شەوی ١٩ی سەرماوەز تێکۆشەرانی دێموکرات لە شاری شنۆ و گوندەکانی سەربەوشارە بە بۆنەی ٢٦ی سەرماوەزەوە چالاکیی تەبلیغییان ئەنجام دا.
لە بەرەبەری ٢٦ی سەرماوەز ساڵرۆژی پێشمەرگەو ئاڵای کوردستان لە شاری شنۆ دێموکراتدۆست، لایەنگران و دۆستانی حیزب، لە چالاکییەکی تەبلیغاتی‌دا یادوناوی رۆژی پێشمەرگەو ئاڵای کوردستانیان بەرز ڕاگرت و بەو بۆنەیە بە نووسینی دروشمی شوڕشگێرانە و ناردنی سڵاو بۆ ڕێبەرانی شەهید لە شاری شنۆ تێکۆشانیان نواند.
ئەو شوێنانەی لە شاری شنۆ کە تێدا چالاکیی کراوە بریتین لە:
سێ ڕای سەعد ئەمینی، گوندەکانی سینگان، بێمزوورتێ، پووشاوێ، خاڵتاوێ، سەیداوێ، و رێگای نەڵۆس و لە گەڵ چەندین شوێنی دیکەی ئەو شارە.
هەوروەها لە درێژەی چالاکییەکان بە بۆنەی ٢٦ی سەرماوەز شەوی ڕابردوو دۆستان و ئۆگرانی حیزبی دێموکراتی کوردستان لە شاری ڕوانسەر بۆ ڕیزگرتن لە پێشمەرگەو ئاڵای کوردستان بە بڵاوکردنەوەی تراکت و نووسینی دروشمی شۆڕشگێڕانە لەو بۆنە نەتەوەییە رێزیان گرت.
خەمخۆران و لایەنگرانی خەباتکارانی کورد لە شاری ڕوانسەر چاونەترسانە لە شەقامەکانی وروودیی شار، سێ‌ڕای ڕوانسەر، شەقامی بەهار، پارکی شکۆفە، پارکی فەرهەنگیان، موهاجرینی ڕوانسەر و چەند گەڕەک و کۆڵانی دیکەی ئەوشارە چالاکیی تەبلیغییان ئەنجام داوەو وەفاداری خۆیانیان بە ڕێبازی پێشمەرگانە دووپات کردووتەوە.
شایانی باسە لە دەسپێکی مانگی سەرماوەزەوە لە ناوچە جیاجیاکانی کوردستان دۆستان و تێکۆشەرانی دێموکرات بە چالاکیی تەبلیغی پێشوازییان لە یادی نەتەوەیی واتە رۆژی پێشمەرگەو ئاڵای کوردستان وەکوو دووهێمای نەتەوەیی و یادگار لە کۆماری کوردستان کردوەوە، ئەو یادکرنەوە هەروا بەردەوامە.
هەروەها لە هەفتەی ڕابردوو لە پارێزگای ئیلام و شاری ئیلام چەند جار تێکۆشەرانی ئیلامی، سەربەڕێکخستنەکانی حیزبی دێموکراتی کوردستان بەشێوە بەربڵاو یادی ٢٦ی سەرماوەزیان بەرز ڕاگرت.
هەروەها شەوی ١٨ سەرماوەز لە شارەکانی مەهاباد و بۆکان و سنە لایەنگرانی بەئەمەگی حیزب لە چالاکییەکی تەبلیغاتی‌دا پێشوازییان لە ٢٦ی سەماوەز کرد.
کۆمسیۆنی تەشکیلاتی حیزبی دێموکراتی کوردستان سەرلەنوێ سپاسی سەرجەم دۆستان و لایەنگرانی حیزب دەکا و سڵاوی تایبەت بۆ دۆستانی خۆی شاری شنۆ و ڕوانسەر دەنێرێ.
