ڕۆژی یەکشەممە ٢١ی ڕەشەمە، بۆ پشتیوانی لە شۆڕشی ژینا و بە تایبەتی بۆ مەحکوومکردنی هێرشی کیمیایی ڕێژیم بۆ سەر کچانی قوتابخانەکانی ئێران و کوردستان، لە ناوەڕاستی شاری ''پێرت'' لە ڕۆژاوای ئوسترالیا خۆپیشاندانێک بەڕێوە چوو و کۆمەڵێکی بەرچاو لە کوردستانییان و نەتەوەکانی دیکەی ئێران کە دانیشتووی ئەو شارەن، تێیدا بەشدار بوون.
لەو خۆپیشاندانەدا ''ئیەن گوود ئێناف''، ئەندامی پارلمانی فیدراڵ لە حیزبی لیبراڵ لە وتارێکدا پشتیوانیی خۆی لە شۆڕشی خەڵکی ئێران ڕاگەیاند و وتی: "لە گەڵتان دەبم و پشتیوانیتان لێ دەکەم هەتا حکوومەتی ئوسترالیا کاردانەوەی جیددیی دەبێت.''
دواتر خۆپیشاندەران بە دروشمدان بە چەند شەقامێکی ئەو شارەدا درێژەیان بە خۆپیشاندانەکە دا. بەشێک لە دروشمەکان بریتی بوون لە: ''یونیسێف منداڵەکانمان پارێزراو نین''، ''دێموکراسی بۆ ئێران"، "ئاخوند بڕۆ دەرەوە لە ئێران''، ''ژن ژیان ئازادی"، "بەسیجی، سپایی داعشی ئێمە ئێوەن'' و ''نەمان بۆ دیکتاتۆر.''
