ڕۆژی شەممە ٢٣ی ڕەزبەر، کاتژمێر ٦ی ئێوارە لە وڵاتی ئاڵمان و لە شاری ''هامبورگ'' لەسەر بانگەوازی حیزبەکانی کوردستانی ئێران و ناوەندی چالاکانی ڕێگای ئازادیی ئێران خۆپیشاندانێک بەمەبەستی مەحکوومکردنی سەرکوت و کوشتنی لاوانی ناڕازی لە ڕێژیمی ئێران و پاڵپشتی لە مانگرتنی گشتیی کوردستان و ئێران و هەروەها خۆپێشاندانەکانی نێوخۆ بەڕێوە چوو.
"پلاتفۆرمی کوردی هامبورگ، چالاکانی بەلووچ و عەرەب، ژمارەیەک لە ئۆکرانییەکانی نیشتەجێ لە ئاڵمان و چالاکانی ئازادیخوازی ئاڵمان" لەو خۆپێشاندانەدا بەشدار بوون و بە وتار، پەیام و دروشم پشتیوانیی خۆیان بۆ خەبات و سەرهەڵدانی ڕۆژهەڵاتی کوردستان و ئێران دەربڕی.
پەیامی حیزبی دێموکراتی کوردستان ئێران لەلایەن هاوڕێ "داوود عەلیخانی"ـەوە خوێندرایەوە کە لە پەیامەکەدا شەهید و بریندارکردنی شۆڕشگێڕان و هێرشی مووشەکی بۆ سەر حیزبەکانی کوردستانی ئێرانی بە توندی مەحکووم کرابوو.
کاتژمێر ٨ی شەو بە وتنەوەی دروشمی "ژن، ژیان، ئازادی - ئیتر بەسە بێدادی" لەلایەن "فاتمە فەلاحیـ"ـەوەک، کۆتایی بە خۆپیشاندانەکە هات.
