حوسێن سەفامەنش یەک لە سیما ناسراوەکانی هونەری ئاواز و گۆرانی کوردییە. ئەو هونەرمەندە بوێر و گەل خۆشەویستەی کورد ساڵی ١٣٥٥ی هەتاوی لە پارێزگای کرماشان مەڵبەندی مێژوو ئەوین لەدایک بووە. لە دەورانی خوێندنی سەرەتای هەستی خۆشەویستیی گۆرانی لا دروست دەبێ و، هومێدی تەمەن و خۆلیاکانی تێدا دەبینێتەوە. ئەم ئارەزووە ڕەنگینە حوسێن قووڵتر پەلکێشی گۆرەپانی ئاواز و مۆسیقا دەکا. وەک بۆخۆی دەڵێ دەنگی هونەرمەندی ئوستورەی کورد ناسر ڕەزازی دەبێتە سەرچاوە و هەڵدەڕژێتە پێدەشتی هونەری سەفامەنشەوە و ڤەژەنی ئاواز لەو سیمایەوە دەگەشێتەوە و ڕووحی پتر بە ناخی میلۆدی و زمانی گەلەکەیدا ڕۆ دەچی و، لە شنەی ئەم خەیاڵەوە تەیری هومێدی باڵ دەگرێ و لە شاری مەهاباد دەگیرسێتەوە.
حوسێن سەفامەنش لە مەهاباد لەگەڵ هونەرمەندان موحسێن گوڵپەرست، نەوزاد خەتات و لاوک لەتیف، ئاشنا دەبێ و یەکەم بەرهەمی هونەریی خۆی بەناوی "خویشگە خاسەکەم" تۆمار دەکا کە دەبێتە مایەی دڵخۆشیی ئۆگرانی هونەر. دەنگدانەوەی دەنگ‌خۆشی زیاتر دەنەی حوسێنی لاو دەدا و بە شوێن بەستە و مقەامات و هۆنراوەدا دەخولێتەوە و، وەک ئاشقێکی بێ‌قەرار ئارامیی لێ هەڵدەگیرێ و لە ڕاوێچکەی ئێوارانی خەوخەیاڵی بە دەوری ئەو سۆزەدا دەسوڕێتەوە.
سەفامەنش ساڵی ١٣٧٩ی هەتاوی دەگەڕێتەوە کرماشان و لە تالاری برق کونسێرتێک بە شێوازی پاپ پێشکەش دەکا، ئەم جارەشیان سەرنجی جەماوەر بۆ لای خۆی ڕادەکێشێ و چریکەی دەبێتە سەمفۆنیایەک و ئارامی بە کۆمەڵگەی وڵاتەکەی دەبەخشێ و بە ئەزموونێکی کامڵترەوە شۆڕ دەبێتەوە نێو زەریای هونەر و سەر بە گێژاو و شەپۆلەکان دادەکا و لە ڕاز و لرفە و هاوار و هەڕەشەیان تێ‌دەگا و هیوایەتێکی گەورەی تێدا بەدی دەکرێ. بەمجۆرە ساڵی ١٣٨٥ی هەتاوی ئاڵبۆمی "ئێوارە" (غروب) لە کازیوەدا دەگەشێتەوە.
لە درێژەی ئەم چالاکیە هونەرییانەدا لە زۆربەی شارەکانی کوردستان و ناوەندی ئێران کۆ ڕ و کۆنسرت دەگێڕێ و لە فستیڤاڵی مووسیقیی سوننەتیی شاری تاران خەلاتی یەکەم بە دەست دێنێ، پاشان سروشتی وڵاتەکەی بێشکەی ئارامی ڕادەژێنێ و باکڕاوەندی تێروتەسەل لە ژێی ساز و پەردەی مووسیقا و ئاوازی گەلەکەی دەبنە تریفەی ئەستێرە و هەیبەتی نیشتمانەکەی زینەتی گۆرانی و تەحریری سۆزی دەگەشێنێتەوە. ئیتر شەوارەی ترس و تۆقان شەفەقی گلێنەی پێدانایە و، ڕۆچنەی ئاسۆی داناپۆشێ و وەک سروەی بەیانیی زاگڕۆس لە زمانی شیرینی لەکی، کەڵهوری، سۆرانی، هەورامی و، کرمانجیەوە دەشنێتەوە.
هونەری حوسێن ناسنامەی نیشتمانێکە، کە میراتگری مێژوی گاتاکانی زەردەشت و سیمای شارستانیەتی کەونارای یارسانە کە لە ژێیەکانی تەلموورەوە دەنوێنێ، ئەو گەلەی ماد لە ئاوێنەی ڕواڵەتیدا دەدرەوشێتەوە، دەستی پێ لە شکۆی خۆی هەڵ‌ناگیرێ و ناهێڵی گەردەلولی پیلان و دەهۆی داگیرکەران دیمەنی سروشتی بشێوێنێ و ڕۆڵەی وڵات‌پارێز و تۆرەمەی لە خوێنی خۆی دەخاتەوە. سەفامەنش لە گرکانی لاوژەی ئەم ئاهورایەوە سەری هەڵ‌داوە و، هەستی لە فۆڕم و نەوای مێژووی سەرسەخت و لە ئاونەچووی سیاچەمانەوە هەڵ قوڵاوە و لە سەنگەری چیا و هەیبەتی کوردایەتیدا باڵای کردوە و، دژ بە هەژموونیی چەوتی دەسەڵات و بنەبڕ کردنی قەڵافەتی ئازادی ڕاساوە و حاشا لە پاوانخواز نەریتییەکان دەکا و لە ڕوانگەی یاساییەوە بۆ مافی ڕەوای دەڕوانێ و هانا دەباتە بەر ویژدانی مرۆڤایەتی و داوای تەبایی جیهان دەکا و، بانگەوازی ئاشتی‌خوازانەی گەلەکەی دەسەلمێنێ.
وەک ئاشکرایە ماوەی چل ساڵە کۆماری ئیسلامی بە هەموو جورێک دژی زمان و هونەری گەلی کورد وەستاوەتەوە و بە هەر چەشنێک بۆی کرابی، لە هەوڵی سرینەوەی مێژووی وڵاتی کورداندا بووە، بەڵام هونەرمەندان و ئەدیبانی ئەم زێدە زێڕینە مۆڵەتی پاستاوکردنی خاکەکەیان بەو دەسەڵاتە مرۆڤ‌کوژە نەداوە و زمان و هونەریان لە قەوارە و شکۆی خۆیدا هێشتۆتەوە و، لە باشووری ڕۆژهەڵاتی خۆشەویستدا هەروا لە گەشەکردن‌دایە، ئەوینی ئەم ڕێبازە پیڕۆزی خۆی پاراستوە و، بۆ وەدیهێنانی ئامانجەکانی گەوە و تەرت و هەڵەمووتەکانی بڕیوە و بەرەو لووتکەی هیواکانی هەڵکشاوە، بۆیە ئاسۆی لێ نزیکە و تیشکی خۆری تێ‌ڕژاوە.
ئەم هۆنەرە تەنیا لە خەیاڵ و وشەدا ڕەسالەتی کۆ ناکرێتەوە و ڕستەی کورتی ئەم بابەتەش دەستی بە باڵی هەڵ‌ناگا و قامووسی زمان و هەستی پێ نانووسرێ و ڕازی دڵی ناکاتەوە، هەر ئەوەندی لێ‌دەزانێ بەرامەی ئەو تۆپە گوڵە چوار سنووری داگرتوە و ڕەنگی هەڵگورد و، کوچکەڕەش و، بێستوونی لێ نیشتووە.
