درووستکردنی ڕێگا بۆ کانگایەک لە بۆکان بووەتە مەترسی بۆ لەناوچوونی ژیانی "چێرگ" لەو ناوچەیە.
ئەو ڕێگایە بە داوێنی کێوێکدا تێدەپەڕیت و جیا لەوەی کە دەبێتە هۆی تێکدانی شوێنی ژیانی "چێرگ"، ژینگەی ئەو بەشەش تێک دەدات.
"چێرگ"، باڵندەیەکە کە لە دەشتی پان و بەرین و بێ داردا دەژیت.
ئێستاکە دەشتی "سووتاو" بە پانتایی ٤٠٠ هێکتار لە گوندی "حەمامییانـ"ـی بۆکان بەهۆی هەبوونی دۆخی باش بۆ ئەو باڵندەیە گرینگترین شوێنی ژیانی "چێرگ" لە کوردستان و ئێراندایە.
چالاکانی ژینگەیی سەبارەت بە تێکدانی شوێنی ژیانی ئەو باڵندەیە بەهۆی دروستکردنی ئەو ڕێگایەوە سکاڵایان لە وەزارەتی پیشە و کانزای رێژیم تۆمار کردووە بەڵام تاکوو ئێستا هیچ وڵامێکیان پێ نەدراوەتەوە.
ئەم جۆرە باڵندەیە لە حاڵی لەنێوچووندایە و پاراستنی ئەو سامانە سروشتییە لە ناوچەی کوردستان ئەرکە، بۆیە پێویستە لەلایەن هاووڵاتییان و ڕێکخراوە مەدەنییەکانەوە گرینگیی پێ بدرێت.
