لەبەهاری ساڵی ١٣٦٢ی هەتاویدا کۆماری ئیسڵامی وەک هەمیشە تەمای لە جادە سەرەکییەکانی نێوان شارەکان کردبوو بۆ ئەوەی زیاتر دەسەڵاتی ڕەشی خۆی بەسەر کوردستاندا بسەپێنێ. یەکێک لەو جادانە ڕێگای نێوان سەردەشت _ پیرانشار بوو کە تا بەهاری ئەوساڵە چەند‌جار بە تاکتیکی جیاواز هێرشی کردبووه سه‌ر، به‌ڵام نەیتوانیبوو داگیری بکا و ئێستا لەدەسپێکی بەهارەوە خۆی بۆ ئامادە کرد و زیاتر لە دوو مانگ لەو جادە شەڕ لە نێوان هێزی داگیرکەر و هێزی پێشمەرگەی دێموکرات درێژەی کێشا.
بەداگیر کردنی ئەو ڕێگایە بەشێک لەگوندەکانی ئەو ناوچەش کەوتنە دەستی هیزی داگیرکەر و زەبروزەنگی پۆستاڵ لەپێیان بەسەر ناوچەکە‌دا زاڵ بوو. دوای ئه‌و بارودۆخه ژیان له خه‌ڵکی هه‌ڵگیرا. زه‌بروزه‌نگ بڕستی له خه‌ڵکی بڕی و به‌هۆی پڕکێشیی هێزه‌کانی ڕێژیم و ده‌ستدرێژی و زۆردارییان حه‌جمین له خه‌ڵکی ناوچه‌که هه‌ڵگیرابوو. که‌شی ترس و دڵه‌ڕاوکێ وه‌ها به‌سه‌ر ناوچه‌دا زاڵ ببوو که زۆر که‌س تا خوێندنی کەڵەبابی بەیانی بەخەبەر بوون و بۆ ساتیکیش خەو نەدەچوو چاویان. لەو دنیا تاریک سامناکە‌دا ته‌نیا تروسکەی هیوا بوونی پێشمەرگە بوو که دڕی به شه‌وه‌زه‌نگی بێدادی ده‌دا و خه‌ڵکی به ته‌مای داهاتوویه‌کی گه‌ش ڕاده‌گرت و له‌هه‌ر زه‌برێکدا که ده‌یگه‌یانده په‌یکه‌ری دوژمن، دڵخۆشییه‌کی تایبه‌تیی ده‌دا به خه‌ڵکی کوردستان.
ڕۆژان و مانگ تێده‌په‌ڕێن و هه‌موو ڕۆژێک حه‌ماسه و خوێن بوو. که‌م ڕۆژ هه‌بوو حه‌ماسه‌یه‌ک له مێژووی سه‌روه‌ریی کورددا تۆمار نه‌کرێ و گه‌لێ جاریش له‌و پێناوه‌دا دڵی پڕ لەئاواتی ڕۆڵە بەجەرگ و لە خۆبووردووه‌کان ده‌که‌وته به‌ر تیری دوژمن و له لێدان ده‌که‌وت. بەڵام ئه‌وه‌ی تۆوی هیوای دواڕۆژێکی گه‌شی له دڵدا ده‌چاند ئه‌وه بوو که له‌گه‌ڵ گلانی هه‌ر شۆره‌سوارێک چەند شه‌نگه‌لاوی دیکە جێی ده‌گرتنه‌وه و تاویان ده‌دایه چه‌که‌کانیان و سه‌نگه‌ری خه‌باتیان ئاوه‌دان ڕاده‌گرت.
دوای داگیرکردنی جادەی سەردەشت _ پیرانشار و زاڵبوونی که‌شی ترس و سه‌رکوت و نواندنی جۆرێک هه‌یمه‌نه و هه‌یبه‌ت له هێزه‌کانی کۆماری ئیسلامی، هێزی پێشمه‌رگه لێ بڕابوو ئه‌و هه‌یبه‌ته بشکێنێ. فەرماندەکانی هێزی پێشمەرگە له‌و ناوچه‌یه بڕیاریان دابوو تا بە یادی شەهیدان بەهاری ١٣٦٢ی جادەی سەردەشت _ پیرانشار زەبرێکی قورس لە هێزه‌کانی کۆماری ئیسلامی بدەن.
رۆژی ٢٤ی جۆزەردانی ساڵی ١٣٦٢ی هەتاوی که هێزەکانی کۆماری ئیسلامی سەرمەستی گرتنی جادەی سەردەشت _ پیرانشار بوون و پێیان وابوو هیج پێشمەرگەیەک لەو ناوچەیە نەماوە و بەمەیلی خۆیان دەتوانن تراتێن بکه‌ن بۆ ئه‌وان ڕۆژێکی ڕه‌ش بوو.
پێشمەرگە بۆ زەبر وەشاندن گەڵاڵەیەکی جوان و بە بەرنامەی له نێو جەرگەی دوژمندا داڕشتبوو و وێڕای ئەوە لە باری جوغرافییایی لە ناوچە شارەزا بوون بڕیاری زۆر گرینگ و بەتایبەتی لە کاتی خۆیدا درا، کە بتوانن هەموو بۆشاییەکانی ئەو ماوەیەی رابردوو پڕ بکەنەوە و سەلماندیان کە دوژمن خه‌یاڵی خاوه و خاکی کوردستان نه جێگه‌ی چه‌قه‌ڵ و گورگی له‌و چه‌شنه‌ن.
ناوچه‌که ته‌واو نیزامی و ئه‌منیه‌تی بوو. دوژمن چەندین مۆڵگەی کۆک و پۆشته‌ی لە سەر ڕێگا و لە گوندەکان و به‌رزاییه هه‌ستیاره‌کان دانابوو و سەرەڕای ئەو هەمووە پایەگایە هێزەکانی ڕیژیم لە نیوان پایەگاکانی گردەسوور، گرد مەرقەد، لاوێن، ڕکاوێ، گردگۆران، گەپڵەسەن، وتماناوێ، شیناوێ، زێدان و جەڕان لە ناوچەی پیرانشار بڵاوه‌یان پێ کرابوو. ئه‌وه بوو که هێزی پێشمه‌رگه لە عەمەلیاتێکی جەسوورانە وبەربڵاودا دوژمنیان خستە کەمینی خۆیان. شه‌ڕێکی قورس ده‌ستی پێکرد و قرمه‌ی چه‌ک و تفه‌نگی پێشمه‌رگه کاتێ بێده‌نگ بوو که که‌لاکی١٣٠ کەس له هێزه‌کانی دوژمن له شه‌ڕگه‌دا که‌وتبوون که ژماره‌یه‌ک له‌وان بریندار بوون و ٩ کەسیشیان لێ بەدیل گیرابوو. جیا له‌و زیانه گیانییه زۆر و قورسه‌ی دوژمن چەک و چۆڵێکی بەرچاویش بەدەسکەوت گیرا، به‌ڵام ئه‌و زەبره کاریگەر و قورسه له دوژمن بە خوێنی ٥ قارەمان وه‌ده‌ست هاتبوون. شه‌هیدانی ئه‌و حه‌ماسه‌یه مستەفا عەلیپور، مستەفا سەلیمی، ڕەحمان ئەمینی، محمد دغۆ و عەوڵا پاییزە بوون که داستانێکی دیکه‌یان له نه‌به‌ردیی هێزی پێشمه‌رگه نووسییه‌وه.
ئەو عه‌مه‌لیات و سەرکەوتنە جێگای خۆیەتی لەچەند بارەوەتیشکی بخرێته سه‌ر: خۆسازماندانی هیزی پیشمەرگە و ئاگری توندی ئەوان بۆ سەر دوژمن تینی بۆ هەموو قوژبنێک دا و بەرچاوی خەڵکی ناوچەی ڕوون کردەوە و لەشی سەرمای تەزیوی ڕووت وهەژارانی گەرم کردەوە. ئەو زەبرە کاریگەرە دەمی خونچەی گوڵی ئاواتی کردەوە و هەموو حەماسەکانی ئەو مەڵبەندەیان بیر ڕۆڵەکانیان هێنایەوە. ئەو دوژمنەی کە خوێن وئازادیی خەڵكی له شووشه کردبوو، موڵگەی خۆی نەدەناسییەوە و سه‌ری لێ شێوابوو. ئەو عەمەلیاتە بۆ ئەوان بوو بە دەرسێک کە له‌گه‌ڵ هەر هەنگاوێکیان لەسەر ئەو خاکە پیرۆزە دەسەڵەمینەوە. وەشاندنی ئەو گورزە گەورەیه‌ی هێزی پێشمەرگە لە دڵرەشان، ئێستاش وەک بەڵگەیەکی ئازایەتی و قارەمانەتیی رۆڵەکانی ئەو مەڵبەندە باسی لێوە دەکرێ. پێشمەرگە شەڕی بۆ ئازادی کرد و شەری بۆ شەڕ نەویست، بەڵام لە ئاستەمترین ساتەکاندا لە نێوان سەرشۆڕی دیلی وکویلەتی و، ئازایەتی و سەربەرزی، زۆر زوو بۆ هەستانەوە و گۆڕینی وەزعێک کە لەئارا دابوو، ئازایەتی و سەربەرزییان هەڵبژارد و ئازایانەش بەرەو پیری مەرگ چوون و بەخوێنی ڕۆڵەکانیان داستانی لەخۆبووردووییان نووسییەوە تا گەلەکەیان بە سەربەرزی بژین.
( لە ژمارەی ٧١٥ی”کوردستان”دا بڵاو بۆتەوە)
