ناوەندی هاوکاریی حیزبەکانی کوردستانی ئێران، بە مەبەستی پشتیوانی لە شۆڕشی ژن، ژیان، ئازادی لە ئێران و کوردستان خۆپیشاندانێکی ناڕەزایەتییان لە شاری "ئارهووس" لە وڵاتی دانمارک بەڕێوە برد.
دوانیوەڕۆی ڕۆژی شەممە ٢٨ی خەزەڵوەری ١٤٠١ی هەتاوی، خۆپیشاندانێکی گەورە لەلایەن ناوەندی هاوکاریی حیزبەکانی کوردستانی ئێران، سازمانی دێموکراتیکی یارسان و بە بەشداریی نەتەوەکانی تورک و فارس لە شاری " ئارهاووس" لە وڵاتی دانمارک بەڕێوەچوو.
سەرەتای خۆپێشاندانەکە بە سروودی نەتەوایەتیی ئەی‌ڕەقیب و خولەکێک بێدەنگی بۆ ڕێزگرتن لە گیانی پاکی شەهیدان دەستی پێ کرد.
سەرەتا پەیامی ناوەندی هاوکاریی حیزبەکانی کوردستانی ئێران بە زمانی ئینگلیسی لەلایەن خاتوو “سەحەر حیسامی” و بە زمانی دانمارکی لەلایەن “خاتوو هۆنیا ئازەربارە”وە خوێندرایەوە.
پەیامی سازمانی دێموکراتیکی یارسان بە زمانی کوردی لەلایەن “شکۆفە ئەلقاسی”یەوە خوێندرایەوە.
لە نێوئاخنی بەرنامەکەدا چەندین سروودی شۆڕشگێڕی و هەروەها چەند پارچە مووزیک بە زمانەکانی کوردی، فارسی، لوڕی و بەلووچی پێشکەش کران.
پاشان سێ کورتە شانۆ لەسەر جینایەتەکانی کۆماری ئیسلامی دەرحەق بە گەلانی ئێران نمایش کران.
