ڕۆژی پێنجشەممە، ٧ی ڕەزبەر نوێنەرانی کۆمیتەکانی دە حیزب و ڕێکخراوی ڕۆژهەڵاتی کوردستان لە دەفتەری کۆمیتەی حیزبی دێموکراتی کوردستانی ئێران لە دەڤەری ئۆسلۆ کۆ بوونەوە.
لەو کۆبوونەوەیەدا وێرای مەحکوومکردنی هێرشی مووشەکی و فڕۆکەی بێ فڕۆکەوانی ڕێژیمی کۆماری ئیسلامی بۆ سەر بنکە و کەمپەکانی حیزبەکانی ڕۆژهەڵاتی کوردستان و شەهید و برینداربوونی دەیان کەس لە ژن و منداڵ و پێشمەرگەکانی ئەو هێزانە، پێداگری لەسەر پێویستیی یەکگری و هاوهەڵوێستی پتر سەبارەت بە پلان و بەرنامەڕێژی بۆ پشتیوانی لە ڕاپەڕینی گەلانی ئێران و بەرێوەبردنی خۆپێشاندانەكان لە نۆروێژ کرا.
لەو کۆبوونەوەیەدا تێکڕای بەشداران پێداگریان لەسەر ئەوە کردەوە کە لەو کات و ساتەدا کە رێژیمی کۆماری ئیسلامی ئێران دەگەڵ خرۆشانی جەماوەریی گەلانی ئێران بەرەوروو بووەتەوە، پێویستە ئێمە هێز و لایەنەکانی کوردی بە یەکدەنگ و یەکگرتووتر بەشداری خۆپێشاندان و رێپێوانەکان لە نۆروێژ بین و هەوڵ بدەین بە هێما و شوناسی کوردستانی لەگەڵ حیزب و لایەنە سیاسییەکانی ئێرانی هاوکاری و چالاکی بەرێوە بەرین کە هەر بۆ ئەو مەبەستەش چەند بڕیاری پێویست پەسەند کران.
ئەو حیزبانەی بەشدارییان لەو کۆبوونەوەیەدا کردبوو، بریتی بوون لە:
- کۆمەڵەی شۆرشگێری زەحمەتکێشانی کوردستانی ئێران
- کۆمەڵەی زەحمەتکێشانی کوردستان
- سازمانی خەباتی کوردستانی ئێران
- ڕێکخراوی خەباتی شۆڕشگێڕی کوردستان
- پارتی سەربەخۆیی کوردستان
- پارتی ئازادی کوردستان
- پارتی سەربەستی کوردستان
- پارتی ژیانی ئازادی کوردستان
- حیزبی دێموکراتی کوردستانی ئێران
