شەماڵ تەرغیبی
گومان لەوەدا نییە کە سەرهەڵدان، دەسپێك و بەردەوامبوونی هەر بزووتنەوە، شۆڕش، جوڵە و بزاوتێکی کۆمەڵایەتی - سیاسی بە نەخش و دەوری خەڵك دێتە ئاراوە و هەر بەو پێیەش خەڵک دەتوانن ڕۆڵی یەکلاکەرەوە لە سەرخستن و بە ئامانج گەیاندنی بگێڕن.
بزووتنەوەی میللی دێموكراتیكی گەلی كوردیش هاوشێوەی هەموو بزووتنەوەکانی دنیا، كە ساڵانێكە بۆ گەیشتن بە ئامانجەكانی و مافە ڕەواكانی خۆی كە لە ڕاستیدا داواكاریی كۆمەڵانی هەموو خەڵكە لەم قاعیدەیە بێبەری نەبووە و نییە؛ گەلی كورد بەردەوام هاوڕێ و پشتیوانی ڕۆڵە شۆڕشگێڕ و خەباتکارەكانی خۆی لەم ڕێگا پڕ هەوراز و نشێوەدا بووە و لەم نێوانەدا لە هیچ قوربانیدان و فیداکارییەکیش درێغی نەکردووە کە زێدەبێژی نییە گەر بڵێین قورسترین نرخەکان بۆ ئازادی هەر ئەم گەلە داویەتی و دەتوانین وەک نموونەی بەرهەست ئاماژە بە بیرمەند و نوخبەیەکی وەك شەهید دوكتور عەبدولڕەحمان قاسملوو، پێغەمبەری ئاشتی و مامۆستای دێموكراسی، بکەین کە لە نێو گەلە ستەملێكراوەکەیدا هەڵكەوت و بۆ گەیشتن بە ئامانجەكانی گەلەكەی، گیانی خۆی بێ هیچ چاوەڕوانییەك فیدا كرد.
ئەم ڕێبەرە بلیمەتە، بەردەوام جەختی لەسەر ئەوە دەكردەوە كە شۆڕش و بەردەوامبوونی، پەیوەستە بە پشتیوانی هەمەلایەنەی خەڵك و دەیگووت: "شۆڕش، بۆ خەڵك و بۆ بەدەستهێنانی مافە بنەڕەتییەكانی ئەوان بە بێ بوونی بەرچاوی خەڵك بە شێوەی جۆراوجۆر لەم شۆڕشەدا بە سەركەوتن ناگات". دوكتور قاسملوو لە سەر ئەو باوەڕە بوو كە دەبێ شێوازی ڕاست لە پێوەندی لەگەڵ وەزع و هەلومەرجی كوردستان و ناوچە، زانیاری تەواو بە خەڵك بدرێت تا بتوانن لێكدانەوەی باشیان لە هەلومەرجەكە ببێت و بە شێوەیەكی جیددی لە شۆڕشی ڕۆڵەكانی خۆیان پشتیوانی هەمەلایەنە بكەن.
ئەوەی بە ڕوونی لە ئاكار و وتەكانی د.قاسملوو وەک یەكێك لە پڕەنسیپە بنەڕەتی و جەوهەرییەكان بۆ درووستبوونی پێوەندی و نەپچڕانی لەگەڵ خەڵك دەیزانێ، پێویستیی ڕوونكردنەوەی سیاسەت و بەرنامەكانی حیزب بۆ خەڵك بوو كە ئەمە خۆی گرینگی بەرچاوی خەڵك و هەبوونی ئەوان لە شۆڕشدا لە ڕوانگەی ئەم گەورە پیاوەی پانتایی خەبات ئاشكرا دەكات.
ڕێبەرمان، د.قاسملوو، خەڵك و پێشمەرگەی وەك ئاو و ماسی پێناسە كردووە و دەیگوت: "هەر بەو جۆرەی كە ژیانی ماسی بە بوونی ئاوەوە پەیوەستە، پێویستیی سەركەوتن و سەرفرازی پێشمەرگەكانیش لە گۆڕەپانی شۆڕش و سیاسەتدا، بوون و پشتیوانی هەمەلایەنەی خەڵكە و ئەم دوو فاكتەرە پێكەوە تەواوكەری یەكترن". بەشێک لە هاوسەنگەرانی شەهید قاسملوو لە کاتی گێڕانەوەی بیرەوەرییەکانیان جەخت لەوە دەکەنەوە کە ڕێبەری بلیمەتی گەلی كورد، هەموو كات بۆ ئاگاداربوون لە كێشە و كەموكوڕییەكانی خەڵك كە لەگەڵیاندا ڕووبەڕوو بوون، ڕاپۆرتی كۆمیتە شارستانەكانی بە وردی دەخوێندەوە و لێكدانەوەی لەسەر دەكردن و دەیگوت كە دەبێ زانیارییەكی تەواومان لەسەر ژیانی خەڵك ببێ تا بتوانین كێشەكانی ئەوان بناسین و بۆ چارەسەركردنیان هەنگاوی باش هەڵێنین.
لەو ناوچانە كە بە دەستی پێشمەرگە ئازاد دەكران، بۆ بەشداری خەڵك لە كاروباری خۆیاندا شورای شار یا دێ دەستی بەكار دەكرد. بە شێوەیەك كە ئیسڵاحاتی ئەرزی و دابەشكردنی زەوی، زۆرەملێکردنی فێربوونی زمانی كوردی لە خوێندنگەكان و دروستكردنی كومیسیۆنی كۆمەڵایەتی لە یەكەم كردەوە بنەڕەتییەكانی حیزب لەم ناوچانە بوو.
بە لەبەرچاوگرتنی ئەو خاڵانەی كە ئاماژەمان پێكردن، دەتوانین بڵێین كە ڕۆڵی خەڵك لە سەرهەڵدان، دەستپێك و بەردەوامی هەر شۆڕشێك بێ ئەملاوئەولایە و ئەمەش وەک ئەسڵێکی بنەڕەتی لە هزر و ئەندێشەکانی د.قاسملوو و باقی ڕێبەرانی بزووتنەوەی ڕەوای گەلی کورد ڕەنگی داوەتەوە. لەژێر کاریگەری ئەم جۆرە بیرکردنەوەشە کە ئەمڕۆ دەبینین لە دیسکۆرسی خەباتی خۆرهەڵاتدا، شار نەخشی کلیدی دەگێڕێ و وەک دەوترێ شار دەبێتە چەقی خەباتی ڕۆژهەڵات کە ڕوونە ئامانج لێی خەڵک و بەشدارییان لە مانگرتن، ناڕەزایەتی دەربڕین و ئێعترازی بەرینی جەماوەرییە کە دیارترین ڕەنگدانەوەی لە ڕەوتی شۆڕشێ ژینادا بیندرا کە دیتمان چلۆن خەڵک بە هاتنە سەر شەقام و دەربڕینی نڕاەزایەتی چلۆن توانیان بە دەستی بەتاڵ بەڵام بە چەکی ئیمان و ئیرادە ماهییەت و چییەتی ڕاستەقینەی ڕێژیم بخەنە ڕوو و گیانێکی نوێ بە خوێنی خۆیان وەبەر بزووتنەوە ببەخشن.
بەکورتی دەتوانین لە کۆتاییدا ئاماژە بەو ڕاستییە بکەین کە خەڵك یەكێك لە سەرەکیترین پایەكانی هەر شۆڕشێكن كە بە بێ بوونی ئەوان هیچ شۆڕشێک بە ئاكام ناگات و لە ئەگەری گەیشتن بە هێندێك لە ئامانجەكانی شۆڕش، لە درێژەدا بەلاڕێدا دەڕوات و لە ڕێگەی ڕاستی خۆی لادەدات؛ کەواتە بەشداری کردنی ڕاستەوخۆ و ناڕاستەوخۆی خەڵک بەگوێرەی ئیمکانیان لە نێو خەبات و شۆڕش ئەرکێکی ئەخلاقی و ئینسانییە بۆ گەیشتن بە ئازادی و ڕزگاربوون لە چنگی داگیرکەران.
