لە دەستپێکی شۆڕشی "ژینا"وە تا ئێستا، ٢٦ مامۆستای ئایینیی کورد لەلایەن هێزەکانی ڕێژیمەوە دەسبەسەر و بانگی ناوەندە ئیتلاعاتییەکانی ڕێژیم کراون.
پاش قەتڵی حکوومەتیی "ژینا ئەمینی" لەلایەن هێزەکانی ڕێژیمەوە و دەستپێکی شۆڕشی ژن ژیان ئازادی لە کوردستان کە هەموو ئێران و دەرەوەی وڵاتیشی گرتەوە، مامۆستایانی ئایینی و نیشتمانپەروەری کوردستان بە دەرکردنی بەیاننامە و خوێندنەوەی وتار لەسەر گۆڕی شەهیدانی شۆڕشی ژینا، ڕووبەڕووی هێزەکانی ڕێژیم بوونەتەوە و تا ئێستا ڕێژیم ٢٦ مامۆستای ئایینیی کوردستانی دەسبەسەر و بانگ کردووە.
ڕێژیم لە دەستپێکی شۆڕشی ژیناوە تا ئێستا، ١٥ مامۆستای ئایینی و نیشتمانپەروەری کوردیان لە کوردستان دەسبەسەر کردووە و ١١ مامۆستای دیکەیان بانگی ناوەندە ئیتلاعاتییەکان کردووە.
جێگەی ئاماژەیە کە مامۆستایانی ئایینی و نیشتمانپەروەر بەردەوامن لە پشتیوانیکردنی خەڵکی ڕاپەڕیوی کوردستان و بە هەموو شێوەیەک سەرکوت، ئەشکەنجە و ئێعدامی دەسبەسەرکراوانی ئەو ڕاپەڕینە لەلایەن ڕێژیمەوە مەحکووم دەکەن.
