کوردستان میدیا: ڕێپێوانێکی بەرین بە مەبەستی پشتیوانی لە خەڵکی ڕاپەڕیوی ڕۆژهەڵاتی کوردستان و سەرانسەری ئێران لە شاری یۆتۆبۆری بە بەشداریی سەدان کەس لە کوردانی دانیشتووی ئەم شارە بەڕێوەچوو.
ڕۆژی شەممە، ٢ی سەرماوەز، رێپێوانێک بە بەشداری و ڕۆڵی بەرچاوی ئەندام و لایەنگرانی حیزبی دێموکراتی کوردستانی ئێران ڕێکخرا.
ڕێپێوانەکە لە “یۆتاپلاتسێن” بەرەو ناوەندی شاری یۆتۆبۆری بە ڕێژەیێکی بەرچاو و وتنەوەی درووشمی ڕووخانی کۆماری ئیسلامی و پشتیوانی لە ئازادیخوازانی ڕۆژهەڵاتی کوردستان و ئێران بەرێوەچوو.
بەشداربووان بە گەیشتن بە ناوەندی شاری یۆتۆبۆری، کۆبونەوەکەیان بە بێدەنگی بۆ ڕێزگرتن لە گیانی پاکی شەهیدان دەستپێکرد، پاشان پەیامی کۆمیتەی پشتیوانی ڕاپەڕینی رۆژهەڵاتی کوردستان و گەلانی ئێران لە لایەن یەکێک لە ئەندامانی ئەو كۆمیتەوە پێشکەش بە خۆپیشاندەران کرا.
پاشان پەیامی ناوەندنی هاوکاریی حیزبەکانی کوردستانی ئێران و چەند لایەنی تر لە درێژەی خۆپیشاندانەکەدا خوێندرایەوە.
ڕێپێوانەکە پاش ٣ کاتژمێر و بە وتنەوەی درووشم و سروودی نیشتمانی، کۆتایی پێهات.
