کوردستان میدیا: لە درێژەی مانگرتنی گشتی لە کوردستاندا، هەواڵی مانگرتنی خەڵکی شارەکانی دیکەی کوردستان وجموجۆڵی هێزەکانی رژیم بۆ چاوترسێنکردنی خەڵکمان بەدەست گەیشت.

لە هەواڵەکانی پێشتردا مانگرتنی گشتی و داخستنی دووکان و بازار لە چەندین شاری کوردستان بە کوردستانمیدیا گەیشتبوو، هەواڵنیڕانمان لە چەند شاری دیکەی کوردستانەوە رایان گەیاند کە خەڵکی ئەو شارانەش بە شێوەی رێژەیی دووکان و بازاڕیان داخستوە و شار کەشی بێدەنگی و مانگرتنی پێوە دیار بووە.

لە شارەکانی سنە، پیرانشار، کرماشان، پاوە و نەغەدە، هەواڵنێرانمان رایانگەیاند کە وێڕای پچڕانی هێڵی ئینتێرنێت کە رژیم بۆ کپکردنی دەنگی خەڵک ئەو کارەی کردوە، هەواڵی مانگرتن لە شارەکانی کوردستان بە نێو خەڵکدا بڵاو بۆتەوە و ئەو چالاکیانەی خەڵک توانراوە بە رێگای دژوار بە ماڵپەڕی کوردستان میدیا بگەیەندرێن.

هەواڵنێرانی کوردستان میدیا لە شارەکانی سنە، کرماشان، پاوە، پیرانشار، مەهاباد، سەقز، بۆکان، شنۆ، مەریوان، کامیاران و ورمێ رایانگەیاند کە رژیم هێزی زۆری لە نێو شارەکان جێگیر کردوە و لە هەر ماشین و کەسێک کە بەگومان بن دەپرسنەوە و کەشی نێو شارەکانی کوردستان بەتەواوی ئەمنیەتی و میلیتاریزە کراوە.

لە چەندین شاری کوردستان هیزە ئیتلاعاتیەکان بە هەڕەشە و بە زۆر و بە گوشاری توند هەندێک خەڵکیان ناچار کردوە کە دووکانەکانیان بکەنەوە.
بەگشتی و بە گوێرەی هەواڵە گەیشتوەکان، کوردستان دەنگی خۆی بە گوێی رژیم گەیاند.