ڕێکخراوی مافی مرۆڤی ئێران ڕایگەیاند، هێزە سەرکوتکەرەکانی کۆماری ئیسلامی لە سەرەتای خۆپێشاندانەکانەوە تاکوو ئێستا لانیکەم ٤٨٨ کەسیان کوشتووە.
ڕۆژی شەممە ٨ی ڕێبەندانی ١٤٠١ی هەتاوی، ڕێکخراوی مافی مرۆڤی ئێران ڕایگەیاند: لە سەرەتای ڕاپەڕینی گەلانی ئێران دژی کۆماری ئیسلامی، تا ئێستا لانیکەم ٤٨٨ هاووڵاتی لەلایەن هێزە سەرکوتکەرەکانی ڕێژیمەوە بە تەقەی ڕاستەوخۆ و ئەشکەنجە کوژراون، هەروەها ١٠٨ هاووڵاتیی دیکەش لە بەندیخانەکاندا مەترسیی لەسێدارەدانیان لەسەرە و پێویستە ڕێکخراوی نەتەوە یەکگرتووەکان لەو بارەیەوە بێدەنگ نەبێت و هەڵوێستی جیدیی هەبێت.
لە درێژەی ئەو ڕاپۆرتەدا وێڕای ئاماژەدا بەوەیکە ٦٤ کەس لە کوژراوان منداڵ و ٣٩ کەسی دیکە ژن بوونە، هاتووە: زۆرترین کوژراوانی خۆپیشاندانە سەرانسەرییەکان، لە پارێزگاکانی بەلووچستان، ورمێ، تاران، سنە و مازەندەران بووە کە هێزە چەکدارەکانی ڕێژیم بە تەقەی ڕاستەوخۆ گیانی لێ ئەستاندوون و ١٩ کەسی دیکە لە بەندیخانەکانی ڕێژیم سزای لەسێدارەدانیان بەسەردا سەپێندراوە.
