مەسعوود کوردپوور، سەرنووسەری ئاژانسی هەواڵدەریی موکریان لەلایەن دادگای کۆماری ئیسلامییەوە لە بۆکان سەرجەم سزای ١٧ مانگ بەندکرانی بەسەردا سەپێندرا.
بەپێی ڕاپۆرتی ڕێکخراوی مافی مرۆڤی کوردپا، مەسعوود کوردپوور، ڕۆژنامەنووس و بەندکراوی سیاسی، لەلایەن دادگای کۆماری ئیسلامیی ئێران لە شاری بۆکان، بە تۆمەتی "پڕوپاگەندە دژی نیزامی کۆماری ئیسلامی" سزای ٩ مانگ بەندکران و بە تۆمەتی "ئاڵۆزی و ئاژاوەگێڕی لە کۆمەڵگەدا" سزای ٨ مانگ بەندکرانی بەسەردا سەپاوە.
بەپێی یاسای کۆکردنەوەی سزاکان، قورسترین سزا واتە سزای ٩ مانگ بەندکرانی ناوبراو جێبەجێ دەکرێت.
مەسعوود کوردپوور، ڕۆژی پێنجشەممە ٢٩ی خەرمانانی ١٤٠١ی هەتاوی لە ماڵەکەی خۆی لە شاری بۆکان دەسبەسەر کرابوو و پاشان بۆ بەندیخانەی وەزارەتی ئیتلاعاتی ڕێژیم لە ورمێ ڕایانگواستبوو و تا ئێستاش لەو بەندیخانەدایە.
