لە ئەمڕۆوە چادرێکی کوردانی ڕۆژهەڵات بۆ پشتیوانی لە ناڕەزایەتی و ڕاپەڕینەکانی خەڵکی ڕۆژهەڵاتی کوردستان لە بەرانبەر پارلمانی کانادا لە ئۆتاوای پێتەختی ئەو وڵاتە هەڵدراوە و بڕیارە تێیدا چالاکیی دژ بە ڕێژیم و بۆ خواستە جۆراوجۆرەکانی وەک ناساندنی یەکجارەکی و فەرمیی سپای پاسداران بە گرووپێکی تێرۆریستی و بە فەرمی ناسینی شۆڕشی گەلانی ئێران دژی دیکتاتۆری بەڕێوە بچێت.
لە دەسپێکی ئەو چالاکییەدا "شەهین فەیزی" و "ئیحسان زارعی" لە ئەمڕۆوە تا ماوەیەکی نادیار لە ئۆتاوا بەڕێوەبەری ئەو چالاکییە دەبن.
پێشبینی دەکرێ ڕۆژانەش خەڵکیان بە دەورەوە بێ و ڕێژەی ئەو خەڵکە بەو چالاکییە زیاتر و زیاتر بکا. لە یەکەم ساتەکانی ئەو چالاکییەدا ماڵی کورد پشتیوانیی خۆی ڕاگەیاندووە کە هەموو هەوڵێک بۆ چالاکتر کردن و پڕ بەرهەمتربوونی ئەو چالاکییە دەدا.
سپای پاسداران تەنیا بەو تاوانانەی خوارەوە بەسە بۆ ئەوەی وەک گرووپێکی تێرۆریستی بێتە ئەژمار و بخرێتە لیستی گرووپێکی تێرۆریستییەوە.
ـ کوژرانی ١٥٠٠ خۆپیشاندەر لە مانگی خەزەڵوەی ساڵی ٩٨
ـ بەئەنقەست خستنەخوارەوەی فڕۆکەی PS752 و کوشتنی ١٧٦ کەسی بێ‌تاوان و لە نێویاندا ٨٥ هاووڵاتیی کانادایی.
ـ کوشتنی زیاتر لە ٣٠٠ خۆپیشاندەر و لە نێویاندا زیاتر لە ٤٠ منداڵی خوار تەمەن ١٨ ساڵ لە ڕاپەڕینی ئێستای ئێران.
