپاندنی ئەو بیرە دیموكراسیە ئەو بیرە نەتەوایەتییە و ئەو گونجاندنەی سوسیالیزمی دیمۆكراتیك وەكوو ئامانجی دوا رۆژ، بەو مەبەستەی كە زۆرجار دەگوترێ‌ بۆ ئەوە بووە خەتی حیزب لە توودە جوودا بكرێتەوە، بەشێكی رەنگە وا بووبێ، بەڵام بەشێكی دیكەی ئەوە بوو ناكرێت حیزبێك باوەڕەكەی ئەوە بێ كە دیمۆكرات بێت و بۆ دیمۆكراسی خەبات بكات بەڵام لایەنگری جۆرێك لە سوسیالیزم بێت كە نیهایەتەكەی دیكتاتۆریی بێ، جا با دیكتاتۆر پۆرۆلتاریا بێت.

دوکتور سادقی شەرەفكەندی خاوەنی كۆمەڵێك تایبەتمەندی بوو، مودیر بوو، بە بڕشت بوو، بە پشتكار بوو، وەخت و بێ وەختی بۆ كار كردن نەبوو، زانا بوو، بە هۆش بوو، واقیع بین بوو هەموو ئەو تایبەتمەندییانە وای كردبوو كە ئەو بتوانێت لە هەر بارێكەوە لە حیزبدا خاوەنی بۆچوون و نەزەری تایبەتی خۆی بێت و لە هەموو بوارێكەوە ئەو بۆچوونانەی لەگەڵ بۆچوونی دوکتور قاسملوو لە هەموو بابەتە ئەساسی و ئەسڵییەكاندا وەك یەك بێت بۆیە هەمیشە ئەڵێن دوکتور سادقی شەرەفكەندی یاری وەفاداری دوکتور قاسملوو بوو، سادق بوو رەنگە كەم وا هەبێت هیچ نێوێك لەگەڵ تایبەتمەندی كەسێك وا رێك بكەوێ یانی نێوی سادق بێت و ئاواش سەداقەتی زۆربێت لە پێوەندی لەگەڵ حیزبەكەی خۆیدا لە پێوەندی لەگەڵ هاوڕێكانی خۆیدا لە پێوەندی لەگەڵ مامۆستاكەی خۆیدا. بە داخەوە دوکتور قاسملوو شەهید بوو، تیرۆر كرا. دوکتور سادقی شەرەفكەندی وەكوو جێگری سكرتێری گشتی لە كۆبوونەوەیەكی كۆمیتەی ناوەندیدا بە سكرتێری گشتیی حیزب هەڵبژێردرا ئەو هەلومەرجەی ئەو تیدا ئەو بەرپرسایەتییەی وەرگرت خۆی دەرخەری ئەوەیە كە چەندە كەسایەتییەكی بە ئیرادە و چەندە كەسایەتییەكی بە پشتكار و پشت بەستوو بە خۆیەتی.

ئەو لە هەلومەرجێكدا ئەو بەرپرسایەتییەی وەرگرت كە ئێستا ئەو تەمەی لە غەمی لە دەست چوونی مامۆستاكەی و یار و یاوەرەكەی كە دوکتور قاسملوو بوو بەسەر جەستە و زیهن و هەموو گیانیدا زاڵ بوو، ئەو دەیزانی ئەچێتە سەر كورسیەك كە هی دوکتور قاسملوویە پڕ كردنەوەی ئەو جێگایەی زۆر ئاسان نیە لەگەڵ ئەوەی كە ئیمانی هەبوو بەوەی كە دەتوانێ‌ زۆر شت بكات بەڵام پێ‌ وابوو ئەو چاوەڕوانییە كەلە كەسێك كە ئەچێتە جێی دوکتور قاسملوو هەیە و دەبێ‌ ئەو چاوەڕوانییەی وەدی بێنێت هاسان نییە و ئەوە زۆرجار بۆ خۆی دەیگووت هیوادارم بە هاوكاریی هەموو هاوڕێیان شانە چكۆلەكانی من بتوانن ئەو بەرپرسایەتییە قورس و گرانە تەحەمول بكات و كردی و ئەوەی لە رۆژەكانی شەهیدبوونی دوکتور قاسملوودا فەرمووی بەڵێنی دەدەین رێگات درێژە دەدەین یان سەردەكەوین یان سەر دادەنێن و دینە لای تۆ، لێرەشدا ئەو وەفاداریەی خۆیی و بەڵینیەی خۆی لەگەڵ حیزب و لەگەڵ دوکتور قاسملوو بردە سەر. بەرپرسایەتیەكەی وەرگرت بەڵام وای ئەو بەرپرسایەتییە بەڕێوە برد وا لێهاتووی و لێزانی لە خۆی نیشاندا بە بڕشتی و پشتكاری لە خۆی نیشاندا كە ئەگەر هەموو ئەندامانی حیزبی دیمۆكراتی كوردستانی ئێران بۆ كۆماری ئیسلامی هەدەفی دەستگای تیرۆریزمەكەی بوون، دوکتور سەعید لە پێشەوەی ئەو هەدەفانە بوو، بۆ یەكەم كۆماری ئیسلامی پێی وابوو، بۆچوونی ئەوە بوو (لە سەر بدە جەستە دەكەوێ) كە لە دوكتور قاسملوویان دا جەستە نەكەوت، پێی وابوو بۆیە نەكەوتووە چوونكە دوکتور سادقی شەرەفكەندی هەبووە، لەو سەڕەشیان دا بەڵام دەركەوت دیسان ئەو جەستەیە نەكەوت، بریندار بوو، زامی هەڵگرت، خوێناوی بوو، بەڵام بە چۆكدا نەهات نە بزووتنەوە كز بوو، نە حیزبی دێموكراتی كوردستانی ئێران بە چۆكداهات. ئەوە بوو پیلانی تیرۆریان بۆ داڕشت و لە سەفەرێكدا كە بۆ بەشداری لە كۆبوونەوەی ئەنترناسیۆنالی سۆسیالیزم دا بۆ بەرلین لە ئاڵمان كردی بە ماوەیەكی كەم لە دوای بەشداری لەو كۆبوونەوەیەدا پیلانەكە لە رستوورانی میكۆنووس بەڕێوە چوو بەداخەوە شەهید بوو كاك فەتاحی عەبدولی هاوڕێی تێكۆشەرمان و نوێنەرمان لە دەرەوەی وڵات شەهید بوو، كاك هومایۆن بەرپرسی كومیتەمان لە ئاڵمان شەهید بوو و دۆستی دێرینی حیزبەكەمان كاك نووری دێهكوردی شەهید بوو.

هەر كات ئێمە باس لە شەهید بوونی دوكتور سادق شەرەفكەندی و باقی هاوڕێیانی دیكەمان دەكەین لە رستوورانی میكۆنووس بۆ هەموو خەڵك رەوتی دادگای میكۆنووس وەبیر دێتەوە و بەرچاو دەكەوێ كۆماری ئێسلامی لە زۆربەی ئەو وڵاتانەی كە تیرۆری لێ كردبوو بێ ئارەقە دەرچوو بوو، دشی زانی زۆرتر لەو وڵاتانە تیرۆریستەكانی دەنارد و تیرۆرەكانی ئەنجام دەدا كە پێوەندی باشی بازەرگانی لەگەڵیان هەبووە و دڵنیا بوو كە مولاحیزاتی سیاسی ئەوان رێگا نادا شتەكە بە تەواوی ئاشكرا بێت، بەڵام قازییەكانی دەزگای قەزایی ئاڵمان و وەكیلەكانیش لەگەڵ ئەوەی لە پێشدایە هەم لە لایەن ئێرانەوە تەنانەت لە رێگای وەزارەتی دەرەوەی ئاڵمانیشەوە رێگای تەتمیعیان بەرامبەر گرتنە بەر، نەبوو رێگای هەڕەشەی ئاشكرا و نەهێنیان گرتە بەر، سەرنەكەوتن، هەوڵی وەزیری خارجەی ئاڵمان لەگەڵ قازیەكان سەر نەكەوتن، سەربەخۆیی دەزگای قەزایی ئاڵمان بەوێری قازیەكان، سەرئەنجام لە دادگاییەكدا كە زەمان و كاتێكی زۆری برد هەزینەیەكی زۆریشی بۆ دەوڵەتی ئاڵمان هەبوو بەڵام ئاكامەكەی ئەوە بوو كە مۆری تیرۆریزم بە تەوێڵی رێژیمی تیرۆریست و تیرۆریست پەروەری كۆماری ئێسلامییەوە لە رەدەی هەرە سەرەوەی دا بنێ، ئورووپا هەڵویستی گرت، سەفیرەكانی كێشاوە هەرچەند ماوەیەكی زۆری نەكێشا ناردییانەوە بەڵام هەر ئەو هەڵویستە نمادینە ئاكامەكەی دوو شت بوو یەكەم ئەو وڵاتانەی ئورووپایی لە دوای ئەو حووكمەوە لە هەڵسووكەوتی خۆیان و پێوەندی خۆیان لەگەڵ كۆماری ئێسلامیدا بە پارێزەوە رەفتار بكەن، دووهەم ماشیینی تیرۆریزمی كۆماری ئیسلامی لە ئورووپا بوەستێ، راستە ئاكامی ئەو دادگایە شەهیدەكانیان بۆ زیندوو نەكردینەوە، بەڵام نەیانهێشت بكوژەكان و فەرماندەرانی ئەو تیرۆرە بێ ئارەقە دەرچن، هەر لە رەوتی ئەو دادگایە و ئەو مەسائیلە كە مەترەح بوو لە ئاڵمان، لیستێك ئاشكرا بوو كە نێوی ژمارەیەكی بەرچاوی كەسایەتییەكانی ئۆپۆزیسیۆنی ئێرانی لە دەرەوەی وڵات تێدا بوو كە ئەوانە لە بەرنامەی تیرۆری كۆماری ئێسلامیدا بوون، بە ئاشكرابوونی ئەو لیستە یا لیستی دیكەی كە هەبوو بێ، رەنگە ئاشكراش نەبووبێ هەموو ئەوانەی لەو لیستەدا بوون دوای ئەو رووداوە درێژەدان بە ژیانیان بۆ دابین بوو و لەو مەترسیە رزگاریان بوو، واتە ئەگەر ئەوان بە واقێعبینییەوە سەیر بكەن ژیانی ئێستای خۆیان دەبێ مەدیونی خوێنی قوربانیانی حیزبی دێموكراتی كوردستانی ئێران و بڕیاری بەجێی دەزگای قەزایی ئاڵمان ببینن.

هاوڕێیان ئێمە ئەمڕۆ لەگەڵ ئەوەیكە زۆر رێبەر و زۆر كەس و زۆر كەسایەتیمان لە حیزبەكەماندا بە دەست تیرۆریزمی كۆماری ئێسلامی گیانیان لە دەست داوە بەڵام لەگەڵ ئەو هەمووە گیروگرفت وكەندولەندەی لە بەر بزووتنەوەكەمان لە سەر رێگای حیزبەكەمان پێكیان هێناوە ئێمە ئێستا سەر بەرزین، سەر بەرزین بەوەی كە رێگای ئەو رێبەرانەمان رێگای ئەو شەهیدانمان درێژە داوە و هەتا ئێرەمان هێنا، بەو تایبەتمەندییانەوە كە ئەوان مەبەستیان بوو كە ئەوان رێبازیان بوو و ئەوان ئێمەیان بەرەو ئەو رێبازە هان دا و ئەو رێبازەیان خستە بەرپێی ئێمە، دادگای میكۆنووس رێژیمێكی رسوا كرد بەڵام تیرۆریزم بنەبڕ نەبوو تەنانەت هی كۆماری ئێسلامیی ئێران. رۆژهەڵاتی نێوەڕاست ناوچەیەكە هەمیشە بە كێشە بووە، هێندێ جارێش پڕ كێشە بووە بە هۆی تایبەتمەندییەكانی، ئێستا پڕ كێشەتر و ئاڵۆزترە لە بەر ئەوەی كە تاقمێكی تیرۆریستی وەكوو داعش لە سووریە و عەراقدا یەكەتازەی دەكات و جنایەت دەخوڵقێنن هەر بۆیە ئێستە دەبینین یەكگرتنێك و ئێتلافێك لە دەیان دەوڵەت دروست بووە كە لە دژی داعش هەنگاو بنێن، ئەوە خۆی هەنگاوێكی زۆر پیرۆزە بەڵام چۆن دەتوانێ سەركەوێ، یەكەم بەردەوامیی و نەپساوەیی ئەو ئێتلافەیە، دووهەم مووتەمەركز نەبوونی ئەو ئێتلافە لە سەر یەك تاقمی تیرۆریستییە. لە قاعیدە درا داعشی لێكەوتەوە، نوسرەی لێكەوتەوە، جەریانی تیرۆریستی دیكەی لێكەوتەوە بۆیە دەبێ ئێتلافەكە لە دژی تیرۆریزم بە عام بێ بە گشتی بێ و ئەگەر ئەوە بێ كۆماری ئێسلامی بە پێی هەموو ئۆسوولێك دەبێ هەدەف بێ بۆ ئەو ئێتلافە. بۆ؟ داعش چی كردووە كە كۆماری ئیسلامی نەیكردووە؟ تەجاوزی كردووە بە ژن بە كچ، كۆماری ئیسلامی تەجاوزی بە چەندەها كچ و ژنی كوردی لە زیندانەكاندا كرد، پاسدارەكەشی دەناردەوە ماڵی بابی كچەكە‌ بچوو بڵێ زاواتانم. قەتل عام دەكات ئەگەر داعش لە مەحدوودەیەكی بەرتەسك بە نیسبەت هەموو دونیاوە لە سووریە و لەعەراق كوشتار دەكات قەتل عام دەكات كۆماری ئیسلامی لە نێوخۆی وڵاتەكەی خۆی و بە مەودای هەموو دونیا تەوتەئە و پیلان و تیرۆر و تەقاندنەوە دەكات ئەگەر داعش خەڵك ئاوارە دەكات كۆماری ئیسلامی زۆر زیاتر لەو ئاوارانەی كەلە هێرشی داعش بۆ سەر ناوچەكان كەوتۆتەوە لە خودی ئێرانییەكان ئاوارە بەرەو هەندەران بوون. كۆماری ئیسلامی لە ساڵی ٦٧ی هەتاویدا چەند هەزار زیندانی لە زیندانەكانی خۆیدا كە محاكمەی كردبوون كە حوكم درابوون لە بەرەبەری ئازادكردندا بوون ئێعدامی كردن بۆ؟ چوونكە باوەڕیان وەك كۆماری ئیسلامی نەبوو. ئەوەی داعش دەیكات هەر كەس ئەو باوەڕەی كە بۆخۆی بۆخۆی دروست كردووە نەبێ دەیكوژێ، لە كوردستاندا داعش قەتل عام دەكات، لە كوردستاندا كۆماری ئیسلامی چەندی قەتل عام كرد. مەلای ئاوایی لە پێش خەڵكەكەی بە قورئانەوە وەبەر تفەنگ دا رەنگە ئەگەر بڵێم داعش هەموو ئەو شتانەی دەیكات لە كۆماری ئیسلامی فێر بووە شتێكی زۆر زیاد و زیادە گۆییمان نەگوتوە كەوابوو پێكهاتەیەكی جیهانی كە دەیهەوێ لە دژی دیاردەیەكی دزێو خەبات بكات دەبێ لە دژی هەموو دیاردەكە بە گشتی خەبات بكات نەك موریدێك لە موریدەكان. لەگەڵ ئەلقاعیدە كرا تەواو نەبوو لەگەڵ داعشیش بكرێ رەنگە تەواو نەبێ بەڵام لەگەڵ تیرۆریزم بە گشتی بكرێ ئەگەر تەواو نەبێ ئەوەندە كز دەبێ كە ناتوانێ ئەو رەفتارانەی كە ئێستا دەیكات بیكات، كۆماری ئیسلامی وا نیشان دەدات یان هێندێك لایەن هەن دەیانهەوێ بڵێن هاتووە لە عێراق دژی داعش بە دژی تیرۆریزم شەڕ دەكات، هاوڕێیان كۆماری ئیسلامی دژی داعش شەڕ دەكات ئێستا لە هەر شكل و قەوارەیەك كە بۆخۆی بەناڕاست بیڵێ یان خەلكی دیكە بە راست بیڵێن، بەڵام ئەو بۆیە لەگەڵ داعش شەڕ ناكات چونكە تیرۆریستە، لەگەڵ داعش بۆیە شەڕ دەكات چونكە بوونی داعش لەو وڵاتەدا یەكەم داعش بۆخۆی شتێكی بچووكە لە ناو شتێكی گەورەتری سوننەی ماف پێشێلكراوی عەرەبی عێراقیدا، دووهەم سوننییەكان كەلە ماف پێشێلكەری حكوومەتی ناوەندی خۆیان ناڕازین لە عەینی حاڵیشدا خوازیاری جیددی كۆتایی هێنان بە نفوز و دەخالەت و دەسەڵاتی كۆماری ئیسلامین لە عێراقدا و كۆماری ئیسلامی دەزانێ سەركەوتنی سوننییەكان ئێستا چ بە ناوی داعش یان بە ناوی سوننییەكان بەربەست دەبێ لەبەر ئەو نفوزەی كە كۆماری ئیسلامی هەیەتی ئەو دخالەتەی كەلە عێراقدا دەیكات دەیهەوێ لە كەمێ نەدات و لە كزێ نەدات ئێستا لەو ئێتێلافەدا جێگای نەبۆتەوە بۆ؟ چوونكە لە پێش هەموویاندا ١٠ وڵاتی عەرەبی دەڵێن ئێمە لەگەڵ رژێمێك لە ئێتیلافدا نابین كە بۆخۆی مۆری تیرۆریزمی بە ناوچاوانەوەیە لە وڵاتانی هەموو ئێمەدا هەر گرووپێكی هاوفكر و هاوئایینی خۆی و هاوئایینزای خۆی هەبێ لە دژی وڵاتەكانماندا تەحریكیان دەكات، تیرۆریان پێ دەكات، تەخریبیان پێ دەكات، ئاژاوەیان پێ دەنێتەوە، ئامادە نین لەگەڵی لە بەرەیكدا بین ئێستا تەنانەت لەگەڵ ئەوەی پێشتر ئامریكا ڕایگەیاند لەوانەیە هێزە سەربازییەكانیان لە عێراق‌ لەگەڵ فەرماندەكانی ئێرانی هاوكاری و هەماهەنگییەكیان هەبێ و ئێرانیش دەستووریدا بە فەرماندەكانی كە بیكەن بەڵام ئێستا كە تێدا نییە لە دژیەتی بۆ لەدژیەتی؟ چوونكە حزوری ئەو هێزانەی كە لەو ئێتیلافەوە دێن لە عێراق جێگیر دەبن ئەوا وەزعێك لەو عێراقەدا پێك دێت كە داعش نەمێنێ یان كز بێ سوننە موقعییەتێكی هەبێ كە وەك ئێستا ماف پێشێلكراو نەبێ كورد موقعییەتێكی هەبێ كە تا ئەو رادەیە لەلایەن حكومەتی ناوەندییەوە حیسابی هیچی بۆ نەكرێ و ئەوانە هەمووی دەست و دەسەڵاتی كۆماری ئیسلامی لە عێراق و لە هەرێمی كوردستانیش تا رادەیەك كورت دەكاتەوە بۆیە پێوەی ناراحەت دەبێ ئەوەی ئەو شەڕی بۆ دەكات شەڕی تیرۆر نییە شەڕ بۆ مانەوەی نفوز و دەسەڵاتی خۆیەتی لە عێراقدا. لە كوێى ئەو دونیایە لە هەر قارەیەك چەند وڵاتێك هاواری ئەوەی لێ هەڵنەستابێ كە كۆماری ئیسلامی تیرۆری كردووە، كە سەروەری پێشێل كردووە، تەقاندنەوەی كردووە، خەڵكی كوشتووە، رێژيمێك كە بە چەكی خۆی بە پاسداری خۆی بۆ دیفاع لە دیكتاتۆرێكی وەك بەشار ئەسەد بە دەیان هەزار كەس خەڵكی ئەو وڵاتە دەكوژێ چۆن دەتوانێ لە دژی تیرۆر خەبات بكات ئێمە هیوادارین ئەو ئێتیلافە بەردەوام بێت و لە رەوتی كارەكانی خۆیدا بەرەو ئەوە بچێ كە دژی تیرۆر بە عام و تیرۆریست پەروەران بەگشتی لە ناوچەدا‌ هەنگاو بنێ دەنا رەنگە لە دژی یەك گرووپی تیرۆریستی كە رەنگە كزی كات، بەڵام تیرۆریزم ریشەكێش ناكات. لەو موناسبەتەدا ئیجازە بدەن بە ناوی هەموومانەوە سڵاو بنێرین بۆ گیانی پاكی دوكتور سادق شەرەفكەندی سكرتێری پێشووتری حیزبەكەمان قوربانيی تیرۆریزمی كۆماری ئیسلامی و گیانی كاك فەتاحی عەبدولی، كاك هومایۆنی ئەردەڵان، كاك نوری دێهكوردی، بۆ گیانی پاكی هەموو شەهیدانی رێگای ئازادی كورد و كوردستان.

هیوادارین حیزبەكەمان، بزووتنەوەكەمان زامی بەم جۆرە هەڵنەگرێ، خوێنی بەو جۆرەی لەبەر نەڕوات و ئاكامی خەباتمان، سووربوون لە سەر رێبازی شەهیدانمان بمانگەینێتە ئەو جێگایەی كە ئاواتەكانی ئەوان بەدی بێنین و لە بەرانبەر رۆلەكانی نەتەوەی خۆماندا سەربەرز و سەركەوتوو بین.

خۆش بن.