هەیئەتێکی حیزبی دێموکراتی کوردستان لە پرسەی خاتوو مریەم قازی لە شاری هەولێر بەشداریی کرد. ڕۆژی سێشەممە، 22ی خەزەڵوەر لە هۆڵی "مێهدی خۆشناو"ی یەکیەتیی نووسەرانی کورد ڕێوڕەسمێک بۆ ڕێزلێنان لە یاد و بیرەوەریی خاتوو مریەم قازی بەڕێوەچوو. لەو ڕێوڕەسمەدا کە بەشداریی دەیان کەس لە نووسەران و ئەدیبان و کەسایەتییە ئاکادیمی و سیاسییەکانی باشوور و ڕۆژهەڵاتی کوردستان بەڕێوەچوو، ڕێز لە تەمەنێک خزمەتەکانی خاتوو مریەم قازی لە بوارە جۆراوجۆرەکانی سیاسی و ئەدەبی و مەدەنیدا نرا. لەو ڕێوڕەسمەدا هەیئەتێکی حیزبی دێموکراتی کوردستان پێکهاتوو لە مامۆستا عەبدوڵڵا حەسەن‌زادە و کاک جەلیل گادانی بە هاوڕێیەتی شاندێکی نوێنەرایەتیی حیزب لە هەولێر بەشدار بوون و لە نیزیکەوە پەیامی هاوخەمیی حیزبی دێموکراتی کوردستانیان بە بنەماڵەی کۆچکردوو مریەم قازی ڕاگەیاند. مریەم قازی چیرۆکنووس و ڕەخنەگر و چالاکی بواری مافی ژنان، رۆژی دووشەممە ١٤ی خەزەڵوەر بە هۆی نەخۆشییەوە ماڵاوایی لە ژیان کرد. ئەو خاتوونە لێهاتوویە یەکێک لە چالاکانی بواری فەرهەنگ و ئەدەبیی کوردستان بوو، و هاوکات لە گەڵ نووسینی چیرۆک و بەڕێوەبردنی ئەنجوومەنی ئەدەبی لە شاری مەهاباد، یەکێک لە ژنانی هەڵسووڕی کۆمەڵگەی کوردستان بوو.