لە درێژەی ناڕەزایەتییەکانی خوێندکاران بە کوشتنی "ژینا ئەمینی" لەلایەن ڕێژیمی ئیسلامیی ئێرانەوە، خوێندکارانی زۆربەی زانکۆی شارە جۆراوجۆرەکانی ئێران دەستیان بە ناڕەزایەتی و خۆپیشاندان کردووە.
لە زانکۆی "ئەلزەهرای مەشهەد"، کاتێک خوێندکاران ناڕەزایەتییان دەربڕیوە هێزەکانی حیراسەتی ئەو زانکۆیە بۆ ناسینەوە و دەسبەسەرکردنیان وێنە و فیلمیان لێ هەڵگرتوون.
هێزەکانی حیراسەت و لیباس شەخسی، موبایلی ئەو خوێندکارانەیان پشکنیون و بە گرتنی دەرگای چوونە ژوورەوە و هاتنەدەر خوێندکارانیان زیندانی کردوون.
لەلایەکی دیکەوە خوێندکارانی زانکۆی "ئابووریی عەلامە تەباتەبایی" بەدژی جیاوازیی ڕەگەزی دروشمی "بسیجی، حراست، پیوندتان مبارک و دانشجو می‌میرد ذلت نمی‌پزیرد"یان دەوتەوە.
خوێندکارانی زانکۆی سەنعەتیی "شاهروود"یش لە بەرامبەر هێزەکانی بەسیج خۆپیشاندانیان بەڕێوە برد و زۆربەی زانکۆی شارەکانی دیکەش ناڕەزایەتییان دەربڕیوە.
خوێندکارانی علووم پزیشکیی شارەکانی "بەندەرعەباس و بوشێهر"یش بەدژی جیاوازیی ڕەگەزی، کۆمەڵێک دروشمیان بە دژی ڕێژیم وتووەتەوە و بە هەڵگرتنەوەی وێنە و ناسینەوەیان هێزەکانی حیراسەت و بەسیجی هەڕەشەی دەرکردنیان لەو خوێندکارانە کردووە.
