چالاکێکی ژینگەپارێزیی خەڵکی جوانڕۆ بە ناوی "یاسر نووری"، ٤ مانگ زیندانی بەسەردا سەپێندرا.
بەپێی ڕاپۆرتی "کوردپا"، یاسر نووری، چالاکی ژینگەپارێزیی خەڵکی جوانڕۆ، لەلایەن لقی ٤ی دادگای ئینقلابی ڕێژیم لە کرماشان، بە تۆمەتی "پڕوپاگەندە دژی نیزام"، ٤ مانگ زیندانی تەعزیریی بەسەردا سەپێندرا.
کۆبوونەوەی دادگایی پێڕاگەیشتن بە تۆمەتەکانی ئەم چالاکە ژینگەپارێزییە لە ماوەی ڕۆژانی ڕابردوودا لە لقی ٤ی دادگای ئینقلابی ڕێژیم لە کرماشان بەڕێوە چوو و ئەم حوکمە ڕۆژی چوارشەممە ٣ی خەزەڵوەر بە ناوبراو ڕاگەیەندرا.
ڕۆژی شەممە ٧ی گەلاوێژ، هێزە ئەمنییەتییەکانی ڕێژیم بەبێ بەڵگەی یاسایی و بە توندوتیژییەوە ئەم چالاکە ژینگەپارێزییەیان لە یەکێک لە شەقامەکانی جوانڕۆ دەسبەسەر کرد و بۆ گرتنگەیەک لە مەیدانی نەوتی کرماشان ڕایانگواستبوو.
هێزە ئەمنییەتییەکان پاش دەسبەسەرکرانی یاسر نووری، هەڵیانکوتابووە سەر ماڵی ناوبراو و ماڵەکەیان پشکنیبوو.
ئەم چالاکە ژینگەپارێزییە پاش ١٢ ڕۆژ دەسبەسەرکران بە دانانی بارمتە و بە شێوەی کاتی ئازاد کرابوو.
