لە شارە جۆراوجۆرەکانی وڵاتی ئاڵمان، بە دژی کۆماری ئیسلامیی ئێران خۆپیشاندانەکان بەردەوامن و هەموو کردەوەکانی ڕێژیمی ئێران ئیدانە دەکرێن.
لەماوەی ڕۆژانی ڕابردوودا، لە هەندێک لە شارەکانی وڵاتی ئاڵمان بۆ پشتیوانی لە خۆپیشاندانەکانی ئەم دواییانەی خەڵکی ئێران و کوردستان و بۆ داکۆکی لە خوێنی بەناحەق ڕژاوی ژینای کوردستان و شەهیدانی نوێی گەلەکەمان خۆپیشاندانێکی جەماوەری لە بەردەم کۆنسولگەریی کۆماری ئیسلامیی ئێران لەشاری "مۆنشنـ"ـی ئاڵمان بەڕێوە چوو.
لە کۆبوونەوەکەدا پەیامی حیزبە کوردستانییەکانی بەشدار لە ڕێورەسمەکەدا بە زمانەکانی ئاڵمانی، کوردی و فارسی، لەلایەن "سوزانە ڤالبام ، ناسر خودامورادی و یەعقووب مورادی" خوێندرایەوە.
پاشان شانۆیەک لەلایەن "پەروا دەلقی" ئەندامی ڕێکخراوی جیهانیی کورد و پەیامی کەمپەینی "نا بۆ سێناریۆسازی دژ بە زیندانیانی سیاسی" لەلایەن "کارۆ غەفاری" ئەندامی کۆمەڵەی شۆڕشگێڕی کوردستان خوێندرایەوە.
هەمان ڕۆژ لە شاڕی "مونستڕ"ی ئاڵمان لەلایەن حیزب و ڕێکخراوەکانی نەتەوەکانی ئێران بە هاوکاریی هێندێک لە سیاسەتمەدارانی ئاڵمانی و خەڵکانی ئازادیخواز لە ناوەندی شار ڕپێوانێک پێک‌هات.
لە خۆپیشاندانەکەدا ژمارەیەکی زۆر لە ئەندامان و لایەنگرانی حیزب بەشدار بوون و هەروەها "ئیسمایل ئەقدەم" ئەندامی حیزب لە سەر بارودۆخی ئێستای ئێران و کوردستان چەند وتەیەکی پێشکەشی بەشداربووان کرد.
لە درێژەی خۆپیشاندانەکاندا ڕۆژانی شەممە و یەکشەممە لە شارەکانی "برێمن و هامبورگ" خۆپیشاندان بەڕێوە چوو.
لە خۆپیشاندانی ڕۆژی یەکشەممە لە برێمن کە لەلایەن کۆمیتەی حیزبی دێموکراتی کوردستانی ئێران و ژمارەیەک چالاکی ئازادیخوازی ئێران ڕێکخرا بوو، "شەهریار نەقشبەندی" وتارێکی پێشکەش کرد.
هەروەها لە شاری هامبورگ بە هاوبەشیی کۆمیتەی حیزبی دێموکراتی کوردستانی ئێران و ناوەندی چالاکانی ڕێگەی ئازادیی ئێران گردبوونەوەیەک بەڕێوە چوو.
لە گردبوونەوەکەی هامبورگ پەیامی کۆمیتەی ئاڵمان بە زمانەکانی ئاڵمانی، کوردی و فارسی لەلایەن "ئاوات کەریمی و کەماڵ حەسەنپوور" خوێندرانەوە.
