ەندامانی حیزبی دێموکراتی کوردستانی ئێران و بەشێک لە هێزە کوردییەکان و چالاکانی سیاسیی دانیشتوو لە "ئۆسلۆ"ی پێتەختی وڵاتی نۆروێژ سەبارەت بە سەرکوتی خۆپیشاندەران لەلایەن هێزەکانی ڕێژیمی ئێران و پشتیوانی لە شۆڕشی ژینا خۆپیشاندانێکیان بەڕێوە برد.
ڕۆژی سێشەممە ٢٢ی سەرماوەزی ١٤٠١ی هەتاوی ئەندامانی حیزبی دێموکراتی کوردستانی ئێران و بەشێک لە هێزە کوردییەکان و چالاکانی سیاسی لە ئۆسڵۆ لە بەردەم وەزارەتی دەرەوەی وڵاتی نۆروێژ خۆپیشاندانێکی ناڕەزایەتییان دژی سەرکوتی گەلانی ئێران و بۆ پشتیوانی لە شۆڕشی ژینا بەڕێوە برد.
گرینگیی ئەو خۆپیشاندانە لەوەدا بوو کە وەزارەتی دەرەوەی وڵاتی نۆروێژ باڵوێزی ڕێژیمی ئێرانی بانگهێشت کردبوو، تا بەم شێوەیە ناڕەزایەتیی خۆی لەمەڕ سەرکوت و ئێعدامی خەڵکی ناڕازی لە ئێران و بەتایبەتی سەپاندنی حوکمی ئێعدام بەسەر بەشێکی زۆر لە دەسبەسەرکراونی شۆڕشی ژینادا پێ ڕابگەیەنێت.
کۆمیتەی حیزبی دێموکراتی کوردستانی ئێران دەوری سەرەکیی لە بەڕێوەبردن و ڕێکخستنی ئەو خۆپیشاندانەدا هەبوو و ئەندامانی حیزبی دێموکرات لەو خۆپیشاندانەدا بە ڕێژەیەکی بەرچاو بەشدار بوون.
خۆپیشاندەران بڕیارنامەیەکیان بە زمانی نۆروێژی ئامادە کردبوو کە بۆ ئامادەبووان خوێندرایەوە و دەقی ئەو بڕیارنامەیەش ڕادەستی وەزارەتی دەرەوەی نۆروێژ کرا.
خۆپیشاندەران بە زمانەکانی کوردی، فارسی و نۆروێژی دژی سیاسەتە سەرکوتکەرانەکەی ڕێژیم دروشمیان دا.
