لە پێوەندییەکی تەلەفۆنیدا، "هەژار دەشتی" بەرپرسی پێوەندییەکان لە وڵاتی دانمارک لەگەڵ بەرپرسی دۆسیەی ئێران لە وەزارەتی دەرەوەی دانمارک، باسی هێرشی ڕۆژی دووشەممە ٢٣ی خەزەڵەور، لەلایەن کۆماری ئیسلامی بۆ سەر بنکە و بارەگاکانی حیزبەکانی ڕۆژهەڵاتی کوردستان و کەمپی پەنابەران کرد.
نوێنەری حیزب باسی لەوە کرد کە ئەوە چەندەمین جارە کە ڕێژێمی کۆنەپەرست و تێرۆریستی کۆماری ئیسلامیی ئێران بە شێوەیەکی هەرەمەکی و بە مووشەک و بە دڕۆنی خۆتەقێن هێرش بۆ سەر بنکەکانی حیزب و پارتە ڕۆژ‌ەڵاتییەکان و کەمپی پەنابەران دەکا و خەڵکی سیڤیل و بێ تاوان دەکاتە ئامانج.
هەرلەدرێژەی باسەکەدا باسێک لەسەر ئەو ڕاپۆرتە کرا کە لەلایەن حیزبی دێموکراتەوە ئامادەکراوە سەبارەت بە پێشیلکارییەکانی مافی مرۆڤ لە کوردستان لە چوارچێوەی شۆڕشی ژینا و ئامارە پێوەندیدارەکان بە خۆپێشاندانەکان.
بەرپرسی دۆسیەی ئێران سپاسی ئەو پێوەندییە تەلەفۆنییەی کرد و خەمخۆری خۆی بۆ هێرشەکە ڕاگەیاند. هەروەها ئەوەی پشتڕاست کردەوە کە ئەو زانیارییانە لەڕاپۆرتەکانی خۆیدا دەگونجێنێ و لە کۆبوونەوەکانیاندا سەبارەت بە ڕەوشی ئێران، دەیانهێنێتە بەرباس.
