ڕۆژی شەممە ١٤ی خەزەڵوەر، بەرانبەر بە ٥ی مانگی نۆڤامبری ٢٠٢٢ی زایینی لە درێژەی خۆپێشاندانەکانی دەرەوەی وڵات، کۆمیتەی حیزبی دێموکراتی کوردستانی ئێران لە ڕۆژاوای کانادا بە هاواهەنگیی چەندین لایەنی ئێرانی و بەبەشداری هەزاران کەس لە کوردستانییان و گەلانی دیکەی ئێران و دانیشتووی "ڤانکۆڤێر"ی کانادا لە ناوەندی شار خۆپیشاندانێکی جەماوەریی چەند هەزار کەسییان بەڕێوە برد.
دەستپێکی بەرنامە وێڕای بەخێرهاتنی بەشداربووان لەلایەن "شادی ئەمین ئاقایی" بە خوێندنەوەی سروودی نەتەوەیی "ئەی ڕەقیب" و سروودی "ئەی ئێران" دەستی پێ کرد.
لەنێوئاخنی بەرنامەدا چەندین دروشم بە تێکڕای دەنگی بەشداربووانەوە وترایەوە و هەروەها لەسەر بارودۆخی ئێستای ئێران و کوردستان لێدوان لە خۆپیشاندەران وەرگیرا.
لەو خۆپیشاندانەدا سەرۆکی دووهەمین حیزبی گەورەی کانادا واتا حیزبی "کانسیرڤەتیڤ" کە خاوەن ١١٦ کورسی پارلمانە و "پیری بولیڤر" و هەروەها "هارجیت ساجان" وەزیری گەشە و داهێنانی نێونەتەوەیی دەوڵەتی کانادا و زیاتر لە دە ئەندام پارلمانی دەوڵەتی کانادا بەشدار بوون و وتاری خۆیان پێشکەش کرد و بە تەواوی پشتیوانیی خۆیان لە ڕاپەڕینی گەلانی ئێران دەربڕی کە جێگای خۆشحاڵیی خۆپێشاندەران بوو.
بە نوێنەرایەتیی کوردەکانی دانیشتووی "ڤانکۆڤێر"ی کانادا دکتور "ڕەحیم سورخی" باسێکی لەسەر درێژەپێدانی خۆپێشاندانەکانی کوردستانی ڕۆژهەڵات و ئێران و داماوی ڕێژیم لە ئاست ئازایەتیی خەڵکی ڕاپەڕیو پێشکەش کرا.
لەو خۆپیشاندانەدا بەشداریی بەرچاوی ڕەوندی کورد و کۆمیتەی حیزبی دێموکرات و ئەندامانی بە شەکانەوی ئالای کوردستان و پۆشینی جلوبەرگی کوردی و خوێندنەوەی سروودی نەتەوایەتیی ئەی ڕەقیب سەرنجی تایبەتیی سەرجەم خۆپیشاندەران و ئەندام پارلمان و کەسایەتییە سیاسییە بەشداربووەکانی کانادای بۆ لای خۆی ڕاکێشابوو .
ئەوەی زۆر جێگای سەرەجی تایبەت بوو ئەوەیە کە بە خۆشییەوە ڕۆژ بەدوای ڕۆژ دەنگی گەلانی ڕاپەڕیوی ئێران زیاتر دەگاتە ناوەندەکانی بڕیاری وڵاتانی دەرەوە و بەتایبەتی دەوڵەتی کانادا و هەر لەو پێناوەشدا چەندین هەڵوێستی گرینگیان دژ بە ڕێژیمی تێرۆریستیی ئێران گرتووە و لە لێدوانەکانیاندا دەردەکەوێت کە ئەوانیش هاتوونەتە سەر ئەو بڕوایە کە کۆتاییەکانی تەمەنی نگریسی ڕێژیمی تێرۆریستیی ئێرانە و هەر بەو هۆکارەش هەرکات بانگەوازی خۆپێشاندانی گەلانی ئێران دەبینن بۆ خۆیان ئامادەیی بەشداربوون و پشتیوانیکردن دەردەبڕن کە بە درێژایی ئەو ساڵانە قەت شتی وا ڕووی نەداوە.
ئەو خۆپیشاندانەش دەنگدانەوەیەکی بەرفراوانی لە شەقام و ڕای خەڵک و ناوەندە حکوومەتییەکانی "کانادا"دا داوەتەوە و هەموو لایەک بە سەرنجەوە دەڕوانە ڕووداوەکانی ئێستای ئێران.