جاوید ڕەحمان، ڕاپۆرتێری تایبەتی ڕێکخراوەی نەتەوە یەکگرتووەکان بۆ چاوەدێریکردن بەسەر دۆخی مافی مرۆڤ لە ئێران، ڕۆژی سێشەممە ڕاپۆرتێکی لەبارەی دۆخی مافی مرۆڤ لە ئێران بە کۆڕی گشتیی ئەم ڕێکخراوەیە دا و وتی: ئەم ڕاپۆرتە پیشاندەری "ڕاستیی تاڵ"ی دۆخی مافی مرۆڤ لە ئێرانە.
ناوبراو لە دانیشتنی کۆمیتەی سێیەمی ڕێکخراوی نەتەوە یەکگرتووەکان وتی: سێزدە مانگ لە کوشتنی ژینا ئەمینی لە گرتنگەی گەشتی ئیرشاد تێپەڕیوە و ڕێژیمی ئێران لەمبارەوە لە لێکۆڵینەوەی ڕوون، بێ لایەنانە و سەربەخۆ سەرکەوتوو نەبووە و بەردەوام هەموو جۆرە پێشێلکارییەک لەلایەن خۆیەوە ڕەت دەکاتەوە.
جاوید ڕەحمان زیادیشی کرد، کەموکوڕییە بەرچاوەکان لە چوارچێوەی یاسایی و سیاسیی کۆماری ئیسلامیی ئێران، بە شێوەیەکی بەرچاو توانایی شارۆمەندانی ئێرانی بۆ کەڵکوەرگرتن لە مافی بەشداریی دێموکراتیکیان لە بوارە سیاسی و گشتییەکان، بەرتەسک کردووەتەوە.
ڕاپۆرتێری تایبەتی ڕێکخراوەی نەتەوە یەکگرتووەکان سەبارەت بە "پرسە بەربڵاوەکانی مافی مرۆڤ لە ئێران و دۆخی خراپی کەسانێک کە لە بەشداریی مەدەنیی خۆیان کەڵک وەردەگرن"، نیگەرانیی خۆی دەربڕی.
