کاک خالید عەزیزی، وتەبێژی حیزبی دێموکراتی کوردستانی ئێران، لە درێژەی دیدار و چاوپێکەوتنەکانی لەگەڵ کەسایەتی، ڕێکخراو، بنکە و بونیادە جۆراجۆرە جیهانییەکان، لە واشنگتۆن لەگەڵ دوو دامەزراوەی ئەمریکایی کۆ بووەوە.
وتەبێژی حیزبی دێموکرات، لەگەڵ دوکتور "کاترینا لانتۆس سویت"، سەرۆکی دامەزراوەی لانتۆس بۆ مافەکانی مرۆڤ و دادپەروەری و هەروەها لەگەڵ دوكتور "کریستین سیکوێنزیا"، هاوسەرۆکی هەڵمەتی مێزی دەورەیی لووتكەی ئازادیی ئایین بۆ نەهێشتنی یاساکانی پێشێلكردنی مافی مرۆڤ، کۆ بووەوە.
کاک خالید عەزیزی لەو دیدارانەدا سەبارەت بە پرسەکانی مافی مرۆڤ و پێشێلکردنی مافی نەتەوەکانی ژێر ستەم لە ئێران قسەی كرد و لەبارەی ڕێژەی زۆری بەندکراوانی سیاسی و ئایینیی کورد و مەترسیی لەسێداردانی بەشێکیان لەلایەن دەسەڵاتدارانی تارانەوە، زانیاریی پێشکەش کرد.
وتەبێژی حیزب داوای لەو دوو کەسایەتییە کرد کە لە ڕێگای بڵاوكردنەوەی ڕاپۆرت و قسەكردن لەگەڵ ناوەندەكانی مافی مرۆڤ لە ئاستی جیهان، گوشاری هەمەلایەنە بخەنە سەر ڕێژیمی ئێران تاکوو دەست لەو پێشێلکارییانە هەڵبگرێت و هەوڵ بدرێت ڕێژیمی ئێران لە ناوەندەكانی مافی مرۆڤ و نەتەوە یەكگرتووەكان دەر بكرێت.
لە بەشێکی دیکەی ئەو دیدارانەدا پرسی پەنابەران و مەترسیی بەردەوامی هێرشەکانی تاران بۆ سەر کوردستان و پێویستیی پێشگرتن بەو هێرشانە قسەیان لەسەر کرا.
دوو لایەن سەبارەت بە هەنگاونان بۆ كۆمەڵێک پرۆژە و كاری هاوبەش لە ئاستی ئەمریكا و جیهان، گرێدراو بە پرسەكانی مافی مرۆڤ لە ئێران و كوردستان، ئاڵوگۆڕی بیروڕایان كرد.
لەم دیدارانەدا، ڕەحیم ڕەشیدی، ئەندامی ئەنستیتۆتی گوڵد بۆ ستراتیژیی نێونەتەوەیی، هاوڕێیەتیی وتەبێژی حیزبی کرد.
