سیمینارێکی سیاسی بەبۆنەی ٢ی ڕێبەندان لە وڵاتی سویس، بۆ بەڕێز خالید عەزیزی، وتەبێژی حیزبی دێموکراتی کوردستانی ئێران بەڕێوە چوو.
ڕۆژی یەکشەممە ٢ی ڕێبەندانی ١٤٠١ی هەتاوی، بە بەشداریی نوێنەرانی هێز و لایەنە کوردستانی و ئێرانییەکان و ئەندامان و لایەنگرانی حیزبی دێموکرات و کوردانی دانیشتووی سویس، سیمینارێکی سیاسی بۆ بەڕێز خالید عەزیزی، بەڕێوە چوو.
سیمینارەکە بە سروودی نەتەوایەتی ئەی ڕەقیب و ساتێک بێدەنگی بۆ گیانی شەهیدانی کورد و کوردستان دەستی پێ کرد. دواتر بەڕێز زاهیر قادرحاجی، بەرپرسی کۆمیتەی حیزب لە وڵاتی سویس لە وتەیەکدا وێڕای بەخێرهاتنی کاک خالید عەزیزی و میوانانی سیمینارەکە و لایەنەکانی بەشدار، پەیامی کۆمیتەی حیزبی لەو وڵاتە پێشکەش کرد.
پاشان بەڕێز خالید عەزیزی، وتەکانی خۆی بە یادکردنەوەی کۆماری کوردستان دەست پێ کرد و باسی لە دامەزراندنی کۆماری کوردستان و هەروەها ئەزموونی ئەو کۆمارە کرد کە بە شێوەیەکی تۆکمە و بەرنامە بۆ داڕێژراو، ٧٧ ساڵ لەمەوبەر لەلایەن حیزبی دێموکرات و شەخسی پێشەوا قازی محەممەد ڕاگەیەندرابوو و هەر لەژێر ڕووناکایی ئەو ئەزموونە کار دەکەن بۆ ڕێکخستن و هاوکاری لەگەڵ دامەزراو و ڕێکخراوە کوردستانی و ئيرانییەکان بۆ درێژەدانی خەبات دژی کۆماری ئیسلامی، بەتایبەت دوای شۆڕشی نوێی گەلانی ئێران.
عەزیزی لە درێژەی وتەکانیدا وتی: پاش ڕووخانی ڕێژیمی کۆماری ئیسلامی، دەبێ سیستمێکی دێسانتریالیزە جێگیر بکرێت و دەسەڵاتێک بنیاد بنرێتەوە کە هەموو نەتەوە و لایەنەکان بە بیر و بۆچوونی جیاواز بە مافەکانی خۆیان بگەن کە لە غەیری ئەوەدا هیچ سیستمێک خۆ ناگرێت و خەبات و تيکۆشانی ئێمە بەردەوام دەبێت تا دەستەبەرکردنی مافەکانی گەلی کورد. ئێمە نامانهەوێت بە کۆکردنەوەی دەسەڵات لە ناوەنددا لە ئێرانی داهاتوو، مافی گەلی ئێمە پێشێل بکرێتەوە کە بە دڵنیاییەوە دیکتاتۆری بەرهەم دێنێتەوە.
