بە بۆنەی دەی خاکەلێوە ، رۆژی شەهیدانی کوردستان رێورەسمێک لە یەکێک لە بنکەکانی حیزبی دیموکراتی کوردستان بەڕێوەچوو.
پێشنیوەرۆی رۆژی ١٠ی خاکەلێوەی ٩٦ی هەتاوی کە ڕێکەوتە لە گەڵ ٧٠ ە مین تاڵیادی لە سێدارەدانی یەکەمین رئیس جمهوری کوردستان پێشەوا قازی محەممەد و کە بە ناوی شەهیدانی کوردستان ناوزەد کراو، بە ئامادەبوونی بەشێکی بەرچاو لە کادر و پێشمەرگەو ئەندامانی حیزبی دیموکراتی کوردستان لە رێورەسمێک‌دا یادوناوی سەرجەم شەهیدانی هەردەم زیندووی گەلەکەمان بەرز ڕاگیرا.
بە ئامادەبوونی بەشێکی بەرچاو لە کادرو پێشمەرگەکانی حیزب لە مەزارگەی تێکۆشەرانی دیموکرات و خوێندنی سروودی ئەی شەهیدان و ڕاگرتنی خولەکێک بێدەنگی بۆ رێز لێنان لە گیانی خۆرەتاویی پێشەوای کوردان و، سەرجەم شەهیدانی سوور خەڵات ئەو ڕیورسمە کرایەوە.
پاشان بە نوێنەرایەتی حیزبی دیموکراتی کوردستان ، کادری لەمێژینەی حدک، کاک ئەحمەد نستانی تاجە گوڵینەی پێشکەش بە گڵکۆی شەهیدانی شەوی یەڵدای خوێناویی دیموکرات کردو، دوایی بەشداربووان مەزارگەی تێکۆشەرانی دیکەی دیموکراتیان بە سەر کردو چەپکە گوڵی وەفادارییان پیشکەش کرد.
رێورەسمی ٧٠ە مین ساڵیادی لە سێدارەدانی پێشەوا و رۆژی شەهیدانی کوردستان لە یەکێک لە سالۆنەکانی بنکەی سیاسیی حدک درێژەی پێ‌درا.
لە بڕگەیەکی دیکە دا هاوڕێ حەسەن خۆشکەلام چەند وتەیەکی لە لایەن کۆمیسیۆنی کۆمەڵایەتییەوە پێشکەش کرد، کە بە کورتی باسێک بوو لەسەر دەورو کاریگەریی پێشەوای کوردان و کاروانی خوێناوی خەباتی کورد لە رۆژهەڵاتی کوردستان.
لە پەیامی کۆمیسیۆنی کۆمەڵایەتی‌دا هاتبوو، کەسایەتی پێشەوا قازی محەممەد تەنیا ،کەسایەتیی حیزبی دیموکراتی کوردستان نیە، بەڵکوو میراتێکی هاوبەش و جێگەی شانازیی خەڵکی هەرچوار پارچەی کوردستانە ، کەواتە بۆ پەرەپێدان بە روحی نەتەوەیی جێگەی خۆیەتی ساڵرۆژی لە سێدارەدانەکەشی وەک رۆژی شەهیدان هەموو خەڵکی کوردستان دیاری بکرێ.
دواتر هاوڕێ کەماڵ کەریمی ئەندامی دەفتەری سیاسیی حیزبی دیموکراتی کوردستان لەسەر پێگەو جێگەی پێشەوا قازی محەممەد و خەباتی نەپساوەی گەلی کورد،بە تایبەتی لە رۆژهەڵاتی کوردستان باسێکی پێشکەش بە ئامادەبووان کرد.
هاوڕێ کەماڵ کەریمی بە ئاوردانەوەیەک لە سەروبەندی هاتنە مەیدانی قازی محەممەد و کاریگەریی ئەرینی ئەو ذاتە بیرتیژە، بەسەر کۆمەڵگەکەی کە لە هەلومەرجێکی هەستیاردا توانی یەکگرتوویی و یەکریزی بخاتە گیانی خەڵکی خوی و خەباتێکی بەردەوام تا گەیشتن بە ئامانجە نەتەوەییەکان بنیات بنێ کە ئێستاشی لەگەڵ بێ ئەو خەباتە هەر درێژەی هەیە.
کەماڵ کەریمی ئەندامی دەفتەری سیاسیی حدک، لە درێژەی قسەکانی‌دا بە بەرزنرخاندنی پێشوازی کەم وێنەو بەربڵاوی خەڵکی رۆژهەڵاتی کوردستان لە بۆنەکانی نەورۆزی ئەمساڵ لەوبارەوە گوتی،
بەشداریی مانادار و یەکگرتووانەی خەڵکی رۆژهەڵاتی کوردستان ئەمساڵ لە بۆنەکانی نەورۆز‌دا دوای ٧٠ساڵ لە سێدارەدانی پیشەوا قازی رێبەر، نیشانیان دا، کە هەم بە ڕێبازی قازی محەممەد وەفادارن و هەم پەیامی یەکریزی و پێکەوەبوونیان گەیاندە لایەنە سیاسییەکان.
هاوڕێ کەماڵ کەریمی لە کۆتایی قسەکانی دا وێڕای رێزو سڵاو ناردن بۆ گیانی پاکی پێشەوا قازی محەممەد و سەرجەم بنەماڵەی سەرفەرازی شەهیدان، هیواخوازی داهاتوویەکی بێ شەهید بوو بۆ گەڵی کورد.
لە بەڵگەیەکی دیکەدا پێشمەرگەی دەنگخۆش رێبوار حسەنی، بە هاوکاری هونەرمەندان، دەرباز و دەوەن و بە یارمەتیی ئارام ئیزدپەنا چەند مەقامێکی پێشکەش کرد.
خوێندنەوەی شێعرێک لەلایەن شاعیری سەروبەسەرهات سپی کردوو لە نێو سەنگەری خەبات کاک ئەحمەد قادری، بڕگەیەکی دیکەی ئەو رێورەسمە بوو.
لە درێژەی ئەو رێورەسمە‌دا هاوڕێ محەممەد ئەمین کەریمی باوکی شەهید ناسر کەریمی ئەستێرەی تەمەن کورتی دیموکرات، کە لە شەوی یەڵدا بە دەستی رەشی تیرۆر ئاوا بوو، سروودێکی پێشکەش بە ئامادەبووان کردو نیشان لەوە بوو کە تیرۆر و کوشتنی رۆڵەکانی گەڵ ، نەک خەباتی ئێمە پەک ناخات بەڵکوو سوورترمان دەکا لە درێژەدان بە خەباتی مافخوازانە نەتەوەکەمان.
خویندنی پاخشانێک، لە لایەن ئاسۆ وردی ، یادگاری شەهیدی تێکۆشەر مەلای قادری وردی بڕگەیەکی دیکەی رێورەسمی ١٠ی خاکەلێوەی ئەمساڵ بوو.
دوای ئەو رێورەسمە مێوانان و بەشداربووان سەردانی سالۆنی ئارشێڤی وێنەی شەهیدانانیان کردو، بە دیدەی ئەمەگناسییەوە جارێکتر روانییان بە ناوونیشان و روخساری شەهیدانی حیزبی دیموکراتی کوردستان.
