مستەفا هیجری، بەرپرسی ناوەندی بەڕێوەبەریی حیزبی دێموکراتی کوردستانی ئێران، لە پەیامێکی تویتێریدا ئێعدامی مۆحسێن شکاریی مەحکووم کرد و وتی کە لە کۆماری ئیسلامیدا دادگای ئینقلاب کەرستەیەکە بۆ سەرکوت و تۆقاندن و تێرۆر.
دەقی پەیامەکە بەم چەشنەیە:
ئێعدامی مۆحسێن شکاری هاووڵاتییەکی مافخواز لە تاران لە دادگایەکی نادادپەروەرانەدا کە بە ئێعدام مەحکووم کرا و حوکمەکەی زۆر بەپەلە جێبەجێ کرا بەتوندی مەحکووم دەکەم و هاودەردیی خۆم لەگەڵ بنەماڵەکەی و هاوخەباتەکانی دەردەبڕم.
لە ماوەی ٤٣ ساڵی ڕابردوو لانیکەم هەزار و ٨٢٠ چالاکی سیاسی لە کوردستان لەم جۆرە دادگایانەدا بە ئێعدام مەحکووم کراون و حوکمەکەیان جێبەجێ کراوە.
لە کۆماری ئیسلامیدا دادگای ئینقلاب کەرەستەیەکە بۆ سەرکوت و ترساندنی خەڵكی ئێران و دەزگایەکە بۆ کوشتار و تێرۆری حکوومەتی و باسکی سەرەکیی سیستمی جینایەتکاری کۆماری ئیسلامییە.
