رۆژی هەینی ٧ی پووشپەڕ هاوکات لەگەڵ بەڕێوەچوونی شانۆی هەڵبژاردنەکانی سەرۆککۆماریی ئێران خۆپیشاندانێک لە بەردەم نووسینگەی کارگێڕیی ڕێژیم لە شاری هامبۆرگ کە وەک بنکەیەکی دەنگدان دابین کرابوو بە هاوکاریی چەند حیزب و لایەنی سیاسیی ئێرانی و کوردستانی و هەروەها هەندێک لە چالاکوانانی سیاسیی ئەو شارە بەڕێوەچوو.
چەند حیزب و لایەن پەیامی خۆیان خوێندەوە بە تێکرا ئەو هەڵبژاردنەیان دوور لە بنەماکانی دێمۆکراسی و پڕەنسیبەکانی هەڵبژاردن نرخاند.
کاک شەهریار نەقشبەندی لە وتارەکەیدا جەختی کردەوە کە دوژمنی سەرەکیی گەلی ئێران ڕێژیمی کۆماری ئێسلامیی ئێرانە و بۆ ڕزگاری لەو ڕێژیمە دەبێ گەلانی ئێران ناکۆکییەکانیان وەلانێن و بەرەیەکی یەکگرتوو بۆ خەبات دژی کۆماری ئێسلامی پێک بێنن.
دوکتور ئەمیر کیانی چالاکی سیاسی لە شاری هامبۆرگ وتارێکی پێشکەش بە ئامادەبووان کرد و ڕۆڵی تێکدەرانەی بەشێک لە ئۆپۆزسیۆنی لە شۆڕشی ژینادا بۆ ئامادەبووان شی کردەوە.
هاوڕێ ناسێح موهاجر پەیامی حیزبی دێموکراتی کوردستانی ئێرانی خوێندەوە و لە پەیامەکەدا باس کرا کە هەڵبژاردن لە سیستەمێکی تۆتالییستیدا هیچ بایەخێکی نییە و تەنیا شەرعیەتێکە بۆ ئاڵوگۆری دەستنیشانکراوەکانی دیکتاتۆری خوێنمژی ئێران.
هەروەها سێ کەس لە برینداربووانی شۆرشی ژینا هەر یەک وتارێکیان بۆ ئامادەبووان خوێندەوە.
