ئێمەی کورد لە هەموو ئاست و گۆڕەپان و دەرفەت و زەمەنێک‌دا پێش ئەوەی قسە لە هەر شتێک بکەین کە پێوەندی بە داهاتوو و، وەزن و قورسایی میللەتەکەمان لە پرسە چارەنووسسازەکان‌دا هەبێت، پێویستە لە سەر پڕنسیپێکی نەتەوەیی و نیشتمانی بەناوی "یەکگرتوویی" ساغ بینەوە. هەرچەند قسەکردن لە "یەکگرتوویی"یان "یەکڕیزی" و پێکەوەبوون لە نێو ئێمەی کورد و هێزە سیاسییەکانی ئەم میللەتەدا بە جۆرێک لەوس و ماندووکەرە، بەڵام دیسانیش تا ئێستا گەورەترین کەمایەسییمان و لەمەوبەولایش سەرەکیترین زەروورەتمان هەر پرسی "یەکگرتوویی" و یەکبوون و پێکەوەبوونە.
ئەوەی لەم پێوەندییەدا دەبێ بکرێ و پێداگری لە سەری پێویستە ئەوەیە کە ئەم پرسە بۆ ئێمەی کورد بە گشتی و بەتایبەت بۆ ئیمەی کورد لە ڕۆژهەڵاتی کوردستان کە باسەکەمان زیاتر بۆ ئەوێیە، وەک "پڕنسیپ"ێکی ئەخلاقی – نەتەوەیی سەیری بکرێت. بە واتایەکی دیکە هەر تاکێکی کورد لە هەر چوارچێوەیەکی کۆمەڵایەتی، سیاسی، مەدەنی و جەماوەری‌دا کە هەیە، هەوڵدان بۆ نەهادینەکردنی ئەم زەروورەتە لە خانەوادە و لە کۆمەڵگا و لە چوارچێوەیەکی سازمانی‌دا بۆ خۆی بکاتە ئەرکێکی ئەخلاقی. بە جۆرێک کە تاکڕەوی، ناتەبایی و نەحەوانەوە وەک ئەمرێکی بێ‌ئەرزش و دوور لە بەها بۆ ئینسانی کورد، پێناسە بکرێت.
بێگومان گەیشتن بەم قەناعەتە ئینسانی – جەماوەرییە کە پێوەندی ڕاستەوخۆی بە پرۆسەی نەتەوەسازییەوە هەروا بە ئاسانی درووست نابێت، هەر وەک چۆن بەداخەوە تا ئێستا سەرەڕای ئەو هەمووە شکست و لێکترازان و خولانەوە لە نێو بازنەدا، ئێمە هەروا نەتەوەیەکی ناتەبا و نایەکگرتوو و بێ‌دەسکەوتین(کە وەک گەورەترین نەتەوەی بێ‌دەوڵەت ماوینەتەوە). ئەی باشە ئێمە چۆن دەتوانین بەم قەناعەتەی کە باسمان کرد بگەین؟! خۆ هەموویشمان دەزانین کە ئەم پرسە پێش ئەوەی بابەتێکی سیاسی بێت، بابەتێکی کۆمەڵایەتییە کە پێویستی بە سیستەمێکی تۆکمەی پەرەوەردەیی هەیە و، لەوەی روونتر هەموومان دەزانین کە کورد بە هۆی نەبوونی دەوڵەت و سیستەمی دامەزراوەییەوە، بەداخەوە خاوەنی پەروەردەیەکی رێکخراوی نەتەوەیی نیە!!.
بۆیە لێرەوە بە ناچاری دیسان دەبێ رووبکەینە حیزبەکان وەک قەوارەگەلێکی سیاسی کە نوێنەرایەتی بزاڤی سیاسیی دەکەن و دەتوانن کاریگەرییان لە سەر کۆمەڵگا هەبێت، دەبێ رووبکەینە کۆمەڵگای مەدەنی کە بەجۆرێک لەم ساڵانەی دواییدا توانیویەتی متمانەی کۆمەڵگای کوردستان بە دەست بهێنێ و، هەر دەبێ روو بکرێتە ئیلیت و نوخبەکانی خۆمان لە هەموو بوارەکانی فەرهەنگی، ئەدەبی، پەروەردەیی، سیاسی، مەدەنی و....کە بۆ جێخستن و بەدامەزراوەیی‌کردنی ئەم زەرورەتە لە نێو میللەتەکەمان دا خۆیان بە ئەرکدار بزانن.
قسەکردن لە یەکگرتوویی و درووستکردنی کۆمەڵگایەکی یەکگرتوو، پێش هەموو شتێک پێویستی بە تێگەیشتن لە "بەرژەوەندی گشتی"ی ئەم کۆمەڵگایەوە هەیە وەک میللەتێک. ئەگەر ئێمەی کورد لە هەموو ئاست و مەیدان و قەوارەیەکی سیاسی، کۆمەڵایەتی، ئابووری دا بەرژەوەندییە هاوبەشەکانمان بزانین و لە بەرژەوەندی گشتیی خۆمان تێبگەین، گومانی تێدا نیە کە ناتوانین یەکگرتوو نەبین. تێگەیشتن لە بەرژەوەندی گشتی و هەوڵدان بۆ وەدیهێنان و پاراستنییەتی کە دەتوانێ بەرژەوەندییە تاکەکەسی و گرووهی‌یەکانی کۆمەڵگا گەرەنتی بکات. بە واتایەکی دیکە و قسەی کۆتایی ئەوەیە کە:
ئەوە وەزن و قورسایی کورد و کوردستانە کە لە داهاتوودا دیاری دەکات چ حیزبێک و چ کەسێک و چ ئیدەیەک دەتوانێ ئیدیعای باشترین و بەهێزبوونی خۆی بکات. کەوابوو سەرەتا دەبێ بە هەموومانەوە هەوڵی وەدستهێنانی ئەو جێگەوپێگە گشتییەی خاک و خەڵکی خۆمان وەک "نەتەوە" و "نیشتمان" بدەین جا ئەوسایە جێگەو پێگەی تایبەتی خۆمان چ بە تاک چ بە رێکخراو مانای ئەرزشیی خۆی پەیدا دەکا.
