کۆمیسیۆنی ئامووزش لە درێژەی چالاکییەکانی خۆی، پێش‌نیوەڕۆی رۆژی دووشەممە رێکەوتی ٢٤ی بانەمەڕ لە یەکێک لە سالۆنەکانی بنکەی سەرەکیی حیزبی دێموکراتی کوردستان سیمینارێکی بۆ هاوڕێ ئەسعەد یووسفی لە ژێرناوی شوێنەواری نەوت لە هاوکێشەسیاسییەکانی کوردستان پێکهێنا.
بەڕێز ئەسعەد یووسفی ئەندامی حیزب و نیشتەجێی وڵاتی سوئید، لەو سیمینارەدا بە وردی ئاوری لە گرینگی نەوت و سیاسەتی نەوتی لە دنیا دایەوەو بۆ ئەوەی ئامادەبووان زیاتر بە باسەکەی خۆی ئاشنا بکا سەرەتا پێشەکییەکی باس کرد.
ناوبراو لە سێ تەوەر گرینگی و شوێندانەری نەوتی لە ئاستی هاوکێشەکانی جیهان و بەتایبەتی لەسەر کوردستان پۆلێن‌بەندی کردو ، لە سەرهەر کام لە تەوەرەکان بە پێی دەرفەت قسەی کرد.
ئەسعەدیووسفی بە وەبیرهێنانەوەی مێژووی دۆزینەوەو بەرهەمهێنانی نەوت لە جیهان، بە خستنە بەرباسی کاریگەرییەکانی بەسەر ئاڵوگۆڕەکانی جیهان و مامەڵەی زلهێزان، بەتایبەتی لە شەڕی جیهانی دوویەم بەملاوە، درێژەی بە قسەکانیدا.
ئەوەی کە نەوت و سیاسەتی نێودەوڵەتی بە جۆرێک پێکەوە گرێدراون و ئێستاشی لەگەڵ بێ، لە زۆرێک لە رووداوە سیاسییەکان لە جیهان و بەتایبەتی لە رۆژهەڵاتی ناڤین پێوەندی ڕاستەوخۆ و ناڕاستەوخۆیان لەگەڵ نەوت هەیە ، بەشێکی دیکە لە وتەکانی ئەسعەد یووسفی بوو.
کۆڕگێڕ بە نموونەهێناوە لە ئاڵوگۆڕە سیاسییەکان و ڕەفتاری سیاسی زلهێزان لەگەل وڵاتانی رۆژهەڵاتی ناوەڕاست بەتایبەتی عیراق و ئێران باسی لە پێگە و گرینگی نەوت لە بەرنامەڕێژیی سیاسی و بلۆک‌بەندیی وڵاتان کرد و چەند خاڵی جێگای سەرنجی باس کرد.
پاشان بە ئاوردانەوەیەک لەو وڵاتانە کە کوردی تێدا دابەشکراوە، بەتایبەتی وڵاتی عێراق و ئێران درێژەی بە باسەکەی خۆی دا.
ئەسعەدیووسفی لە بەشێک لە قسەکانی بە باس کردن لە هەڵکەوتوویی جوغرافیایی باشووری کوردستان و شێوە مامەڵە کردنی دەوڵەتی ناوەندی و زلهێزەکان، گرفتەکان و دەسکەوتەکانی ئەو بەشەی کوردستانی لە روانگەی سیاسەتی نەوتییەوە باس کرد.
ناوبراو بەم پرسیارەوە کە ئایا نەوت دەتوانێ دێموکراسی بۆ وڵاتانی خاوەن نەوت بەرهەم بهێنێ یان دیکتاتۆری ؟ ، ڕاونگە و بیروبۆچوونی بیرمەندان و کارناسانی لەو بارەوە بۆ ئامادەبووان خستەڕوو.
لەو بەشە‌دا گوتی: ئابووری یەکڕەهەندی و نەبوونی سیستەمی ماڵیات و پشتبەستن تەنیا بە بەرهەمهێنان و هەناردە کردنی نەوت، لە هێندێک وڵات ڕێگر بۆوە لە گەشەی دێموکراسی و هەر بۆیە دیکتاتۆری لێکەوتووتەوە.
هەروەها نموونەشی هێناوە کە نەوت دەتوانێ لە گەشی کۆمەڵگەو هەنگاونان بەرەو دێموکراسیەت کاریگەریی باشی هەبێ.
ئەسعەد یووسفی لە بەشی کۆتایی قسەکانیدا باسی لە دیپلۆماسی فارس وەکوو نەتەوەی باڵادەست لە ئێران کرد کە ئێستاشی لەگەڵ بێ لە پێناوی بەرژەوەندی و مانەوەی دەسەڵاتی خۆیان پەنا بۆ هەرجۆر چەواشکاریی و "دیپلۆماسی درۆ" دەبەن و، شاهیدی دەستێوەردانەکانی ئەو رێژیمە هەین لە وڵاتانی ناوچە و خاوەن نەوت.
لە بەشی کۆتایی ئەو سیمینارە چەند کەس لە ئامادەبووان پرسیار و تێبینی خۆیانیان باس کرد و دواتر لە لایەن کۆڕگێڕەوە وڵامدرانەوە.
