"٨٠ ساڵ خەبات لەپێناو ڕزگاری"، نوێترین بەرهەمی چاپەمەنیی حیزبی دێموکراتی کوردستانی ئێران چاپ و بڵاو بۆوە.

عەلی بداغی، جێگری ناوەندی ڕاگەیاندنی حیزبی دێموکرات لە لێدوانێکدا بۆ کوردستان‌مێدیا ڕایگەیاند کە "٨٠ ساڵ خەبات لەپێناو ڕزگاری" یادنامەیەکە بەبۆنەی ٨٠ ساڵەی دامەزرانی حیزبی دێموکراتی کوردستاندا چاپ و بڵاو بۆتەوە و ئەو یادنامەیە کۆمەڵێک توێژینەوە و وتاری لە خۆ گرتوە و هەوڵێکە بۆ ئاوڕدانەوەیەکی کورت لە مێژووی ئەم حیزبە لە چەند ڕەهەند و بواری جۆراوجۆرەوە.

جێگری ناوەندی ڕاگەیاندنی حیزبی دێموکرات گوتی حیزبی دێموکرات لە ژیانی سیاسیی پتر لە ٨ دەیە و پڕبایەخی خۆیدا زۆر قۆناغی دژواری ئەزموون کردوە، کەندوکۆسپی زۆری بڕیوە، لە ڕەوتی خەباتی نەتەوەیی کورددا زۆر بەها و پڕەنسیپی گرینگی جێگیر کردوە، زۆر ڕۆڵەی خۆی پێشکێش بە بارەگای ئازادیی نەتەوەکەی کردوە و لە چەند قۆناغیشدا تووشی لێکترازان هاتوە؛ بەڵام لە هەموو هەلومەرجێکدا ئاڵاهەڵگری خەباتی نەتەوەیی کورد لە ڕۆژهەڵاتی کوردستان بووە؛ ئەم کتێبەش هەوڵێکە بۆ بەرزنرخاندنی ژیانی سیاسیی حیزبی دێموکرات و دەسکەوتەکانی و، هەروەها قامکدانان لەسەر  خاڵە بەهێز و لاوازەکانی کارنامەی هەشت دەیە خەبات و تێکۆشانی ئەم حیزبە.

"قەڵای خۆڕاگری ناسنامەی نەتەوەیی" و "سێ چارەگە نەوەستان" دوو کتێبی دیکەی ناوەندی ڕاگەیاندنی حیزبی دێموکراتن کە پێشتر بەبۆنەی یادی ٧٥ ساڵەی دامەزرانی حیزب چاپ و بڵاو ببوونەوە.

"٨٠ ساڵ خەبات لەپێناو ڕزگاری" لە ٥٢٤ لاپەڕەدا چاپ و بڵاو بۆتەوە و ناونیشانی ٢٦ وتار و توێژینەوە ئاکادیمیکی تێدا دەبیندرێ.

بەڵگەنامەکانی کۆنگرەی ١٧ی حیزبی دێموکراتی کوردستانی ئێران

بەڵگەنامەکانی کۆنگرەی ١٧ی حیزبی دێموکراتی کوردستانی ئێران (کۆنگرەی یەکگرتنەوەی دێموکراتەکان) چاپ و بڵاو بۆوە. لەم نامیلکەیەدا چاومان بەو بەڵگەنامانە دەکەوێ:

- وتاری کردنەوەی کۆنگرەی یەکگرتنەوەی دێموکراتەکان

- پوختەی باسێک لەسەر ڕاپۆرتی سیاسی بۆ کۆنگرەی یەکگرتنەوەی دێموکراتەکان

- ڕاپۆرتی ناوەندی بەڕێوەبەریی حیزبی دێموکراتی کوردستانی ئێران بۆ کۆنگرە

- بەرنامە و پێڕەوی نێوخۆی حیزبی دێموکراتی کوردستانی ئێران

- ڕاسپاردە و بڕیارنامەی کۆنگرەی یەکگرتنەوەی دێموکراتەکان

بۆ خوێندنەوە یان داگرتنی فایلی pdfی ئەو بەڵگەنامانە کلیک لەسەر داگرتن بکەن: