شەوی سێشەممە ١٤ی ڕەزبەری ١٤٠٥، مام برایم ئەسپەندار ناسراو بە برایمی حەمە جۆڵای خەڵکی گوندی قوڵەسوێرو لە ناوچەی سەردەشت بە هۆی نەخۆشی و بەساڵاچوون کۆچی دوایی کرد.
مام برایم لە بنەماڵەیەکی نیشتیمانپەروەر و حیزبی پەروەردە کرابوو و لەباری کەسایەتیشەوە کەسێکی هێدی و نەرم و نیان بوو و ماڵەکەیان بەردەوام شوێنێکی ئەمن بۆ تێکۆشەرانی حیزبەکەمان بوو.
ئەو بنەماڵەیە خۆشەویستی و حورمەتی زۆریان بۆ پێشمەرگە هەبوو، هەر کات پێشمەرگە ڕێگایان دەکەوتە ئەو گوندە حەتمەن سەردانی ئەو بنەماڵەیان دەکرد و ڕێزی زۆریان لێ دەگیرا.
چەند کەس لە خزمانی نزیکی مام برایم لە ڕیزی تێکۆشەرانی حیزبەکەمان دابوون.
برایەکی فیداکار و دڵسۆزی مام برایم بە ناوی فەقێ هەمزە کە ئەندامێکی چالاکی حیزب بوو لە ساڵی ١٣٦٦ی هەتاوی بە پیلانی داڕێژراوی دەزگا ئەمنیەتییەکانی ڕێژیم لە شاری سەردەشت ماشینەکەی بۆمبڕێژ کرا و و بەداخەوە شەهید بوو.
برایەکی دیکەی مام برایم بەناوی خەلیل ئەسپەندار کە کادرێکی دڵسۆز و فیداکار بوو لە مەئمووریەتێکی حیزبی لە هاوینی ١٣٦٨کەوتە مەیدانی مینی دوژمن و لاقێکی لەدەست دا و ئیستا لە ولاتی بریتانیا ئەندامێکی چالاکی حیزبە.
دوو لە کچەکانی مام برایم بە ناوەکانی خاتوو ئایشە و ئامینە ئەندامی حیزبی دێموکراتن.
ناوەندی ڕاگەیاندنی حیزبی دێموکراتی کوردستانی ئێران، بەم بۆنەوە پرسە و سەرەخۆشی لە بنەماڵە و کەسوکاری ناوبراو دەکات و خۆی بە هاوبەشی خەمیان دەزانێت.
