هێزەکانی ئیدارەی ئیتلاعاتی ڕێژیم، لە ڕێگای سنە- مەریوان، تەقەیان لە ماشینی هاووڵاتییەک بە ناوی پووریا ئەحمەدی کرد و پاشان ناوبراو و خێزانەکەیان دەسبەسەر کردووە.
بەپێی ڕاپۆرتی "کوردپا"، ڕۆژی سێشەممە ١٠ی گەلاوێژ، هێزەکانی ئیدارەی ئیتلاعاتی ڕێژیم، لە ڕێگای سنە- مەریوان، تەقەیان لە ماشینی هاووڵاتییەک بە ناوی "پووریا ئەحمەدی"، چالاکی مەدەنیی خەڵکی سنە کردووە و پاش ڕاگرتنی ماشینەکە، ناوبراو و هاوسەرەکەی بە ناوی "سەحەر ئەحمەدی" و منداڵەکەی بە ناوی "بەرزین"یان دەسبەسەر کردووە.
هێزەکانی ئیتلاعات پاش لێدان لە پووریا ئەحمەدی و سەحەری هاوسەری، منداڵە ساواکەشیان دەسبەسەر کردووە و بۆ گرتنگەی ئیدارەی ئیتلاعاتی ڕێژیم لە سنەیان ڕاگواستوون.
"کوردپا" ڕایگەیاندووە کە ڕۆژی چوارشەممە ١١ی گەلاوێژ، هێزەکانی ئیتلاعات بنەماڵەی ئەحمەدییان بانگ کردووە و منداڵەکەیان ڕادەست کردوون.
هەروەها ئەو هێزانە ڕۆژی چوارشەممە، هەڵیانکوتاوەتە سەر ماڵی پووریا ئەحمەدی و پاش پشکنینی ماڵەکەی، هەندێک کەرەستەی تاکەکەسیشیان لەگەڵ خۆیان بردووە.
هەتا کاتی بڵاوبوونەوەی ئەم هەواڵە لە هۆکاری دەسبەسەرکران و تۆمەتە وەپاڵدراوەکان دژی پوریا و سەحەر ئەحمەدی، زانیارییەک لەبەر دەستدا نییە.
شایانی باسە کە پووریا ئەحمەدی، ڕۆژی ١ی ڕەشەمەی ساڵی ١٣٩٧یش لەلایەن هێزەکانی ئیتلاعاتی سپای پاسدارانەوە لە سنە دەسبەسەر کرابوو و پاش ١٥ ڕۆژ لێپرسینەوە لە گرتنگەی ئەم ناوەندە ئەمنییەتییە، بە دانانی بارمتە ئازاد کرابوو.
هەروەها ناوبراو ڕۆژی ٢١ی بانەمەڕی ساڵی ١٣٩٨، لەلایەن هێزەکانی ئیدارەی ئیتلاعاتی سنەوە دەسبەسەر کرابوو و پاش ١٠ ڕۆژ لێپرسینەوە لە گرتنگەی ئیدارەی ئیتلاعات، بە دانانی بارمتەی ٣٠٠ میلیۆن تمەنی ئازاد کرابوو.
