كوردستان میدیا: كۆمیسیۆنی تەشكیلاتی حیزبی دێمۆكراتی كوردستانی ئێران سپاسنامەیەكی روو بە ئەندامان و لایەنگرانی حیزبی دێمۆکرات ‌و خەڵكی بەئەمەگ ‌و مافخوازی كوردستان بڵاو كردەوە.
دەقی سپاسنامەكە:
سپاسنامەی كۆمیسیۆنی تەشكیلاتی حیزبی دێمۆكراتی كوردستانی ئێران بۆ ئەندامان، لایەنگران ‌و خەڵكی بەئەمەگ ‌و مافخوازی كوردستان

ئەمساڵیش، وەك نەریتی ساڵانی رابردوو، لە سەر‌ووبەندی ٢٢ی پووشپەڕ، ساڵڕۆژی تیرۆركرانی د. عەبدولڕەحمان قاسملوو ‌و هاوڕێیانی بە دەستی دیپلۆمات تیرۆریستەكانی كۆماری ئیسلامی ئێران، لەسەر بانگەوازی كۆمیسیۆنی تەشكیلات بۆ بەرز راگرتنی یاد ‌و بیرەوەری ‌و خەباتی پڕ لەشانازی ئەو شەهیدانە ‌و هەروەها بۆ مەحكووم كردنی تیرۆریزمی دەوڵەتیی كۆماری ئیسلامی ئێران، خەڵكی بە ئەمەگی كوردستان ‌و تێكۆشەرانی وەفادار بە رێبازی د. قاسملوو، بە بەڕێوەبردنی كار ‌و چالاكی تەبلیغی تایبەت بەو بۆنەیە( نووسینی دروشمی شۆڕشگێڕانە ‌و بڵاوكردنەوەی تراكت ‌و پوستێری تەبلیغی، لەبەر كردنی جل‌و بەرگی كورد، كوژاندنەوەی چرای ماڵەكان بۆ ماوەی ٣ خولەك لەشەوی ٢٢ی پووشپەڕ ‌و هەروەها سەرلە نوێ دەست نیشان كردنەوەی ئەو مەیدان ‌و شەقامانەی كە پێشتر بەناوی د. قاسملوو ناودێر كراون) جارێكی دیكە رێز ‌و وەفاداری خۆیان بە رێبازی قاسملووی رێبەر دووپات كردەوە ‌و پیشانیان دا كە د. قاسملوو لە رێبازیدا زیندووە.
وێڕای پێزانین ‌و دەست خۆشی لە ئەندامان ‌و لایەنگران ‌و خەڵكی تێكۆشەر ‌و خەباتكاری كوردستان، لەو پێوەندییەدا، هەست ‌و بیری هاوخەباتی ‌و هاوپێوەندی كۆمەڵانی خەڵكی كوردستان بەرز دەنرخێنین ‌و ئومێدی بەردەوامی ‌و درێژە پێدانی خەبات دەكەین بۆ گەیشتن بە سەركەوتن.



حیزبی دێمۆكراتی كوردستانی ئێران

كۆمیسیۆنی تەشكیلات

٢٤ی پووشپەڕی ١٣٩٢ی هەتاوی