بە پێی هەواڵێک کە بە کوردستان و کورد ماڵپەڕی فەرمی حیزبی دێموکراتی کوردستان گەیشتوە، ڕاگەیاندن و دەنگ‌وڕەنگی کۆماری ئیسلامی بە پێچەوانەی ڕاستییەکان باس لە رووداوەکانی پارێزگای کرماشان و بارودۆخی لێقەوماوانی بوومەلەرزەلێدراو دەکەن.
بە پێی قسەی بەشێک لە چالاکانی مەدەنیی کورد ڕاگەیاندنەکانی کۆماری ئیسلامی چەند رۆژە باس لە داخرانی ڕێگای کرماشان بۆ سەر پێڵ زەهاو و گەردەنەی پاتاق دەکەن.
چالاکانی مەدەنی لەسەر ئەو باوەڕەن کە بەمەبەستی کۆتاییی‌هێنان بە هەرەوەزی یارمەتی گەیاندن بە لێقەوماوان ڕاگەیاندنەکانی کۆماری ئیسلامی هەواڵی ناڕاست بڵاو دەکەنەوە .
هەروەها بە پێی گرتە ڤیدیویەک کە بڵاو کراوەتەوە بەشێکی زۆر لە یارمەتییەکانی خەڵکی کوردستان لە ڕێگای سپای پاسدارانەوە ڕەوانە ئەلبووکەماڵی سووریە کراوە.
کەمکاریی و خەمساردی ناوەندە دەوڵەتییەکان لە پێڕاگەیشتن بە خەڵکی بوومەلەرزەلێدراوی پارێزگای کرماشان لە ئاستیك‌دایە کە خەڵکی دەڤەری کرماشان و چالاکانی مەدەنی ڕایانگەیاندوە کە تەنیا هیوامان بە خەڵکی کوردستانە ،نەک ناوەندە دەوڵەتییەکان.
