رووداوی تراژیکی کوژرانی فەریناز خوسرەوانی بەرادەیەک ویژدانهەژێن بوو کە ویژدانی هەموو کوردێکی وشیاری هەژاند. بۆیە نەدەکرا خەڵکی شاری مەهابادی مەکۆی کۆمارو پێشەواو هەزاران قارەمانی مەیدانی خەباتی ئازادیخوازانەی کوردستان وەک هەمیشە پێشەنگبوونی خۆیان نیشان نەدەنەوەو بەرانبەر بەم تاوان‌و ستەمە ویژدانهەژێنە بێدەنگ بمێننەوە. بۆیە ئەمجارەش وەک پووشپەڕی ١٣٨٤ ئەم شارە بۆوە بە دەروازەی هەستان‌و هەوێنی راپەرینێکی سەرانسەری لە رۆژهەڵاتی کوردستان. خەڵکی خەباتگێڕی مەهاباد بەو خۆپێشاندانە مەزنەیان نیشانیان دایەوە کە خەڵکی کوردستان بۆ رووبەڕووبوونەوە لەگەڵ ستەم‌و زۆرداری تەنیا یەک رێگایان لە بەر دەم‌‌دا ماوەتەوە، کە ئەویش بریتییە لە ناڕەزایەتی‌و بەرەنگاربوونەوەی جەماوەری. چونکە خەڵکی ئەم شارەو بەگشتی هەموو خەڵکی کوردستان بە ئەزموونێکی دوورودرێژ کە لە ساڵانی رەشی دەسەڵاتی رێژیمی ئیسلامی‌دا کۆیان کردۆتەوە دەزانن کە ناکرێ چووکترین متمانە بە دەزگا بەناو دادپەروەرییەکانی ئەم ریژیمە لە کوردستان بکرێ‌. خەڵکی مەهابادو کوردستان باش دەزانن رووداوی کوژرانی فەریناز خوسرەوانی درێژەی سەرکوت‌و ستەمکاریی‌و بێداییەکی سیستماتیکەیە کە هەر لە یەکەم رۆژەکانی هاتنە سەر کاری ئەم رێژیمە کۆنەپەرست‌و دژە کوردەوە دەستی پێ‌کردوەو هەروا درێژەی هەیە. بۆیە دەکرێ بڵێین راسانی ئەوان، راسانە لە دژی بێ‌مافی‌و سەرکوتی دەیان ساڵەی ئەم رێژیمە دژی خەڵکی کوردستان. راسانی خەڵکی مەهاباد لەگەڵ پشتیوانی‌و هاودڵیی خەڵکی رۆژهەڵات‌و بەشەکانی دیکەی کوردستان‌ رووبەڕوو بۆتەوە، بە چەشنێک کە چاوەڕوان دەکرێ لە بچووکترین دەرفەت‌دا راسانی شارو ناوچەکانی دیکەی رۆژهەڵاتی لێ‌بکەوێتەوە. رووداوەکانی رۆژانی رابردووی شارو ناوچەکانی دیکەی کوردستان‌و ئەو کەشە قورسە ئەمنییەتییەی لەو ناوچانە زاڵ کراوە نیشانەی روونی ئەم راستییەیە. جگە لەمە کەشی زاڵ بە سەر بیروڕای گشتیی ناوچەکانی دیکەی رۆژهەڵات دەریدەخا خەڵکی ئەو ناوچانە بە چاوی هیواوە دەڕواننە راسانی خەڵکی مەهاباد. روون بوو کە راسانی ئەمجارەی خەڵکی مەهاباد سەرکوت دەکرێ‌و ئەمجارەش هێزە سەرکوتکەرەکانی رێژیمی ئیسلامی بە چەکی جۆراوجۆر رووبەڕووی خۆپێشاندەران دەبنەوە. هەر واش بوو. بەپێی زانیارییەکان دەیان کەس بریندارو ژمارەیەکی زۆر زیاتریش قۆڵبەست‌و زیندانی کراون. بە لەبەرچاوگرتنی ئەم راستییە ی ئەمجارەی خەڵکی مەهاباد بە بێ سڵکردنەوە لە سەرکوت‌و لە سایەی وەرو بڕوای پتەوی خەڵکی ئەم شارە بە مافە نەتەوەییەکانیان‌و بێزاریی لە ستەم‌و سووکایەتی بە کەرامەتی مرۆڤانەو کوردانەیان هاتە ئاراوە. ئەمە راستییەکە کە دەبێ لە پێش‌دا دەسەڵاتدارانی تاران تامی تاڵی ئەو بچێژن‌و دەبێ بزانن نرخی گیانی مرۆڤەکانی ئەم وڵاتەو سووکایەتی بە کەرامەتی رۆڵەکانی کوردستان هێندەش کەم نیە کە ئەوان بیری لێدەکەنەوە. ئەوە دژکردەوەیەی تا ئێستا دیتوویانە لانیکەمی ئەو تێچوویەیە کە دەبێ بیدەن. بە دڵنیاییشەوە ئەگەر فشاری قورسی سەرکوت و داپڵۆسینی نامرۆڤانەو دڕندانە دەرفەت بدا لە سەرانسەری کورستان نرخی سەرەڕۆییەکانیان دەدەنەوە. چونکە ئەوە راستییەکە کە کوردستان لە ئاکامی سەرکوتی دەیان ساڵەدا نەک چۆکی دانەداوە، بەڵکوو بۆتە بۆمبێکی مەزنی ئامادەی تەقینەوە بە رووی بێدادگەران‌و چەوسێنەران‌دا. دەسەڵاتدارانی کۆنەپەرەستی تاران دەبێ باش لەم راستییە ئاگادار بن کە ئەگەریش توانیبێتیان بە هێزی زۆرو پڕچەک‌و سەرکوتکەر شەقامەکانی کوردستان کۆنتڕۆڵ بکەن، بەدڵنیاییەوە نەک ناتوانن هەموو رێگاکانی بەرەنگاربوونەوە لە رۆڵە خەباتکارەکانی کوردستان بگرن، بەڵکوو دەبێ چاوەڕاوان بەرەنگاریی توندو رادیکاڵیش بن. راسانی ئەمجارەی خەڵکی مەهاباد کە بەدڵنیاییەوە پشتیوانی‌و هاودڵیی خەڵکی ناوچەکانی دیکەی کوردستانیشی لە پشتە، دەتوانێ ببێتە سەرچاوەی ئەزموون‌و هەڵسەنگاندنێکی وردتر بۆ حیزب‌و لایەنەکانی نێو بزووتنەوەی رۆژهەڵاتی کوردستان. ئەزموونی ئەمجارە دەریخست کە: یەکەم، پێویستیی یەکگرتوویی‌و هەنگاو و گوتاری هاوبەش لە هەر کاتێک زیاتر هەست پێدەکرێ‌‌و درێژەدان بە پەرتەوازەیی دەرفەتی زێڕین لە کیس بزووتنەوەی نەتەوەیی رۆژهەڵاتی کوردستان دەدا. دووەم، هێنانە ئارای میتۆدی گونجاو لەگەڵ هەلومەرجی ئێستا بۆ خەبات‌و بەرەنگاربوونەوە. لانیکەم ئەزموونەکانی دوو دەیەی رابردوو دەریانخستوە کە بە ئەزموون وەرگرتن لە میتۆدەکانی پێشووی خەبات، پێویستە میتۆدی نوێ بۆ خەبات دابڕێژرێ. بە دڵنیاییەوە یەکگرتوویی‌و داڕشتنەوەی ستراتژیی بزووتنەوەی رۆژهەڵاتی کوردستان لەسەر بنەمای پوتانسیەل‌و هەلومەرجی رۆژهەڵاتی کوردستان‌و حیزبە سیاسییە شوێندانەرەکانی دەتوانێ وزەو گوڕێکی تایبەت بە کۆمەڵانی خەڵک ببەخشێ.