ڕۆژی چوارشەممە ۲۲ـی ڕەزبەری ۱٤۰٥ـی هەتاوی، هاوڕێی تێکۆشەری دێرین و زیندانیی سیاسی کاک "ئیسماعیل بادبەدەست "بەهۆی نەخۆشییەوە، لە شاری شنۆ کۆچی دوایی کرد.
کاک سمایل هەر لە سەرەتای شۆڕشی گەلانی ئێرانەوە پەیوەست بە ڕیزەکانی حیزبی دێموکرات بووە و زۆر چالاکانە بەشداریی لە خەباتی ڕزگاریخوازانەی گەل و نیشتمانەی کردووە و لەو سەردەمەدا، بە چەکی خۆیەوە ماوەیەک لە هێزی بەرگریشدا بەشدارییەکی چالاکانەی هەبووە.
دوای ئەوەی شارەکانی ڕۆژهەڵاتی کوردستان داگیر کرایەوە، ناوبراو وەک ئەندامی تەشکیلاتی نهێنی مایەوە و درێژەی بەکار و چالاکیی خۆی دا کە بەو هۆیەوە ساڵی ۱۳٦۳ لەلایەن ڕێژیمەوە بە تاوانی هاوکاریی حیزبی دێموکرات دەسبەسەر دەکرێت و ڕەوانەی سیاچاڵەکانی ڕێژیم دەکرێت بۆ ماوەی دوو ساڵی زیندانی دەکرێت.
ناوبراو دوای ئازادبوونیشی لەگەڵ هاوڕێیانی کادری تەشکیلاتیی شاری شنۆ پێوەندی هەر مابوو و هەتا کاتی کۆچی دواییەکەی وەفادار بە ڕێگا و ڕێبازی حیزبەکەی مایەوە.
شایانی باسە کوڕێکی ناوبراو بە ناوی موراد بادبەدەست ئیستا لە دەرەوەی وڵات ئەندامی تەشکیلاتی ئاشکرای حیزبە.
تەرمی ناوبراو لەنێو ئاپۆڕای خەڵکی شاری شنۆ و هاوڕێیانیدا بە خاکی پیرۆزی کوردستان سپێردرا.
ناوەندی ڕاگەیاندنی حیزبی دێموکراتی کوردستانی ئێران بەم بۆنەوە پرسە و سەرەخۆشی لە بنەماڵە و کەسوکاری ناوبراو دەکات و خۆی بە هاوبەشی خەمیان دەزانێت.
