شەهید ئەحمەد موزەفەری، ناسراو بە «ئەحلەمسری» ساڵی ١٣٤٠ـی هەتاوی لە داوێنی بنه‌ماڵه‌یه‌كی هه‌ژار و زه‌حمه‌تكێشی ئاوایی «پشتە»ی ڕەوانسەر چاوی دنیا هەڵێنا. قۆناغی منداڵیی ناوبراویش وێڕای زۆربه‌ی منداڵە گوندنشینه‌كانی كورده‌واریی ئه‌و سه‌رده‌مه له بێ‌به‌شی و نه‌دارییدا تێپه‌ڕ بوو، له‌به‌ر نزمیی باری ژیانی نه‌یتوانی بچێته قوتابخانه و له خوێندنگه بێ‌به‌ش مایه‌وه و بۆ باشتر كردنی ژیانی بنه‌ماڵه ڕووی له كاری ڕه‌نجبه‌ری كرد. ناوبراو ٤ خوشک و برایەک و دایکێکی پیری هه‌بوو به ناوی «پووره میسری» و هه‌ر به خۆشه‌ویستیی دایکییه‌وه ناوی لێ نرا بوو «ئه‌حله‌مسری».
لەگەڵ ڕاپه‌ڕینی خه‌ڵك به‌دژی حكوومه‌تی گه‌نده‌ڵی شاهه‌نشاهی، ئه‌ویش شانبه‌شانی لاوانی وڵات له‌و ڕاپه‌ڕینه‌دا به‌شداریی كرد، به‌و ئامانجه كه حكوومه‌تی شا بڕووخێ و گه‌له‌كه‌ی به مافه سیاسی و كۆمه‌ڵایه‌تییه‌كانی بگا. به‌ڵام كه دیتی به هاتنه سه‌ر كاری ڕێژیمی كۆماری ئیسلامی، ده‌سكه‌وته‌كانی شۆڕش خرانه ژێرپێ و دیكتاتۆرییه‌كی تازه باڵی به‌سه‌ر ئێراندا كێشاوه و كه‌وتۆته سه‌ركوتكردنی ئازادی و مافه ڕه‌واكانی گه‌لانی ئێران و له به‌رامبه‌ریشدا خه‌ڵكی كوردستان به ڕێبه‌رایه‌تیی حیزبی دێموكراتی كوردستان، داکۆکی له ماف و مه‌وجوودیه‌تی خۆی دەکا و بۆ ئه‌م مه‌به‌سته‌ش هه‌زاران لاوی ئازا و به‌جه‌رگ چه‌كی پێشمه‌رگایه‌تییان كردووەته شان و به‌ره‌نگاری له‌شكریانی جه‌هل و نه‌زانی بوونه‌ته‌وه، لە ساڵی ١٣٥٩ـی هه‌تاوی چه‌كی پێشمه‌رگایه‌تیی كرده شان و له هێزی بێستووندا ڕێک خرا. به‌م جۆره قۆناغێكی تازه له ژیانی ئەحمەد موزەفەریدا ده‌ستی پێ‌كرد.
ئه‌حله‌مسری به‌بێ ئه‌وه‌ی ڕۆژێ له ڕۆژان چه‌کی بینیبێ یان دەورەیەکی سه‌ربازیی دیتبێ و بەبێ ئه‌وه‌ی خۆێنده‌واریی هه‌بێ، بەهۆی ژیری و تایبەتمەندییە دیار و بەرچاوەکانی ببوو به فه‌رمانده‌یه‌کی ئازا، بوێر و به‌جه‌رگ که خۆی بەته‌نیا هێزێک و له هێزدا وره‌بەخش و له شه‌ڕدا یەک پارچە ئاگر بوو. ئەحمەد لاوێكی ژیر و ڕۆح‌سووك بوو. پڕ لە هەستی شۆڕشگێڕانه بوو، ئیمانێكی قووڵی به سیاسه‌ته‌كانی حیزب و ڕێبازی بزووتنه‌وه‌ی گه‌له‌كه‌ی هه‌بوو، به دیسیپلین بوو، له شه‌ڕه‌كاندا هه‌میشه له سه‌نگه‌ری پێشه‌وه‌دا بوو. به هۆی ئازایه‌تی و لێوه‌شاوه‌یی بەرپرسایەتیی پێ‌سپێردرا و چەندین عەمەلیاتی ئازایانەی بەڕێوە برد، دواتر وەک فەرماندەری لکی شەهید محەممەد شەریف دیاری کرا.
شەهید شاپووری فیروزی لە نووسراوەکانی خۆیدا بەم جۆرە باسی شەهید ئەحلەمسری دەکا:
«ئەگەر باسی ئەحمەدمسری بکەم و چەندین ساڵ دانیشم باس لە سەداقەت، داوێنپاکی، حەقیقەت، ئینسانیەت، قارەمانەتی، فیداکاری و لەخۆ بردوویی بکەم هێشتا هیچم باس نەکردوە. کوڕێکی قەدباریک و لاوێکی ژیکەڵە و لەسەرەخۆ بوو، زۆر کەم‌تەوەقوع، کەم‌دوێن و مەتین، شەرەف و کەرامەت لە هەموو وجوودی دەباری، لەگەڵ ئەوەی لاوێکی کەم‌تەمەن بوو بەڵام وەک باوک ڕەفتاری لەگەڵ پێشمەرگەکانی ژێردەستی دەکرد، تەنانەت زۆرجار بۆ شۆردنی لیباس یارمەتیی پێشمەرگەکانی دەکرد. بەدەیان جار بۆ پەیدا کردنی پارووە نانێک بۆ هاوسەنگەرانی خۆی لە مەترسی هاویشت، کەسێکی پا‌کوخاوێن، ڕەخت و تفەنگ خاوێن، لە کاتی شەڕ لەگەڵ دوژمن دەتکوت خۆی بۆ شایی و بەزموڕەزم ئامادە دەکا هەمیشە لە شەڕدا وەک هەڵۆ وا بوو، دوژمن لە بەرامبەریدا هەمیشە زەبوون بوو. لەم سەنگەر بۆ ئەو سەنگەر، لەم شاخ بۆ ئەو شاخ، ماندوویی نەناسانە پێشمەرگەکانی سازمان دەدا. تەنانەت جارێک لە شەڕێکدا لە نێوان «لۆنەکۆن» و «لۆن‌سادات» و «بێڵەوار» بە تەنیا ٤ ماشین کە هەڵگری دۆشکە و نەفەرات بوون، دەردێکی بە هیزی دوژمن کرد کە هەموویان ڕایان کرد و بەتەنیا هەر ٤ ماشینەکەی ئاگردا.»
شەهید ئەحمەد موزەفەری ئەوەندە قارەمان بوو ڕێژیمی کۆماری ئیسلامی لەوکاتدا بۆ کوشتنی یەک میلیۆن تمەنی بە جاسووسێک دابوو مەسموومی بکا، بەڵام کاتێک جاسووسەکە چاوی پێی دەکەوێ و هەڵسوکەوتی شەهید ئەحلەمسری دەبینێ دەست بۆ ئەو جینایەتە نابا و پەشیمان دەبێتەوە.
شەهید ئەحلەمسری لەو کاتەوە ڕیزی خه‌باتكارانی حیزبی دێموكراتی كوردستانی هه‌ڵبژاردبوو، وازی لە ژیانی ئاسایی خۆی هێنابوو. هه‌ر له ڕۆژه‌كانی یه‌كه‌مه‌وه بوو به خۆشه‌ویستی هاوسه‌نگه‌رانی، ئازایه‌تی و بوێری لە تایبه‌تمه‌ندییه‌كانی هه‌ره به‌رزی بوو، قاره‌مانه‌تیی ئه‌و له شه‌ڕه‌كانی «کەشکەمیر» کە گوردانی زەربەتی کامیاران بەتەواوی تەفروتوونا بوو، چیای «زەڕنە» کە چەندین جار ڕووی دا، جادەی سنە-هەمەدان لە نزیک پادگانی «مووژەژ» کە فەرماندەی بەدناوی سپای پاسدران «تالبی» کوژرا، شەڕی ١٤ سەعاتەی «چەمشار»، شەڕی ئاواییەکانی «تەجەرە»، «میراوا»، «نەڕان»، «سمان»، «قەسریان»، «چناران»، لە شەڕی گرتنی ٦ پایەگای ڕێژیم لە گوندەکانی «نییەر»، «تەنگیسەر» و «میراو»، هەروەها لە تێکشکاندنی گەمارۆی گەورەی سەر هێزی بێستوون لە بەرزاییەکانی «تا»، «گڵیان» و «پەشاوە»، به‌شێك له‌و تابلۆ جوامێرانه‌یه كه ئەحمەد موزەفەری به ئازایه‌تیی نه‌خشاندوویه‌تی و شایه‌دی بۆ بوێری و ئازایه‌تیی ئه‌و شۆڕه سواره ده‌ده‌ن. خۆشه‌ویستترین سەرمایە لای مرۆڤ گیانە و شه‌هید بەئاسانی به‌خشیویه به نیشتمان، ئه‌وه باوه‌ڕی قووڵی ئەحلەمسری بوو بۆیه‌ش له هیچ گیان‌فیداییه‌ك سڵی نه‌كرده‌وه.
شەو و ڕۆژ، گەرما و سەرما، شیو و دۆڵ، تەلان و بەندەن، هەوراز و نشێو، قەتپاڵ و لێڕەوار و خەڵكی قارەمانی کامیاران، ڕوانسەر، ژاوەرۆ و بێڵەوار هەموو شاهیدی بۆ ڕۆڵەی تێکۆشەری دێموکرات دەدەن کە چەندە لەخۆ بردوو، ئازا و فیداکار و بەبڕشت بوو.
بەداخەوە ڕۆژی ٢٢ـی ڕێبەندانی ساڵی ١٣٦٣ کە بەرەو ناوچەی کامیاران دەگەڕانەوە، لە نزیک ئاوایی «وشکەڵان»ـی مەریوان کەوتنە کەمینی کۆمەڵە و لەگەڵ ٧ هاوسەنگەری دیکەی بە ناوەکانی «هووشیار منبری»، «هاشم منبری»، «واسع منبری»، «غەفار ئازادوەند»، «عەلی جواهیری»، «بەشیر سوبحانی» و «سەعدی ڕەحمانی» گیانی خۆیان پێشكه‌ش به ئازادی كرد و به خوێنی خۆیان لاپه‌ڕه‌یه‌كی زێڕینیان بۆ نه‌ته‌وه‌كه‌یان تۆمار كرد.
